ಕರಾವಳಿಯಲ್ಲಿ ಅಡಿಕೆ ಮಾರುಕಟ್ಟೆ ಅಧ್ಯಯನಕ್ಕೆ ಪ್ರತ್ಯೇಕ ಸಮಿತಿ

ಮಂಗಳೂರು : ಕುಸಿಯುತ್ತಿರುವ ಅಡಿಕೆ ಬೆಲೆಯಿಂದ ನೊಂದಿರುವ ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಯ ಅಡಿಕೆ ಬೆಳೆಗಾರರು, ಅಡಿಕೆ ಮಾರುಕಟ್ಟೆಯ ಪರಿಸ್ಥಿತಿಯನ್ನು ಅಧ್ಯಯನ ಮಾಡಲು 11 ಮಂದಿ ಸಮಿತಿಯ ಪ್ರತ್ಯೇಕ ಅಡಿಕೆ ಸಂಸ್ಥೆಯಾಂದನ್ನು ರಚಿಸಿದ್ದಾರೆ.

ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಯ ರೈತರು ಸೋಮವಾರ ಮೊಳಹಳ್ಳಿ ಶಿವರಾವ್‌ ಮೆಮೋರಿಯಲ್‌ ಹಾಲ್‌ನಲ್ಲಿ ಸೇರಿದ್ದ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಯಿತು. ಕ್ಯಾಂಪ್ಕೋ ಅಧ್ಯಕ್ಷ ಬಿ. ನಾಗರಾಜ ಶೆಟ್ಟಿ ಮತ್ತು ಎಸ್‌. ಕೆ. ಡಿ. ಸಿ. ಸಿ ಬ್ಯಾಂಕ್‌ ಅಧ್ಯಕ್ಷ ಎಂ. ಎನ್‌. ರಾಜೇಂದ್ರ ಕುಮಾರ್‌ ಸಮಿತಿಯ ಗೌರವ ಸದಸ್ಯರಾಗಿರುತ್ತಾರೆ.

ಸೋಮವಾರದ ಸಭೆಯಲ್ಲಿ - ಉಭಯ ಜಿಲ್ಲೆಗಳಲ್ಲಿನ ಎಲ್ಲ ವಾಣಿಜ್ಯ ಬೆಳೆಗಳೂ ಸಮಸ್ಯೆಗಳೆನ್ನುದುರಿಸುತ್ತಿದ್ದು, ಜಿಲ್ಲೆಯ ಸಹಕಾರಿ ಸಂಘಗಳ ವ್ಯವಹಾರದ ಮೇಲೆ ತೀವ್ರ ಪರಿಣಾಮ ಬೀರಿರುವುದರ ಬಗ್ಗೆ ಚರ್ಚಿಸಲಾಯಿತು.

ಕ್ಯಾಂಪ್ಕೋದ ಸ್ಥಾಪಕಾಧ್ಯಕ್ಷ ವಾರಣಾಸಿ ಸುಬ್ರಾಯ ಭಟ್‌, ಕೆ. ಬಿ. ಮುನಿರಾಜ್‌ ಬಲ್ಲಾಳ್‌, ಬಿ. ನಿರಂಜನ, ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಯೋಜನೆಯ ಜಯಂತ ಶೆಟ್ಟಿ, ಡಾ. ವಿಘ್ನೕಶ್ವರ ವೆರ್ಮುಡಿ, ಜೀವಂಧರ್‌ ಕುಮಾರ್‌, ಭಾಸ್ಕರ್‌ ಕೋಟ್ಯಾನ್‌, ರಾಜಾರಾಮ್‌ ಭಟ್‌, ಎಂ. ಬಿ. ಸದಾಶಿವ, ಜಿಲ್ಲಾ ಹಾಲು ಒಕ್ಕೂಟದ ಅಧ್ಯಕ್ಷ ಎಸ್‌. ಸೀತಾರಾಮ್‌ ರೈ ಹಾಗೂ ಸಹಕಾರ ಸಂಘದ ಎನ್‌. ಎಸ್‌. ಗೋಖಲೆ ಸಮಿತಿಯಲ್ಲಿದ್ದಾರೆ.

(ಇನ್ಫೋ ವಾರ್ತೆ)