ಪ್ರಜಾಪ್ರಭುತ್ವಕ್ಕೆ ಜಯ ! ಮತ್ತೆಅಧಿಕಾರ ಸೂತ್ರ ಹಿಡಿದ ಲಲಿತಾ

ಚೆನ್ನೈ : ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಕುಮಾರಿ ಜಯಲಲಿತಾ ಅವರು, ಸೋಮವಾರ ಸಂಜೆ ಪ್ರಮಾಣ ವಚನ ಸ್ವೀಕರಿಸಿದರು. ರಾಜ್ಯಪಾಲರಾದ ಎಂ. ಫಾತಿಮಾ ಬೀವಿ ಅವರು ಪ್ರಮಾಣ ವಚನ ಹಾಗೂ ಅಧಿಕಾರದ ಗೌಪ್ಯತೆಯನ್ನು ಭೋದಿಸಿದರು.

ಚುನಾವಣೆಯ ಮತ ಎಣಿಕೆ ಮುಗಿದ ಮಾರನೆಯ ದಿನವೇ ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ ಮೊದಲಿಗರೆಂಬ ಖ್ಯಾತಿಗೂ ಜಯಾ ಪಾತ್ರರಾಗಿದ್ದಾರೆ. ಜಯಲಲಿತಾ ಅವರೊಂದಿಗೆ ಸೋಮವಾರ ತಂಬಿದೊರೈ, ಐಯಾರ್‌ ಪಾಂಡಿಯಾರ್‌, ಆರ್‌. ಸರೋಜಾ, ಜಯಕುಮಾರ್‌ ಹಾಗೂ ಪೊನ್ನೈಯನ್‌ ಅವರು ಸಚಿವರಾಗಿ ಅಧಿಕಾರದ ಪ್ರಮಾಣ ವಚನ ಸ್ವೀಕರಿಸಿದರು.

1982ರಲ್ಲಿ ರಾಜಕೀಯ ಕ್ಷೇತ್ರಕ್ಕೆ ಪದಾರ್ಪಣೆ ಮಾಡಿದ ಜಯಲಲಿತಾ, ಭ್ರಷ್ಟಾಚಾರದ ಆರೋಪದಲ್ಲಿ ಶಿಕ್ಷೆಗೆ ಗುರಿಯಾಗಿರುವ ಹಿನ್ನೆಲೆಯಲ್ಲಿ ಈ ಬಾರಿ ಚುನಾವಣೆಗೆ ಸ್ಪರ್ಧಿಸಲಾಗಿರಲಿಲ್ಲ. ಅವರ ನಾಮಪತ್ರವನ್ನು ತಿರಸ್ಕರಿಸಲಾಗಿತ್ತು. ಈಗ ಜಯಾ ಅವರು ಎರಡನೇ ಬಾರಿಗೆ ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡಿದ್ದು, ಪ್ರಜಾಪ್ರತಿನಿಧಿ ಕಾಯಿದೆಯ ರೀತ್ಯ ಇನ್ನಾರು ತಿಂಗಳ ಅವಧಿಯಲ್ಲಿ ಅವರು, ಶಾಸಕರಾಗಿ ಆಯ್ಕೆಯಾಗಲೇ ಬೇಕಾಗಿದೆ.

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...