‘ದೇಶದ ಮಿನಿ ಮಹಾ ಚುನಾವಣೆ’ : ಶೇ.65 ಮತ ಚಲಾವಣೆ

ತಿರುವನಂತಪುರಂ : ಕೇಂದ್ರಾಡಳಿತ ಪ್ರದೇಶವೊಂದು ಸೇರಿದಂತೆ ಐದು ರಾಜ್ಯಗಳಲ್ಲಿ ಗುರುವಾರ ನಡೆದ ವಿಧಾನಸಭೆ ಚುನಾವಣೆಯಲ್ಲಿ ಕೆಲವು ಅಹಿತಕರ ಘಟನೆಗಳನ್ನು ಹೊರತುಪಡಿಸಿದರೆ, ಮತದಾನ ಶಾಂತವಾಗಿದ್ದು ಅಂದಾಜು ಪ್ರತಿಶತ 65 ರಷ್ಟು ಮತ ಚಲಾವಣೆಯಾಗಿದೆ.

ತಮಿಳುನಾಡು (ಶೇ.60), ಕೇರಳ (ಶೇ.73), ಅಸ್ಸಾಂ (ಶೇ.65), ಪಶ್ಚಿಮ ಬಂಗಾಳ (ಶೇ.71) ಹಾಗೂ ಪಾಂಡಿಚೆರಿ (ಶೇ.65) ವಿಧಾನಸಭೆಗಳಿಗೆ ನಡೆದ ಮತದಾನ ದೇಶದ ಮಿನಿ ಮಹಾ ಚುನಾವಣೆ ಎಂದೇ ಬಣ್ಣಿಸಲಾಗಿದ್ದು , ಈ ಚುನಾವಣೆಯಲ್ಲಿ ನಡೆದ ಅಹಿತಕರ ಘಟನೆಗಳಲ್ಲಿ ನಾಲ್ವರು ಮೃತರಾಗಿದ್ದಾರೆ. ಅಸ್ಸಾಂನಲ್ಲಿ 6 ಜನ ಹಾಗೂ ಪಶ್ಚಿಮ ಬಂಗಾಳದಲ್ಲಿ 3 ಮಂದಿ ಚುನಾವಣಾ ಹಿಂಸಾಚಾರಕ್ಕೆ ಬಲಿಯಾಗಿದ್ದಾರೆ.

ಅಸ್ಸಾಂನ ಡಿಯಾಹರಿ ಎಂಬಲ್ಲಿ ನಡೆದ ಹಿಂಸಾಚಾರದಲ್ಲಿ ಕೇಂದ್ರ ಮೀಸಲು ಪಡೆಯ ಒಬ್ಬ ಸೈನಿಕ ಮೃತನಾಗಿದ್ದು , ಇತರ ಮೂವರು ಗಾಯಗೊಂಡಿದ್ದಾರೆ ಎಂದು ಗುವಾಹತಿ ವರದಿ ತಿಳಿಸಿದೆ. ಅಸ್ಸಾಂ ಹಾಗೂ ಪಶ್ಚಿಮ ಬಂಗಾಳಗಳಲ್ಲಿ ಮತಗಟ್ಟೆ ವಶ ಹಾಗೂ ರಿಗ್ಗಿಂಗ್‌ ಪ್ರಕರಣಗಳು ಕೆಲವೆಡೆ ದಾಖಲಾಗಿವೆ. ಪಶ್ಚಿಮಬಂಗಾಳದಲ್ಲಿ ನಡೆದ ಬಾಂಬ್‌ ದಾಳಿಯಲ್ಲಿ ದೂರದರ್ಶನದ ಓರ್ವ ಸಿಬ್ಬಂದಿ ಹಾಗೂ ಹುಡುಗಿಯಾಬ್ಬಳು ಗಾಯಗೊಂಡಿದ್ದಾರೆ.

ಭಾನುವಾರ (ಮೇ 13) ಬೆಳಿಗ್ಗೆ ಮತ ಎಣಿಕೆ ಕಾರ್ಯ ಆರಂಭವಾಗಲಿದ್ದು , ಸಂಜೆಯ ವೇಳೆಗೆ ಬಹುತೇಕ ಫಲಿತಾಂಶ ಹೊರಬೀಳುವ ನಿರೀಕ್ಷೆಯಿದೆ. ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಬುದ್ಧದೇವ ಭಟ್ಟಾಚಾರ್ಯ, ಅಸ್ಸಾಂ ಮುಖ್ಯಮಂತ್ರಿ ಪ್ರಫುಲ್ಲ ಕುಮಾರ್‌ ಮಹಂತಾ, ತಮಿಳುನಾಡಿನ ಮುಖ್ಯಮಂತ್ರಿ ಎಂ. ಕರುಣಾನಿಧಿ ಹಾಗೂ ಕೇರಳದ ಸಿಎಂಸಿ ಸದಸ್ಯ ಎ.ಕೆ. ಆಂಟನಿ ಅವರ ಭವಿಷ್ಯವನ್ನು ಭಾನುವಾರದ ಮತ ಎಣಿಕೆ ನಿರ್ಧರಿಸಲಿದೆ.

(ಇನ್ಫೋ ವಾರ್ತೆ)