ಮಲೆನಾಡಿನಲ್ಲೂ ಬಿಸಿಲೇ ಸುರಿಯುತ್ತಿದೆ

ಬೆಂಗಳೂರು : ಮಲೆನಾಡಿನ ರಾಜಧಾನಿ ಶಿವಮೊಗ್ಗದಲ್ಲೂ ರಣ ಬಿಸಿಲು. ಮನೆಯಲ್ಲಿ ಇರಲೂ ಆಗದು. ಹೊರಗೆ ಬಂದರಂತೂ ನೆತ್ತಿಯೇ ಸುಡುತ್ತದೆ. ಬಿಸಿಲು ಮುಖಕ್ಕೆ ರಾಚುತ್ತದೆ. ಪಶ್ಚಿಮಘಟ್ಟದ ಸೆರಗಿನಲ್ಲಿರುವ ಶಿವಮೊಗ್ಗ, ಭದ್ರಾವತಿಯ ಪರಿಸ್ಥಿತಿ ಹೀಗೇಕಾಯ್ತು? ಚಿರಾಪುಂಜಿಯ ನಂತರ ಅತಿ ಹೆಚ್ಚು ಮಳೆ ಬರುವ ಆಗುಂಬೆಯಲ್ಲೇ ಕಳೆದ 24 ಗಂಟೆಗಳ ಅವಧಿಯಲ್ಲಿ ಗರಿಷ್ಠ ತಾಪಮಾನ 30 ಡಿಗ್ರಿ ಮುಟ್ಟಿತ್ತು. ಅಲ್ಲಿಯೂ ಮಳೆಯ ಬದಲು ಬಿಸಿಲೇ ಸುರಿಯುತ್ತಿದೆ.

ರಾಜ್ಯಾದ್ಯಂತ ಬಿಸಿಲು ಈಗ ಬಹು ಅಗ್ಗವಾಗಿದೆ. ದಕ್ಷಿಣ ಒಳನಾಡಿನ ಅಲ್ಲಲ್ಲಿ ಮಾತ್ರ ಸಣ್ಣ ಮಳೆ ಆಗಿದೆ. ಬಾಳೆ ಹೊನ್ನೂರಿನಲ್ಲಿ 1 ಸೆಂಟಿ ಮೀಟರ್‌ ಮಳೆ ಬಿದ್ದಿದೆ. ಉತ್ತರ ಒಳನಾಡಿನ ಹಲವು ಕಡೆ ಗರಿಷ್ಠ ತಾಪಮಾನ ಏರಿದ್ದರೆ, ದಕ್ಷಿಣ ಒಳನಾಡು ಮತ್ತು ಕರಾವಳಿಯಲ್ಲಿ ಒಣಹವೆ ಇತ್ತು. ಹೆಚ್ಚಿನ ಬದಲಾವಣೆ ಏನೂ ಇರಲ್ಲಿಲ್ಲ.

ರಾಜ್ಯದ ಅತಿ ಹೆಚ್ಚು ತಾಪಮಾನ 43 ಡಿಗ್ರಿ ಸೆಲ್ಸಿಯಸ್‌ ಗುಲ್ಬರ್ಗಾದಲ್ಲಿತ್ತು. ಮುನ್ಸೂಚನೆಯ ಪ್ರಕಾರ ಮುಂದಿನ 48 ಗಂಟೆಗಳ ಅವಧಿಯಲ್ಲಿ ರಾಜ್ಯದ ಒಳನಾಡಿನ ಅಲ್ಲಲ್ಲಿ ಮಳೆ, ಗುಡುಗು ಸಹಿತ ಸುರಿ ಮಳೆ ಆಗುವ ಸಾಧ್ಯತೆ ಇದೆ. ಕರಾವಳಿಯಲ್ಲಿ ಒಣಹವೆಯೇ ಮುಂದುವರಿಯಲಿದೆ.

ಸ್ಥಳೀಯ ಹವಾಮಾನ ಮುನ್ಸೂಚನೆಯಂತೆ ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಭಾಗಶಃ ಮೋಡ ಕವಿದ ವಾತಾವರಣ ಇದ್ದು, ದಿನದ ಗರಿಷ್ಠ ಉಷ್ಣಾಂಶ 33 ಡಿಗ್ರಿ ಸೆಲ್ಸಿಯಸ್‌ ತಲುಪಲಿದೆ.