ಬೇಸಿಗೆ ಮಳೆಗವರು ಜೀವ ತೆತ್ತರು

ಬೆಂಗಳೂರಿನಲ್ಲಿ ಬಿಸಿಲು ದಿನೇ ದಿನೇ ಏರುತ್ತಿದ್ದಂತೆಯೇ ಧಾರವಾಡ ಹುಬ್ಬಳ್ಳಿಗಳಲ್ಲಿ ಮಳೆ ಧೋ ಅಂತ ಸುರಿದಿದೆ. ಸಿಡಿಲ ಆರ್ಭಟಕ್ಕೆ ಎರಡು ಜೀವಗಳು ಬಲಿಯಾದರೆ, ಅನೇಕ ಮಂದಿಯ ಮನೆಯ ಸೂರು ಕಿತ್ತುಕೊಂಡಿದೆ.

ದಾವಣಗೆರೆಯಲ್ಲಿ 30 ಮನೆಗಳು ಗೋಡೆ ಸಮೇತ ಕುಸಿದು ಬಿದ್ದಿವೆ. ಬಳ್ಳಾರಿಯಲ್ಲಿ ಮತ್ತೆ ಮೂರು ಮಂದಿ ಮಳೆಗೆ ಜೀವ ತೆತ್ತಿದ್ದಾರೆ.

ಇನ್ನೊಂದು ತಿಂಗಳವರೆಗೆ ಮಳೆ ಬರುವುದಿಲ್ಲ ಅಂತ ಹವಾಮಾನ ಇಲಾಖೆಯವರು ಹೇಳಿದ್ದು ಬರೀ ಬೆಂಗಳೂರಿಗೆ ಸಂಬಂಧಪಟ್ಟಂತೆ ಮಾತ್ರವೇನೊ. ಉತ್ತರ ಕರ್ನಾಟಕದಲ್ಲಿ ಮಾತ್ರ ಮಳೆ ಬರುತ್ತಿದೆ. ಕರಾವಳಿಯಲ್ಲಿಯೂ ಕೊಯಿಲು ಮಾಡುವವರನ್ನು ಬೆದರಿಸುತ್ತಿದೆ. ಬೆಂಗಳೂರು ಮಾತ್ರ ಮೋಡ ಮರೆಯಲ್ಲಿ ಬೇಯುತ್ತಿದೆ.

ಗುಲ್ಬರ್ಗಾದಲ್ಲಿ ಉಷ್ಣಾಂಶ 43 ಡಿಗ್ರಿಗೆ ಏರಿದೆ. ಬಹುಶಃ ಈ ಬೇಸಿಗೆಯಲ್ಲಿ ಪ್ರಥಮ ಬಾರಿಗೆ ಅಲ್ಲಿ ಬಿಸಿಲು ಹೀಗೂ ಏರುತ್ತಿರುವುದು. ತಂಪು ನಗರಿ ಬೆಂಗಳೂರಂತೂ ಕನಿಷ್ಠ ಉಷ್ಣತೆಯನ್ನು 23 ಕ್ಕೇರಿಸಿಕೊಂಡು ಸುಡುತ್ತಿದೆ. ಆಗಾಗ ಮುಸುಕುವ ಮೋಡ ಮಳೆಯ ನೆನಪಿಸುತ್ತಲೇ ಚದುರುತ್ತದೆ. ಬಿಸಿಲ ಕಿರಣಗಳು ನೆತ್ತಿ ಸುಡಲಾರಂಭಿಸುತ್ತಿರುವಂತೆಯೇ ಮತ್ತೆ ಮೋಡ... ಹೀಗೇ..