ಅವಳಿನಗರದಲ್ಲಿ ಭಾರೀ ಮಳೆ, ಸಿಡಿಲಬಡಿತಕ್ಕೆ ಇಬ್ಬರು ಬಲಿ

ಧಾರವಾಡ : ಅವಳಿನಗರಗಳಲ್ಲಿ ಶನಿವಾರ ಸಂಜೆ ಭಾರೀ ಮಳೆ ಸುರಿದಿದ್ದು , ಇಬ್ಬರು ವ್ಯಕ್ತಿಗಳು ಸಿಡಿಲ ಹೊಡೆತಕ್ಕೆ ಸಿಲುಕಿ ಸಾವನ್ನಪ್ಪಿದ್ದಾರೆ.

ಹುಬ್ಬಳ್ಳಿ ತಾಲ್ಲೂಕಿನ ಹಳ್ಯಾಳ ಗ್ರಾಮದಲ್ಲಿ ಕುರಿ ಮೇಯಿಸುತ್ತಿದ್ದ ಯಲ್ಲವ್ವ ಮಾರುತಿ ಕಾರಗೋಳ (25) ಹಾಗೂ ಧಾರವಾಡದ ತೇಜಸ್ವಿನಗರದ ರಾಮು ನಬೀಸಾಬ ತಡಕಲ್‌ (36) ಸಾವಿಗೀಡಾದ ದುರ್ದೈವಿಗಳು. ಹುಬ್ಬಳ್ಳಿ ಗ್ರಾಮೀಣ ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡಿದ್ದು , ತನಿಖೆ ನಡೆಸುತ್ತಿದ್ದಾರೆ. ಇಮ್ತಿಯಾಜ್‌ ಬಾಗಲಕೋಟೆ ಎನ್ನುವ ಮತ್ತೊಬ್ಬ ವ್ಯಕ್ತಿ ಗಾಯಗೊಂಡಿದ್ದಾನೆ.

ಧೋ ಎಂದು ಸುರಿದ ಆಲಿಕಲ್ಲು ಮಳೆಯಿಂದಾಗಿ ಧಾರವಾಡದ ಕೆಲ ಪ್ರದೇಶದ ಅಂಗಡಿ ಮುಂಗಟ್ಟುಗಳಿಗೆ ನೀರು ನುಗ್ಗಿದ್ದರೆ, ಕೆಲವು ಮನೆಗಳು ಕುಸಿದುಬಿದ್ದಿವೆ. ನಗರದಲ್ಲಿ ಭಾರೀ ಸಂಖ್ಯೆಯ ಮರಗಳು ಉರುಳಿಬಿದ್ದಿವೆ. ಕೆಲವು ರಸ್ತೆಗಳಲ್ಲಿ ಮರಗಳು ಉರುಳಿಬಿದ್ದುದರಿಂದ ಸಂಚಾರ ಅಸ್ತವ್ಯಸ್ತಗೊಂಡಿದೆ. ಈ ಎಲ್ಲಾ ಅನಾಹುತಗಳ ನಡುವೆ, ಧಾರಾಕಾರ ಮಳೆಯಿಂದಾಗಿ ನಗರದಲ್ಲಿ ಧಗೆ ಕಡಿಮೆಯಾಗಿದ್ದು , ತಾಪಮಾನ ಗಮನಾರ್ಹ ಪ್ರಮಾಣದಲ್ಲಿ ಕಡಿಮೆಯಾಗಿದೆ

(ಇನ್ಫೋ ವಾರ್ತೆ)