ಹೊಸ ವೈದ್ಯಕೀಯ ಕಾಲೇಜುಗಳ ಸ್ಥಾಪನೆಗೆಯುವ ವೈದ್ಯರ ವಿರೋಧ

ಗುಲ್ಬರ್ಗಾ : ಹೊಸ ವೈದ್ಯಕೀಯ ಕಾಲೇಜುಗಳಿಗೆ ಅನುಮತಿ ನೀಡುವ ಸರಕಾರದ ನಿರ್ಧಾರವನ್ನು ವಿರೋಧಿಸಿ ಗುಲ್ಬರ್ಗಾ ಯುವ ವೈದ್ಯರ ಸಂಘವು ಹೈ ಕೋರ್ಟಿನಲ್ಲಿ ರಿಟ್‌ ಅರ್ಜಿ ಸಲ್ಲಿಸಲು ನಿರ್ಧರಿಸಿದೆ.

ವೈದ್ಯರ ಸಂಘದ ಸಂಯೋಜಕ ಶಾಂತಕುಮಾರ್‌ ಮುರುಡ ಅವರು ಈ ವಿಷಯವನ್ನು ಶನಿವಾರ ಸುದ್ದಿಗಾರರಿಗೆ ತಿಳಿಸಿದರು. ಇಂಡಿಯನ್‌ ಮೆಡಿಕಲ್‌ ಅಸೋಸಿಯೇಷನ್‌ ಜೊತೆಗೆ ಮಾತುಕತೆ ನಡೆಸಿದ ನಂತರ ಕೋರ್ಟ್‌ಗೆ ಹೋಗುವ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಈಗಾಗಲೇ ರಾಜೀವ ಗಾಂಧಿ ಆರೋಗ್ಯ ವಿಜ್ಞಾನ ವಿಶ್ವವಿದ್ಯಾಲಯ ಮೂರು ವೈದ್ಯಕೀಯ ಕಾಲೇಜಿಗೆ ಮಾನ್ಯತೆ ನೀಡಿದೆ. ಯಾವ ಆಧಾರದ ಮೇಲೆ ಸರಕಾರವು ವೈದ್ಯಕೀಯ ಕಾಲೇಜುಗಳಿಗೆ ಅನುಮತಿ ನೀಡಿದೆ ಎಂಬುದು ತಿಳಿಯುತ್ತಿಲ್ಲ ಎಂದು ಶಾಂತಕುಮಾರ್‌ ಪ್ರಶ್ನಿಸಿದರು.

ಸರಕಾರದ ಈ ನಿರ್ಧಾರ ತೆಗೆದುಕೊಳ್ಳುವ ಮುಂಚೆ ಈ ಹಿಂದೆ ವೈದ್ಯಕೀಯ ಕಾಲೇಜುಗಳ ಆರಂಭದ ಬಗ್ಗೆ ಇತ್ತೀಚೆಗೆ ಸವದತ್ತಿ ಸಮಿತಿ ನೀಡಿದ ವರದಿಗಳನ್ನು ಪರಿಗಣಿಸುವ ಗೋಜಿಗೇ ಹೋಗಿಲ್ಲ ಎಂದು ಆಪಾದಿಸಿದ ಶಾಂತಕುಮಾರ್‌ ವಿಶ್ವದಲ್ಲಿ ಸುಮಾರು 1,400 ಮೆಡಿಕಲ್‌ ಕಾಲೇಜುಗಳಿದ್ದರೆ ಅವುಗಳಲ್ಲಿ ಶೇ. 12ರಷ್ಟು ನಮ್ಮ ದೇಶದಲ್ಲಿವೆ. ಅದರಲ್ಲಿ ಕರ್ನಾಟಕದ ಪಾಲು ಶೇ. 1.3 ಎಂದರು.

ಮುರಳೀಧರ್‌ ಕಮಿಟಿ ವರದಿಯಲ್ಲಿಯೂ 50 ಲಕ್ಷ ಜನಸಂಖ್ಯೆ ಇರುವ ಪ್ರದೇಶದಲ್ಲಿ 100 ಸೀಟುಗಳಿರುವ ಒಂದು ಮೆಡಿಕಲ್‌ ಕಾಲೇಜು ಇರಬೇಕು. ಆ ಲೆಕ್ಕ ಪ್ರಕಾರ ರಾಜ್ಯದಲ್ಲಿ ಕೇವಲ 12 ಕಾಲೇಜು ನಡೆಸಲು ಮಾತ್ರ ಅವಕಾಶವಿರುವುದು ಎಂದು ಅವರು ವಿವರಿಸಿದರು.

ಈ ಎಲ್ಲ ಕಾರಣಗಳನ್ನು ಮುಂದಿಟ್ಟುಕೊಂಡು ಯುವ ವೈದ್ಯರ ಸಂಘವು ಹೊಸ ಕಾಲೇಜುಗಳಿಗೆ ಅನುಮತಿ ನೀಡುತ್ತಿರುವುದನ್ನು ಕೋರ್ಟಿನಲ್ಲಿ ಪ್ರಶ್ನಿಸಲಿದೆ ಎಂದು ಶಾಂತಕುಮಾರ್‌ ಹೇಳಿದರು.

ಕಿರಿಯ ವೈದ್ಯರ ಸಂಘ ದ ವಿರೋಧ

ರಾಜ್ಯ ಸರಕಾರ ಇನ್ನಷ್ಟು ವೈದ್ಯಕೀಯ ಕಾಲೇಜುಗಳಿಗೆ ಅನಮತಿ ನೀಡಿರುವುದರಿಂದ ವೈದ್ಯಕೀಯ ಕ್ಷೇತ್ರದ ಸಮಸ್ಯೆಗಳಿಗೆ ಪರಿಹಾರ ಸಿಗುವುದಿಲ್ಲ. ಆದ್ದರಿಂದ ಸರಕಾರ ಹೊಸ ವೈದ್ಯಕೀಯ ಕಾಲೇಜುಗಳನ್ನು ಆರಂಭಿಸುವ ನಿರ್ಧಾರವನ್ನು ಹಿಂತೆಗೆದುಕೊಳ್ಳಬೇಕು ಎಂದು ರಾಜ್ಯ ಕಿರಿಯ ವೈದ್ಯರ ಸಂಘವು ಸರಕಾರವನ್ನು ಆಗ್ರಹಿಸಿದೆ.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...