ಬೆಂಗಳೂರಲ್ಲಿ ಮೆಟ್ರೋ ಬಸ್‌ ಸಂಚಾರಕ್ಕೆ ಸ್ವೀಡನ್‌ ನೆರವು

ಬೆಂಗಳೂರು : ಬೆಂಗಳೂರಿನಲ್ಲಿ 60 ಕಿ.ಮೀಟರ್‌ ಮಾರ್ಗದಲ್ಲಿ ಮೆಟ್ರೋ ಬಸ್‌ ಸಂಚಾರ ಆರಂಭಿಸಲು ಯೋಜನೆ ಸಿದ್ದವಾಗಿದ್ದು, ಈ ಸೌಲಭ್ಯ ಕಲ್ಪಿಸಲು ಸ್ವೀಡನ್‌ ನೆರವು ಪಡೆಯಲು ನಿರ್ಧರಿಸಲಾಗಿದೆ.

ನಗರದಲ್ಲಿ ಮೆಟ್ರೋ ಬಸ್‌ಸೌಲಭ್ಯ ಕಲ್ಪಿಸಲು ಅನುಕೂಲವಾಗುವಂತೆ ಸ್ವೀಡನ್‌ ಸರಕಾರಕ್ಕೆ ಪ್ರಸ್ತಾವನೆಯನ್ನು ಕೇಂದ್ರ ಸರಕಾರದ ಮೂಲಕ ಕಳುಹಿಸಲಾಗುವುದು ಎಂದು ರಾಜ್ಯ ಸಾರಿಗೆ ಸಚಿವ ಸಗೀರ್‌ ಅಹ್ಮದ್‌ ಭಾನುವಾರ ಇಲ್ಲಿ ಹೇಳಿದ್ದಾರೆ.

ಈ ಯೋಜನೆಗೆ ಸ್ವೀಡಿಷ್‌ ಅಂತಾರಾಷ್ಟ್ರೀಯ ಅಭಿವೃದ್ಧಿ ಪ್ರಾಧಿಕಾರ (ಸ್ವೀಡಾ) ಹಣಕಾಸು ಸಂಸ್ಥೆಗೆ ನೆರವು ನೀಡುವಂತೆ ಕೋರಲಾಗಿದೆ. ಸಂಸ್ಥೆ ಹಣಕಾಸು ನೆರವಿಗೆ ಒಪ್ಪಿಗೆ ನೀಡಿದ ನಂತರ ಯೋಜನೆಯನ್ನು ಕೈಗೆತ್ತಿಕೊಳ್ಳಲಾಗುವುದು ಎಂದು ಸಚಿವರು ಹೇಳಿದರು.

ಮೊದಲ ಹಂತದಲ್ಲಿ ಮೆಟ್ರೋ ಬಸ್‌ ಸಂಚಾರ ಬೆಂಗಳೂರಿನ ಜಯನಗರ - ಶಿವಾಜಿನಗರ ನಡುವೆ ಸಂಚಾರ ಆರಂಭಿಸಲಿದೆ. ಈ ಯೋಜನೆಗೆ ಸುಮಾರು 40 ಕೋಟಿ ರುಪಾಯಿ ಆಗಲಿದೆ ಎಂದೂ ಸಚಿವರು ಹೇಳಿದರು. ನಗರಕ್ಕೆ ಆಗಮಿಸಿರುವ ಅಧ್ಯಯನ ತಂಡ ಯೋಜನೆಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದೆ, ತಂಡ ಅಂತಿಮ ವರದಿ ನೀಡಿದ ಬಳಿಕ ಸ್ವೀಡಾ ಆರ್ಥಿಕ ನೆರವಿನ ಬಗ್ಗೆ ನಿರ್ಧಾರ ಕೈಗೊಳ್ಳಲಿದೆ ಎಂದರು.

ಸ್ವೀಡನ್‌ನ ಅಧ್ಯಯನ ತಂಡ ನೀಡಿದ ವರದಿ ಸ್ವೀಕರಿಸಿದ ನಂತರ ಮಾಧ್ಯಮ ಪ್ರತಿನಿಧಿಗಳಿಗೆ ವಿವರ ನೀಡಿದ ಸಚಿವರು, ಉದ್ದೇಶಿತ ಯೋಜನೆಯು ನಾಲ್ಕು ಹಂತಗಳಲ್ಲಿ ಜಾರಿಗೆ ತರಲು ನಿರ್ಧರಿಸಲಾಗಿದೆ ಎಂದು ಹೇಳಿದರು. ಮೊದಲ ಹಂತದ ಯೋಜನೆಗೆ ಸ್ವೀಡಾ ಹಣಕಾಸು ನೆರವು ನೀಡುತ್ತದೆ ಎಂಬ ಆಶಾಭಾವನೆ ವ್ಯಕ್ತಪಡಿಸಿದರು.