15 ವರ್ಷಗಳಿಗೂ ಹಳೆಯ ವಾಹನಗಳ ಸಂಚಾರಕೂಡದು- ಹೈಕೋರ್ಟ್‌

ಬೆಂಗಳೂರು : ಇನ್ನು ಮುಂದೆ 15 ವರ್ಷಕ್ಕೂ ಹಳೆಯದಾದ ವಾಹನಗಳು ರಸ್ತೆ ಮೇಲೆ ಓಡಾಡುವಂತಿಲ್ಲ. ಈ ಕುರಿತಂತೆ ರಾಜ್ಯ ಹೈಕೋರ್ಟ್‌ ಸರ್ಕಾರಕ್ಕೆ ನೋಟಿಸ್‌ ಜಾರಿಗೊಳಿಸಲು ಮಂಗಳವಾರ ನಿರ್ಧರಿಸಿದೆ.

ಓಬಿರಾಯನ ಕಾಲದ ಮೋಟಾರು ಗಾಡಿಗಳು ರಸ್ತೆಯ ಮೇಲೆ ಸಂಚರಿಸುತ್ತಾ ಕಂಡಾಪಟ್ಟೆ ಹೊಗೆಯುಗುಳುತ್ತಿವೆ. ಇದರಿಂದ ಪರಿಸರ ಅಧ್ವಾನವಾಗುತ್ತಿದೆ. ಈ ಕಾರಣ 15 ವರ್ಷಗಳಿಗೂ ಹಳೆಯದಾಗಿರುವ ವಾಹನಗಳ ಸಂಚಾರ ನಿಷೇಧಿಸುವಂತೆ ಸರ್ಕಾರಕ್ಕೆ ಆದೇಶ ಜಾರಿಗೊಳಿಸಬೇಕು ಎಂದು ವಕೀಲ ಎಂ.ಜಿ. ಕುಮಾರ್‌ ಹೈಕೋರ್ಟ್‌ಗೆ ರಿಟ್‌ ಅರ್ಜಿ ಸಲ್ಲಿಸಿದ್ದರು.

ನ್ಯಾಯಮೂರ್ತಿ ಪಿ.ವಿ.ರೆಡ್ಡಿ ಹಾಗೂ ನ್ಯಾಯಮೂರ್ತಿ ಎನ್‌.ಕೆ.ಪಾಟೀಲ್‌ ಅವರನ್ನೊಳಗೊಂಡ ವಿಭಾಗೀಯ ಪೀಠ ಈ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆಯನ್ನು ಕೈಗೆತ್ತಿಕೊಂಡಿದ್ದು, ಸರ್ಕಾರ ಸೇರಿದಂತೆ ಪ್ರತಿವಾದಿಗಳಿಗೆ ನೋಟಿಸ್‌ ಜಾರಿಗೊಳಿಸಲು ಆದೇಶಿಸಿ, ವಿಚಾರಣೆಯನ್ನು ಮುಂದೂಡಿದೆ.

(ಇನ್ಫೋ ವಾರ್ತೆ)