ಜುಲೈನಿಂದ ಕೊಲ್ಲಿ ರಾಷ್ಟ್ರಗಳಲ್ಲಿ ಮೈಸೂರು ವಿವಿ ಮಾನ್ಯತಾ ಕೋರ್ಸ್‌

ಮೈಸೂರು : ಅಬುಧಾಬಿ, ದುಬೈ ಹಾಗೂ ಷಾರ್ಜಾಗಳಲ್ಲಿ ಮೈಸೂರು ವಿಶ್ವವಿದ್ಯಾಲಯದ ಮಾನ್ಯತೆ ಪಡೆದ ಹೊಸ ಕೋರ್ಸುಗಳು ಬರುವ ಜುಲೈನಲ್ಲಿ ಪ್ರಾರಂಭವಾಗಲಿವೆ.

ನಾಲ್ಕು ವರ್ಷಗಳ ಅವಧಿಯ ಕಂಪ್ಯೂಟರ್‌ ಕೋರ್ಸ್‌, ಹೊಟೇಲ್‌ ಮ್ಯಾನೆಜ್‌ಮೆಂಟ್‌ ಹಾಗೂ ಬಿಬಿಎಂ ತರಗತಿಗಳನ್ನು ಇಂಡಿಯನ್‌ ಸ್ಕೂಲ್ಸ್‌ ನಡೆಸುವ ಸಂಸ್ಥೆಗಳಲ್ಲಿ ಶುರು ಮಾಡಲಾಗುವುದು ಎಂದು ಮೈಸೂರು ವಿವಿ ಕುಲಪತಿ ಪ್ರೊ. ಎಸ್‌.ಎನ್‌. ಹೆಗ್ಡೆ ಮಂಗಳವಾರ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಈ ಕಾಲೇಜುಗಳಲ್ಲಿ ಶುರುಮಾಡಲಾಗುವ ಕೋರ್ಸುಗಳಿಗೆ ವಿವಿ ಸಂಯೋಜನೆ ಕೊಡುವುದಿಲ್ಲ. ಆದರೆ ಮಾನ್ಯತೆ ನೀಡಲಿದೆ. ಇಂಡಿಯನ್‌ ಸ್ಕೂಲ್ಸ್‌ ನಡೆಸುವ ಶಿಕ್ಷಣ ಸಂಸ್ಥೆಗಳು ಉತ್ತಮ ಮೂಲಭೂತ ಸೌಕರ್ಯಗಳನ್ನು ಹೊಂದಿದ್ದು, ಕೋರ್ಸುಗಳಿಗೆ ತಗಲುವ ವೆಚ್ಚವನ್ನು ಆಯಾ ಕಾಲೇಜುಗಳೇ ಭರಿಸಲಿವೆ. ಜೂನ್‌ 21ರ ನಂತರ ಉನ್ನತ ಶಿಕ್ಷಣ ಸಚಿವ ಡಾ.ಪರಮೇಶ್ವರ್‌, ಸಿಂಡಿಕೇಟ್‌ನ ಹಿರಿಯ ಸದಸ್ಯರು ಹಾಗೂ ತಮ್ಮನ್ನು ಒಳಗೊಂಡ ನಿಯೋಗ ಕೊಲ್ಲಿ ರಾಷ್ಟ್ರಗಳಿಗೆ ಪ್ರವಾಸ ಬೆಳೆಸಲಿದೆ ಎಂದು ಹೆಗ್ಡೆ ವಿವರಿಸಿದರು.

ಕುವೈತ್‌ನ ಕಾಲೇಜೊಂದರಲ್ಲೂ ಇದೇ ರೀತಿಯ ಕೋರ್ಸ್‌ಗಳನ್ನು ಪ್ರಾರಂಭಿಸಬೇಕೆಂಬ ಪ್ರಸ್ತಾವನೆ ಬಂದಿದ್ದು, ಈ ಬಗ್ಗೆ ಪರಿಶೀಲಿಸಲಾಗುತ್ತಿದೆ ಎಂದರು.

(ಇನ್ಫೋ ವಾರ್ತೆ)