ಹುಟ್ಟೂರು ಹೊಸೂರಿಗೆ ಹೂವು ತಂದ ಎಚ್‌. ನರಸಿಂಹಯ್ಯ

ಗೌರಿಬಿದನೂರು : ಹಿರಿಯ ಶಿಕ್ಷಣ ತಜ್ಞ ಎಚ್‌. ನರಸಿಂಹಯ್ಯ ಅವರ ಹುಟ್ಟೂರೀಗ ಅಭಿವೃದ್ಧಿಯ ಪಥದಲ್ಲಿ ಕಾಲಿರಿಸಿದೆ. ಕೋಲಾರ ಜಿಲ್ಲೆಯ ಗೌರಿಬಿದನೂರು ತಾಲ್ಲೂಕಿನ ಹೊಸೂರು ಎಚ್ಚೆನ್‌ ಅವರ ಹುಟ್ಟೂರು. ರಾಜ್ಯದಲ್ಲಿ ಭೂಕಂಪಮಾಪನ ಕೇಂದ್ರವನ್ನು ಹೊಂದಿರುವ ಅಗ್ಗಳಿಕೆಯ ಈ ಊರಿನಲ್ಲಿ ಎದ್ದು ಕಾಣುವ ಮತ್ತೊಂದು ಕಟ್ಟಡ ಎಚ್ಚೆನ್‌ ಸ್ಥಾಪಿಸಿದ ನ್ಯಾಷನಲ್‌ ಕಾಲೇಜು. ಉಳಿದಂತೆ, ಅದೇ ಬೆಂದ ನೆಲ, ಕಣ್ಣು ಹಾಯಿಸಿದಷ್ಟು ಜಾಲಿಗಿಡಗಳು, ಆಕಾಶ ನೋಡುವ ರೈತರು.

ಹುಟ್ಟಿ ಬೆಳೆದ ಊರಿಗಾಗಿ ಏನನ್ನಾದರೂ ಮಾಡುವ ಹಂಬಲ ಬೆಂಗಳೂರಿನಲ್ಲಿರುವ ಎಚ್ಚೆನ್‌ಗೆ. ಆ ಕಾರಣಕ್ಕಾಗಿಯೇ, ಹೊಸೂರಿನ ಅಭಿವೃದ್ಧಿಗಾಗಿ ಅವರು ಟೊಂಕ ಕಟ್ಟಿದ್ದಾರೆ. ಸರ್ಕಾರದ ಸ್ವಸ್ತಿ ಗ್ರಾಮ ಯೋಜನೆಯಲ್ಲಿ ಹೊಸೂರು ಸಿಂಗರಗೊಳ್ಳಲಿದೆ. ಶುಕ್ರವಾರದಿಂದ ಯೋಜನೆಗೆ ಚಾಲನೆ. ಅಂದಹಾಗೆ, ಸ್ವಸ್ತಿಗ್ರಾಮ ಯೋಜನೆಗೆ ಆಯ್ಕೆಯಾಗಿರುವ ರಾಜ್ಯದ ಪ್ರಥಮ ಗ್ರಾಮ ಹೊಸೂರು.

ಒಂದು ಕೋಟಿ ರುಪಾಯಿ ವೆಚ್ಚದಲ್ಲಿ ಹೊಸೂರಿನಲ್ಲಿ ಅಭಿವೃದ್ಧಿ ಕಾಮಗಾರಿಗಳು ನಡೆಯಲಿವೆ. ಸಂಸದರಾದ ರಾಮಕೃಷ್ಣ ಹೆಗಡೆ, ಜಾಲಪ್ಪ , ರೆಹಮಾನ್‌ ಖಾನ್‌ ಮುಂತಾದವರ ನಿಧಿಯಿಂದ 50 ಲಕ್ಷ ರುಪಾಯಿಗಳನ್ನು ಗ್ರಾಮದ ಅಭಿವೃದ್ಧಿಗಾಗಿ ಸಂಗ್ರಹಿಸಲಾಗಿದೆ. ಉಳಿದ 50 ಲಕ್ಷ ರುಪಾಯಿಗಳನ್ನು ಜಿಲ್ಲಾ ಪಂಚಾಯಿತಿ ಭರಿಸಲಿದೆ. ಇದರಿಂದಾಗಿ ಗ್ರಾಮ ಸಂಪೂರ್ಣ ಮೂಲಭೂತ ಸೌಕರ್ಯಗಳನ್ನು ಹೊಂದಲಿದೆ.

(ಇನ್ಫೋ ವಾರ್ತೆ)