ಘಟಪ್ರಭ ನದಿಗೆ ಕಟ್ಟಿರುವ ಬ್ಯಾರೇಜ್‌ ಶುಕ್ರವಾರ ಉದ್ಘಾಟನೆ

ಬಿಜಾಪುರ : ಮುಧೋಳ ತಾಲೂಕಿನ ಇಂಗಳಗಿ ಗ್ರಾಮದ ಬಳಿ ಘಟಪ್ರಭಾ ನದಿಗೆ ಅಡ್ಡಲಾಗಿ ಕಟ್ಟಲಾಗಿರುವ ಬ್ಯಾರೇಜ್‌ನ ಉದ್ಘಾಟನೆ ಏ. 13ರ ಶುಭ ಶುಕ್ರವಾರ ನೆರವೇರಲಿದೆ. ಮಾಜಿ ಮುಖ್ಯಮಂತ್ರಿ ಎಸ್‌. ಬಂಗಾರಪ್ಪ ಅವರು ಈ ಬ್ಯಾರೇಜ್‌ ಉದ್ಘಾಟಿಸುತ್ತಿದ್ದು, ಸಣ್ಣ ನೀರಾವರಿ ಸಚಿವ ಕುಮಾರ್‌ ಬಂಗಾರಪ್ಪ ಗಂಗಾಪೂಜೆ ಮಾಡಲಿದ್ದಾರೆ.

ಬ್ಯಾರೇಜ್‌ನ ಫಲಾನುಭವಿಗಳಾದ ನೀರು ಬಳಕೆದಾರ ರೈತರ ಸಂಘ ಹಾಗೂ ಇಂಗಳಗಿ - ಚಿಚಖಂಡಿ ಕೂಡು ರಸ್ತೆಗಳ ಉದ್ಘಾಟನೆಯೂ ಈ ಸಂದರ್ಭದಲ್ಲಿ ನೆರವೇರಲಿದ್ದು, ನಗರಾಭಿವೃದ್ಧಿ ಸಚಿವ ಬಿ.ಬಿ. ಚಿಮ್ಮನಕಟ್ಟಿ ಹಾಗೂ ಮಾಜಿ ಕೇಂದ್ರ ಸಚಿವ ಸಿದ್ಧು ನ್ಯಾಮಗೌಡ ಅನುಕ್ರಮವಾಗಿ ಸಂಘ ಹಾಗೂ ರಸ್ತೆಯ ಉದ್ಘಾಟನೆ ಮಾಡಲಿದ್ದಾರೆ.

ಕೃಷಿ ಮಾರುಕಟ್ಟೆ ಸಚಿವ ಆರ್‌.ಬಿ. ತಿಮ್ಮಾಪೂರ್‌ ಅವರ ಅಧ್ಯಕ್ಷತೆಯಲ್ಲಿ ನಡೆಯುವ ಕಾರ್ಯಕ್ರಮದಲ್ಲಿ ಕನ್ನಡ ನಾಡ ದೇವಿ ಶ್ರೀ ಭುವನೇಶ್ವರಿಯ ಪುತ್ಥಳಿಯನ್ನು ಸಣ್ಣ ಕೈಗಾರಿಕಾ ಸಚಿವ ಕಾಶಪ್ಪನವರ್‌ ಅನಾವರಣ ಮಾಡುತ್ತಾರೆ. ಗದಗ ತೋಂಟದಾರ್ಯ ಮಠದ ಶ್ರೀ ಸಿದ್ಧಲಿಂಗ ಮಹಾಸ್ವಾಮಿಗಳು, ಶಾಸಕ ಕಲೂತಿ, ವಿಧಾನ ಪರಿಷತ್‌ ಸದಸ್ಯ ಎಸ್‌.ಆರ್‌. ಪಾಟೀಲ್‌, ಡಾ. ಎಂ.ಪಿ. ನಾಡಗೌಡ, ಸಂಸತ್‌ ಸದಸ್ಯ ಆರ್‌.ಎಸ್‌. ಪಾಟೀಲ್‌ ಮೊದಲಾದವರು ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ ಎಂದು ಸಣ್ಣ ನೀರಾವರಿ ಇಲಾಖೆಯ ಅಸಿಸ್ಟೆಂಟ್‌ ಎಕ್ಸಿಕ್ಯೂಟಿವ್‌ ಎಂಜಿನಿಯರ್‌ ಪಿ.ಬಿ. ಕಗಲಗೊಂಬ ಅವರು ತಿಳಿಸಿದ್ದಾರೆ.

(ಬಿಜಾಪುರ ಜಿಲ್ಲಾ ಪ್ರತಿನಿಧಿಯಿಂದ)