ದುಡಿವ ಮಕ್ಕಳ ವಿಮೋಚನೆ ವೇದಿಕೆಗೆ ಸ್ವಿಡ್ಜರ್ಲೆಂಡ್ ಸಂಸ್ಥೆ ನೆರವು
ಹಾವೇರಿ : ಬಡಮಕ್ಕಳ ಅಭಿವೃದ್ಧಿಗೆ ನೆರವಾಗುತ್ತಿರುವ ಸ್ವಿಡ್ಜರ್ಲೆಂಡ್ನ ಸರಕಾರೇತರ ಸಂಸ್ಥೆಯಾದ ಸ್ಕಿಪ್ ಬಾಲಕಾರ್ಮಿಕರ ಸ್ಥಿತಿ ಸುಧಾರಿಸುವ ಸಂಘಟನೆಯಾದ ದುಡಿಯುವ ಮಕ್ಕಳ ವಿಮೋಚನಾ ವೇದಿಕೆಗೆ ಹಣಕಾಸಿನ ನೆರವು ನೀಡಲಿದೆ ಎಂದು ಸ್ವಯಂ ಸೇವಾ ಸಂಸ್ಥೆ ಟಿ.ಆರ್.ಡಿ.ಸಿ. ಮಾರ್ಗ್ ನಿರ್ದೇಶಕ ಡಾ. ಅನಿಲ್ ಛಬ್ಬಿ ಇಲ್ಲಿ ತಿಳಿಸಿದ್ದಾರೆ.
ಟಿ.ಆರ್.ಡಿ.ಸಿ. ಏರ್ಪಡಿಸಿದ್ದ ಬಾಲಕಾರ್ಮಿಕರ ಸ್ಥಿತಿಗತಿ ಕುರಿತ ಚರ್ಚೆ ಕಾರ್ಯಕ್ರಮದಲ್ಲಿ ಸ್ಕಿಪ್ನ ಪ್ರತಿನಿಧಿಗಳಾದ ಫ್ರಾನ್ಸೋ ಮತ್ತು ಶರ್ಲಿ ಅವರ ಜತೆ ಭಾಗವಹಿಸಿದ್ದ ಛಬ್ಬಿ ಅವರು ಈ ವಿಷಯ ತಿಳಿಸಿದರು. ಟಿ.ಆರ್.ಡಿ.ಸಿ.ಯು ದುಡಿಯುವ ಮಕ್ಕಳಿಗಾಗಿ 20ಕ್ಕೂ ಹೆಚ್ಚು ರಾತ್ರಿ ಶಾಲೆಗಳನ್ನು ನಡೆಸುತ್ತಿದೆ. ಈ ಶಾಲೆಗಳಲ್ಲಿ 350ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ ಎಂದೂ ತಿಳಿಸಿದರು.
ಸರಕಾರೇತರ ಸಂಸ್ಥೆಯಾದ ಸ್ಕಿಪ್ ವಿವಿಧ ರಾಷ್ಟ್ರಗಳ ಬಡ ಮಕ್ಕಳ ಅಭಿವೃದ್ಧಿಗಾಗಿ ದುಡಿಯುತ್ತಿದೆ ಎಂದು ಸಂಸ್ಥೆಯ ಪ್ರತಿನಿಧಿ ಫ್ರಾನ್ಸೋ ತಿಳಿಸಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಸ್ಕಿಪ್ನ ಭಾರತೀಯ ಪ್ರತಿನಿಧಿ ಶರ್ಲಿ ಅವರು, ಯಾವುದೇ ಸಂಘಟನೆ ಇಲ್ಲದೆ, ಹೋರಾಟದ ಅರಿವೂ ಇಲ್ಲದೆ, ಮೂಗೆತ್ತುಗಳಂತೆ ದುಡಿಯುತ್ತಿರುವ ದುಡಿವ ಮಕ್ಕಳಿಗೆ ಪುನರ್ವಸತಿ ಕಲ್ಪಿಸಿ, ಅವರನ್ನು ಭವಿಷ್ಯದ ಪ್ರಜೆಗಳನ್ನಾಗಿ ರೂಪಿಸುವ ಹೊಣೆ ಎಲ್ಲ ಸಮಾಜ ಸೇವಾ ಸಂಸ್ಥೆ ಹಾಗೂ ನಾಗರಿಕರ ಮೇಲಿದೆ ಎಂದರು. ಕಾರ್ಯಕ್ರಮದಲ್ಲಿ ಹಲವು ಸಂಘ ಸಂಸ್ಥೆಗಳ ಪ್ರತಿನಿಧಿಗಳು ಭಾಗವಹಿಸಿದ್ದರು.