ಕರ್ನಾಟಕ ಬ್ಯಾಂಕ್‌ : 9093 ಕೋಟಿ ರುಪಾಯಿ ವಹಿವಾಟು

ಮಂಗಳೂರು : ನಗರ ಮೂಲದ ಖಾಸಗಿ ವಲಯದ ಕರ್ನಾಟಕ ಬ್ಯಾಂಕ್‌ ಲಿಮಿಟೆಡ್‌ 2000- 2001ನೇ ಸಾಲಿನಲ್ಲಿ 9 ಸಾವಿರದ 93 ಕೋಟಿ ರುಪಾಯಿ ವಹಿವಾಟು ನಡೆಸಿದ್ದು, ತನ್ನ ವ್ಯವಹಾರದಲ್ಲಿ ಪ್ರತಿಶತ 19 ರಷ್ಟು ಹೆಚ್ಚಳ ದಾಖಲಿಸಿದೆ.

ಮಂಗಳವಾರ ತಮ್ಮ ಬ್ಯಾಂಕಿನ ಸಿಬ್ಬಂದಿಯ ಸಮ್ಮುಖದಲ್ಲಿ 2000- 2001 ವಾರ್ಷಿಕ ವರದಿ ವಿವರಿಸುತ್ತಾ ಬ್ಯಾಂಕಿನ ಅಧ್ಯಕ್ಷ ಅನಂತಕೃಷ್ಣ ಈ ವಿಷಯ ತಿಳಿಸಿದರು. ಬ್ಯಾಂಕಿನ ಠೇವಣಿ ಮೊತ್ತದಲ್ಲಿ ಶೇ. 17ರಷ್ಟು ಹೆಚ್ಚಳವಾಗಿದ್ದು , 6 ಸಾವಿರ ಕೋಟಿ ರುಪಾಯಿ ಒಟ್ಟು ಠೇವಣಿ ಜಮೆಯಾಗಿದೆ. ಉಳಿದಂತೆ 3033 ರುಪಾಯಿ ಮುನ್ನಾ ಸಂದಾಯವಾಗಬೇಕಿದ್ದ ಮೊತ್ತ ಬಂದು ಸೇರಿದೆ ಎಂದು ಅನಂತಕೃಷ್ಣ ಹೇಳಿದರು.

ಬೆಂಗಳೂರಲ್ಲಿ ತನ್ನ ಕೇಂದ್ರ ಕಚೇರಿಯನ್ನು ಬ್ಯಾಂಕ್‌ ಹೊಂದಿದ್ದು, ಮುಂಬಯಿ, ಚೆನ್ನೈ ಹಾಗೂ ಮಂಗಳೂರಲ್ಲೂ ಕೇಂದ್ರಗಳನ್ನು ವಿಸ್ತರಿಸುವುದಾಗಿ ಅವರು ತಿಳಿಸಿದರು. ಠೇವಣಿ ಮೊತ್ತ ಸಂಗ್ರಹಣೆಯಲ್ಲಿ ನಮ್ಮ ಗುರಿ ಇದ್ದದ್ದು 7 ಸಾವಿರದ 250 ಕೋಟಿ ರುಪಾಯಿ. ಅದಕ್ಕಿಂತ ಹೆಚ್ಚಿನದನ್ನು ಸಾಧಿಸಿದ್ದೇವೆ. ಕಳೆದ ವರ್ಷ ಕಾರ್ಯತಂತ್ರಾಭಿವೃದ್ಧಿ ಕೇಂದ್ರಗಳಲ್ಲಿ 8 ಹೊಸ ಶಾಖೆಗಳನ್ನು ತೆರೆದಿದ್ದೆವು. ಈಗಿನ ವಿತ್ತ ವರ್ಷದಲ್ಲಿ 11 ಹೊಸ ಶಾಖೆಗಳನ್ನು ತೆರೆಯುವ ಉದ್ದಿಶ್ಯವಿದೆ. ಇದು ಪೂರ್ಣ ಸಾಧ್ಯವಾದ ನಂತರ ಬ್ಯಾಂಕು ಒಟ್ಟು 365 ಶಾಖೆಗಳನ್ನು ಹೊಂದಲಿದೆ ಎಂದು ಅನಂತಕೃಷ್ಣ ವಿವರಿಸಿದರು.

(ಯುಎನ್‌ಐ)