ಹೇಡನ್‌, ವಾರ್ಕ್‌ ವಾ, ಮೆಕ್‌ಗ್ರಾತ್‌ಶನಿವಾರ ಆಡುತ್ತಿಲ್ಲ

ಇಂದೋರ್‌ : ಮೊನ್ನೆ ಮುಗಿದ ಟೆಸ್ಟ್‌ನಲ್ಲಿ ಅತಿ ಹೆಚ್ಚು ರನ್‌ ಗಳಿಸಿ ಸೀಮಿತ ಓವರ್‌ ಪಂದ್ಯಗಳಲ್ಲೂ ಸ್ಥಾನ ಗಿಟ್ಟಿಸಿದ ಮ್ಯಾಥ್ಯೂ ಹೇಡನ್‌, ಭರವಸೆಯ ವೇಗಿ ಮೆಕ್‌ಗ್ರಾತ್‌ ಹಾಗೂ ಪುಣೆ ಪಂದ್ಯದಲ್ಲಿ ಉತ್ತಮ ಶತಕ ಬಾರಿಸಿದ್ದ ಮಾರ್ಕ್‌ ವಾ ಇಂದೋರ್‌ನಲ್ಲಿ ಶನಿವಾರ ನಡೆಯಲಿರುವ ಭಾರತದ ವಿರುದ್ಧದ ಒನ್‌ಡೇ ಪಂದ್ಯದಲ್ಲಿ ಆಡುತ್ತಿಲ್ಲ. ಶುಕ್ರವಾರ ಆಸ್ಟ್ರೇಲಿಯಾ ತಂಡ ಮಾಧ್ಯಮಗಳಿಗೆ ಈ ಪ್ರಕಟಣೆಯನ್ನು ಬಿಡುಗಡೆ ಮಾಡಿದೆ.

ಫಾರ್ಮ್‌ ಕಂಡುಕೊಂಡಿರುವ ಮಾರ್ಕ್‌ ವಾ ಪುಣೆ ಪಂದ್ಯದಲ್ಲಿ ಗಾಯಗೊಂಡಿದ್ದಾರೆ ಕೂಡ. ಹೇಡನ್‌ ಹಾಗೂ ಮೆಕ್‌ಗ್ರಾತ್‌ ಅವರು ಸಮರ್ಥರಾಗಿದ್ದರೂ, ಸರದಿ ಪದ್ಧತಿಯ ಮೇರೆಗೆ ಬೇರೆ ಆಟಗಾರರಿಗೆ ಅವಕಾಶ ನೀಡಿ, ಇವರಿಗೆ ವಿಶ್ರಾಂತಿ ಕೊಡಲು ನಿರ್ಧರಿಸಲಾಗಿದೆ. ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಆಸ್ಟ್ರೇಲಿಯಾ ತಂಡದ ಉಪ ನಾಯಕ ಗಿಲ್‌ಕ್ರಿಸ್ಟ್‌ ಈ ವಿಷಯ ತಿಳಿಸಿದರು. ಶನಿವಾರದ ಪಂದ್ಯದಲ್ಲಿ ತಾವೇ ಆರಂಭಿಕ ಆಟಗಾರರಾಗಿ ಆಡುವುದಾಗಿ ಅವರು ಹೇಳಿದರು.

ಈ ಮೂವರು ದಿಗ್ಗಜರ ಅನುಪಸ್ಥಿತಿಯಲ್ಲಿ ಭಾರತಕ್ಕೆ ಸರಣಿಯಲ್ಲಿ ಗೆಲುವಿನ ಅಂತರ ಹೆಚ್ಚಿಸಿಕೊಳ್ಳುವ ಉತ್ತಮ ಅವಕಾಶವಿದೆ. ಮೆಕ್‌ಗ್ರಾತ್‌ ಚೆಂಡುಗಳನ್ನು ಕಳೆದೆರಡೂ ಪಂದ್ಯಗಳಿಂದ ಚಚ್ಚಿರುವ ತೆಂಡೂಲ್ಕರ್‌ಗೆ ಈ ಸುದ್ದಿಯಿಂದ ನಿರಾಸೆಯಾಗಿದ್ದರೂ ಅಚ್ಚರಿಯಿಲ್ಲ.

(ಇನ್ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...