ಮಹಾದಾಯಿಯಿಂದ ಮಲಪ್ರಭಾಗೆ ನೀರು ಹರಿಯೋದು ಅನುಮಾನ

ಬೆಂಗಳೂರು : ಮಹಾದಾಯಿ ನದಿಯಿಂದ ಮಲಪ್ರಭಾಗೆ ನೀರು ಹರಿಸಲು ಗೋವಾ ಸರ್ಕಾರ ಸಹಕಾರ ನೀಡದಿದ್ದಲ್ಲಿ, ರೈತರ ಹಿತಾಸಕ್ತಿ ರಕ್ಷಿಸಲು ಪರ್ಯಾಯ ಯೋಜನೆಗಳನ್ನು ಸರ್ಕಾರ ಸಿದ್ಧ ಮಾಡಿಟ್ಟುಕೊಂಡಿದೆ.

ಮಂಗಳವಾರ ವಿಧಾನಸಭೆಯ ಪ್ರಶ್ನೋತ್ತರ ವೇಳೆಯಲ್ಲಿ ರಾಜ್ಯ ಭಾರೀ ಮತ್ತು ಮಧ್ಯಮ ನೀರಾವರಿ ಸಚಿವ ಎಚ್‌.ಕೆ.ಪಾಟೀಲ್‌ ಪ್ರಶ್ನೆಗಳಿಗೆ ಉತ್ತರಿಸುತ್ತಾ ಈ ವಿಷಯ ತಿಳಿಸಿದರು. ಗೋವಾದ ಅಧಿಕಾರಿಗಳ ನಿಯೋಗವೊಂದು ಸದ್ಯದಲ್ಲೇ ರಾಜ್ಯಕ್ಕೆ ಆಗಮಿಸಿ, ಮಹಾದಾಯಿ ನೀರನ್ನು ಮಲಪ್ರಭಾಗೆ ಹರಿಸುವ ಬಗ್ಗೆ ಚರ್ಚಿಸುವ ನಿರೀಕ್ಷೆಯಿದೆ. ಕಳೆದ ವರ್ಷ ಡಿಸೆಂಬರ್‌ 22ರಂದು ಗೋವಾ ಹಾಗೂ ಕರ್ನಾಟಕ ಮುಖ್ಯಮಂತ್ರಿಗಳು ಈ ಬಗ್ಗೆ ಚರ್ಚಿಸಿದ್ದಾರೆ. ಇನ್ನೂ ಚರ್ಚೆಯ ಹಂತದಲ್ಲೇ ಇರುವ ಈ ವಿಚಾರದ ಬಗ್ಗೆ ಈಗಲೇ ಅಂತಿಮ ನಿರ್ಧಾರ ಹೇಳಲಾಗದು ಎಂದರು.

ಈ ವಿಷಯದಲ್ಲಿ ಗೋವಾ ಸರ್ಕಾರ ಸಕಾರಾತ್ಮವಾಗಿ ಪ್ರತಿಕ್ರಿಯಿಸಿಲ್ಲ. ಹಾಗಂತ ನಮ್ಮ ಸರ್ಕಾರವೂ ಕೈಕಟ್ಟಿ ಕೂತಿಲ್ಲ. ಒಂದು ವೇಳೆ ಗೋವಾ ಸರ್ಕಾರ ನದಿ ನೀರು ಬಿಡಲು ಒಪ್ಪದಿದ್ದರೆ, ಪರ್ಯಾಯ ಯೋಜನೆ ಜಾರಿಗಾಗಿ ವರದಿಯಾಂದನ್ನು ಸಿದ್ಧಪಡಿಸಿದೆ ಎಂದು ಪಾಟೀಲ್‌ ಹೇಳಿದರು. ವಿರೋಧ ಪಕ್ಷದ ನಾಯಕ ಜಗದೀಶ್‌ ಶೆಟ್ಟರ್‌ ವರ ಅನುಪಸ್ಥಿತಿಯಲ್ಲಿ ಬಿಜೆಪಿಯ ವಿಶ್ವೇಶ್ವರ ಹೆಗಡೆ ಕಾಗೇರಿ ಈ ಜಲ ಸಮಸ್ಯೆ ಕುರಿತ ಪ್ರಶ್ನೆ ಕೇಳಿದರು.

(ಯುಎನ್‌ಐ)