ಸಂಗೇನಹಳ್ಳಿ : ಟ್ರಕ್‌ ಚಾಲಕರ ದರೋಡೆ, 14 ಸಾವಿರ ಲೂಟಿ

ದಾವಣಗೆರೆ : ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಡಕಾಯಿತರ ಗುಂಪೊಂದು ದಾವಣಗೆರೆಯ ಸಂಗೇನಹಳ್ಳಿಯಲ್ಲಿ ಎರಡು ಟ್ರಕ್‌ಗಳ ಚಾಲಕರ ಮೇಲೆ ಹಲ್ಲೆ ಮಾಡಿ 14 ಸಾವಿರ ರೂಪಾಯಿ ದೋಚಿದ್ದಾರೆ.

ಗುರುವಾರ ಮಧ್ಯರಾತ್ರಿ ಈ ಘಟನೆ ನಡೆದಿದ್ದು, ಹಲ್ಲೆಗೊಳಗಾಗಿದ್ದ ಚಾಲಕರಿಬ್ಬರೂ ಅಪಾಯದಿಂದ ಪಾರಾಗಿದ್ದಾರೆ. ಎರಡೂ ಟ್ರಕ್‌ಗಳು ತಮಿಳುನಾಡಿನ ನೋಂದಾವಣೆ ಹೊಂದಿವೆ.

ಪೊಲೀಸ್‌ ಮೂಲಗಳ ಪ್ರಕಾರ, ಎಂಟು ಮಂದಿ ಡಕಾಯಿತರ ಗುಂಪು ನಿಲ್ಲಿಸಿದ್ದ ಟ್ರಕ್‌ನ ಚಾಲಕನ ಮೇಲೆ ಚಾಕುವಿನಿಂದ ಹಲ್ಲೆ ಮಾಡಿ ಐದು ಸಾವಿರ ರೂಪಾಯಿ ಕಿತ್ತುಕೊಂಡಿದ್ದಾರೆ. ತುಸು ಹೊತ್ತಿನ ಬಳಿಕ ಇನ್ನೊಂದು ಲಾರಿಯ ಚಾಲಕನ ಮೇಲೂ ಆಕ್ರಮಣ ಮಾಡಿ 9 ಸಾವಿರ ರೂಪಾಯಿ ದೋಚಿದ್ದಾರೆ. ಡಕಾಯಿತರೆಲ್ಲರೂ 25ರಿಂದ 30 ವರ್ಷ ವಯಸ್ಸಿನವರು.

(ಯುಎನ್‌ಐ)