ಹರ್ಭಜನ್ಗೆ 7 ವಿಕೆಟ್, ಆಸ್ಟ್ರೇಲಿಯಾ 391 ಕ್ಕೆ ಆಲೌಟ್
ಚೆನ್ನೈ : ಹರ್ಭಜನ್ ಸಿಂಗ್ ಮತ್ತೊಮ್ಮೆ ಮಿಂಚಿದರೊ ಅಥವಾ ಆಸ್ಟ್ರೇಲಿಯನ್ನರು ಹರ್ಭಜನ್ ಜ್ವರದಿಂದ ನರಳುತ್ತಿದ್ದಾರೊ, ಒಟ್ಟಿನಲ್ಲಿ ಮೊದಲ ದಿನದ ಕೊನೆಗೆ ಕೇವಲ 3 ವಿಕೆಟ್ ನಷ್ಟಕ್ಕೆ 326 ರನ್ ಗಳಿಸಿದ್ದ ಕಾಂಗರೂ ಪಡೆ ಸೋಮವಾರದ ಬೆಳಗಿನ ಆಟದಲ್ಲಿ 391 ರನ್ಗಳಿಗೆ ತನ್ನ ಎಲ್ಲಾ ವಿಕೆಟ್ಗಳನ್ನು ಕಳೆದುಕೊಂಡಿತು. ಪೆವಿಲಿಯನ್ಗೆ ಕೊನೆಯವರಾಗಿ ತೆರಳುವ ಮುನ್ನ ಮ್ಯಾಥ್ಯೂ ಹೇಡನ್ ದ್ವಿಶತಕ (203) ಪೂರೈಸಿದರು.
ಕಲ್ಲುಬಂಡೆಯಂತೆ ಭದ್ರವಾಗಿ ನಿಂತ ಹೇಡನ್ ಬೌಂಡರಿಗಳನ್ನು ಗಿಟ್ಟಿಸುತ್ತಾ ನಡೆದರೆ, ಮತ್ತೊಂದೆಡೆ ಅವರಿಗೆ ಸಮರ್ಥ ಬೆಂಬಲ ದೊರಕಲಿಲ್ಲ . ಕೊನೆಯವರಾಗಿ ಬಂದ- ವಾರ್ನ್ (0), ಗಿಲ್ಲೆಸ್ಪಿ (1), ಮೆಕ್ಗ್ರಾತ್(3) ಹಾಗೂ ಮಿಲ್ಲರ್(0) ಗಳಿಸಿದ ರನ್ನುಗಳು ಆಸ್ಟ್ರೇಲಿಯಾದ ದಿಢೀರ್ ಕುಸಿತಕ್ಕೆ ಸಾಕ್ಷಿಯಂತಿದ್ದವು.
ಭರ್ಜರಿ ಬೌಲಿಂಗ್ ಪ್ರದರ್ಶನ ನೀಡಿದ ಹರ್ಭಜನ್ ಇಂದು ಬೌಲರ್ಗಳ ಖಾತೆಗೆ ಸೇರಿದ ಆರೂ ವಿಕೆಟ್ಗಳನ್ನು ಕಬಳಿಸಿದರು. ಇದರೊಂದಿಗೆ ಈ ಇನಿಂಗ್ಸ್ನಲ್ಲಿ ಅವರ ಗಳಿಕೆ 7 ಕ್ಕೆ, ಇತ್ತೀಚಿನ 3 ಇನಿಂಗ್ಸ್ಗಳ ಗಳಿಕೆ 20 ಕ್ಕೆ ಏರಿತು. ಇತ್ತೀಚಿನ ವರದಿಗಳು ಬಂದಾಗ, ಭಾರತ ತಂಡ ವಿಕೆಟ್ ನಷ್ಟವಿಲ್ಲದೆ 32 ರನ್ ಗಳಿಸಿತ್ತು .
(ಇನ್ಫೋ ವಾರ್ತೆ)
ಮುಖಪುಟ / ಇವತ್ತು... ಈ ಹೊತ್ತು...