ಗುಜರಾತ್‌ ಸಂತ್ರಸ್ತರಿಗೆ ಮಂಡೇಲಾರಿಂದ ಗಾಂಧಿ ಪುರಸ್ಕಾರದ ಹಣ

ನವದೆಹಲಿ : ದಕ್ಷಿಣ ಆಫ್ರಿಕಾದ ಮಾಜಿ ಅಧ್ಯಕ್ಷ ಹಾಗೂ ಕರಿಯರ ನಾಯಕ ನೆಲ್ಸನ್‌ ಮಂಡೇಲಾ ತಾವು ಪಡೆದ 2000 ಸಾಲಿನ ಗಾಂಧಿ ಶಾಂತಿ ಪುರಸ್ಕಾರದ ಹಣವನ್ನು ಗುಜರಾತ್‌ ಭೂಕಂಪ ಸಂತ್ರಸ್ತರ ನೆರವಿಗೆ ಅರ್ಪಿಸಿದ್ದಾರೆ.

ಈ ಕುರಿತಾದ 1 ಲಕ್ಷ 6 ಸಾವಿರದ 698 ಡಾಲರ್‌ಗಳ ಚೆಕ್ಕನ್ನು ಪ್ರಧಾನಮಂತ್ರಿಗಳ ರಾಷ್ಟ್ರೀಯ ಪರಿಹಾರ ನಿಧಿಗೆ ನೀಡಲಾಗಿದೆ ಎಂದು ನೆಲ್ಸನ್‌ ಮಂಡೇಲ ಫೌಂಡೇಷನ್‌ ಸೋಮವಾರ ಪ್ರಕಟಿಸಿದೆ. ಗುಜರಾತ್‌ನ ಕಛ್‌ ಪ್ರದೇಶದ ಸಂತ್ರಸ್ತರ ನೆರವಿಗೆ ಈ ಹಣವನ್ನು ಬಳಸಬೇಕೆಂದು ಮಂಡೇಲಾ ಇಚ್ಛಿಸಿದ್ದಾರೆ.

ಮಾರ್ಚ್‌ 16 ರಂದು ದೆಹಲಿಯಲ್ಲಿ ನಡೆದ ಸಮಾರಂಭವೊಂದರಲ್ಲಿ ಮಂಡೇಲಾ ಅವರಿಗೆ ಗಾಂಧಿ ಶಾಂತಿ ಪುರಸ್ಕಾರವನ್ನು ಪ್ರದಾನ ಮಾಡಲಾಗಿತ್ತು . ಬಾಂಗ್ಲಾ ದೇಶ್‌ ಗ್ರಾಮೀಣ ಬ್ಯಾಂಕ್‌ನೊಂದಿಗೆ ಮಂಡೇಲಾ ಪ್ರಶಸ್ತಿಯನ್ನು ಹಂಚಿಕೊಂಡಿದ್ದರು.

(ಯುಎನ್‌ಐ)