ಎಐಸಿಸಿ ಪೂರ್ಣಾಧಿವೇಶನದ ಧ್ಯೇಯ ವಾಕ್ಯ-ಎನ್‌ಡಿಎ ಡೌನ್‌ ಡೌನ್‌

ಬೆಂಗಳೂರು : ರಕ್ಷಣಾ ಹಗರಣದಲ್ಲಿ ಎನ್‌ಡಿಎ ಧುರೀಣರು ಭಾಗಿಯಾಗಿರುವ ಆರೋಪದ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಶುಕ್ರವಾರ ರಾತ್ರಿ ಸಭೆ ನಡೆಸಿ, ದೇಶದ ಪ್ರಸ್ತುತ ರಾಜಕೀಯ ಬದಲಾವಣೆಗಳನ್ನು ಪರಿಶೀಲಿಸಲಿದೆ.

ತೆಹಲ್ಕಾ ಡಾಟ್‌ ಕಾಂ ಬಯಲಿಗೆಳೆದಿರುವ ರಕ್ಷಣಾ ಹಗರಣದ ಹಿನ್ನೆಲೆಯಲ್ಲಿ ಸರ್ಕಾರವನ್ನು ಬರ್ಖಾಸ್ತುಗೊಳಿಸಬೇಕೆಂಬ ತನ್ನ ಪಟ್ಟಿನ ಜಾಡಿನಲ್ಲೇ ಶುಕ್ರವಾರದ ಸಭೆ ಸಾಗುವ ನಿರೀಕ್ಷೆಯಿದೆ. ಮಾರ್ಚ್‌ 17ರಿಂದ ಪ್ರಾರಂಭವಾಗುವ ಅಖಿಲ ಭಾರತ ಕಾಂಗ್ರೆಸ್‌ ಪೂರ್ಣಾಧಿವೇಶನದಲ್ಲೂ ಇದೇ ವಿಷಯ ತುಂಬಿಹೋಗುವ ಸಾಧ್ಯತೆಯಿದೆ.

ಎಐಸಿಸಿ ಪ್ರಧಾನ ಅಧಿವೇಶನದಲ್ಲಿ ಚರ್ಚಿಸಲಾಗುವ ಆರ್ಥಿಕ, ಕೃಷಿ, ರಾಜಕೀಯ ಹಾಗೂ ವಿದೇಶಾಂಗ ವ್ಯವಹಾರ ಕ್ಷೇತ್ರಗಳ ಕುರಿತಂತೆ ಗೊತ್ತುವಳಿ ನಿರ್ಣಯಗಳನ್ನೂ ಶುಕ್ರವಾರದ ಸಭೆಯಲ್ಲಿ ಅಂತಿಮಗೊಳಿಸಲಾಗುವುದು. ಖಾಸಗೀಕರಣ ವಿರೋಧಿಸಿ, ಸಾರ್ವಜನಿಕ ವಲಯಗಳಿಗೆ ಮಾನ್ಯತೆ ಕೊಡುವ ‘ನೆಹರೂತನದ ಆರ್ಥಿಕತೆ’ಗೆ ಕಾಂಗ್ರೆಸ್‌ ಒತ್ತು ಕೊಡಲಿದೆ. ಮಾಜಿ ವಿತ್ತ ಸಚಿವ ಪ್ರಣಬ್‌ ಮುಖರ್ಜಿ ನೇತೃತ್ವದಲ್ಲಿ ಗೊತ್ತುವಳಿಗಳನ್ನು ರೂಪಿಸಲಾಗಿದೆ.

ಭಾರತ್‌ ಅಲ್ಯುಮಿನಿಯಂ ಕಂಪನಿಯ ಬಂಡವಾಳ ವಾಪಸಾತಿ ಪಡೆಯುವ ನಿರ್ಧಾರ ಹಾಗೂ ವಿದೇಶೀ ನೀತಿಯ ವಿಷಯದಲ್ಲಿ ಎನ್‌ಡಿಎ ಇಟ್ಟಿರುವ ಹೆಜ್ಜೆಯನ್ನು ಸಭೆಯಲ್ಲಿ ವಿರೋಧಿಸಲಾಗುವುದು. ಎಡಪಕ್ಷಗಳಿಗೆ, ಅದರಲ್ಲೂ ವಿಶೇಷವಾಗಿ ಸಿಪಿಐ (ಎಂ) ಗೆ ಹತ್ತಿರಾಗುತ್ತಿರುವ ಕಾಂಗ್ರೆಸ್‌, ಎನ್‌ಡಿಎ ಸರ್ಕಾರವನ್ನು ತರಾಟೆಗೆ ತೆಗೆದುಕೊಳ್ಳಲಿದೆ. ಕಾಂಗ್ರೆಸ್‌ ಆಡಳಿತದ ರಾಜ್ಯಗಳ 9 ಮುಖ್ಯಮಂತ್ರಿಗಳು, ಎಐಸಿಸಿ ಸದಸ್ಯರು, ಪ್ರದೇಶ ಕಾಂಗ್ರೆಸ್‌ ಸಮಿತಿ ಪ್ರತಿನಿಧಿಗಳು ಹಾಗೂ ಸಂಸತ್‌ ಸದಸ್ಯರೂ ಸೇರಿದಂತೆ ಸುಮಾರು 10 ಸಾವಿರ ಪ್ರತಿನಿಧಿಗಳು ಅಖಿಲ ಭಾರತ ಕಾಂಗ್ರೆಸ್‌ ಪೂರ್ಣಾಧಿವೇಶನದಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ. ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾಗಾಂಧಿ ಧ್ವಜಾರೋಹಣ ಮಾಡುವುದರೊಂದಿಗೆ ಅಧಿವೇಶನ ಶುರುವಾಗಲಿದೆ.

(ಯುಎನ್‌ಐ)