ಕೆನರಾಬ್ಯಾಂಕ್‌ನ ಎರಡು ಹೊಸ ಎ.ಟಿ.ಎಂ. ಕೌಂಟರ್‌ ಕಾರ್ಯಾರಂಭ

ಬೆಂಗಳೂರು : ಕರ್ನಾಟಕ ಮೂಲದ ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿ ಒಂದಾದ ಕೆನರಾಬ್ಯಾಂಕ್‌ ತನ್ನ ಗ್ರಾಹಕರಿಗೆ ಉತ್ತಮ ಸೇವೆ ಕಲ್ಪಿಸುವ ಉದ್ದೇಶದಿಂದ ಬೆಂಗಳೂರಿನಲ್ಲಿ ಎರಡು ಹೊಸ ಎಟಿಎಂ ಕೌಂಟರ್‌ಗಳನ್ನು (ಸ್ವಯಂ ಚಾಲಿತ ಹಣ ನೀಡಿಕೆ ಯಂತ್ರ) ಸ್ಥಾಪಿಸಿದೆ.

ಬಸವನಗುಡಿ (ಗಾಂಧೀಬಜಾರ್‌) ಮತ್ತು ಎಂ.ಜಿ. ರಸ್ತೆಯಲ್ಲಿರುವ ಸ್ಪೆನ್ಸರ್‌ ಕಟ್ಟಡದ ಶಾಖೆಗಳಲ್ಲಿ ಈ ಯಂತ್ರಗಳನ್ನು ಅಳವಡಿಸಲಾಗಿದೆ. ಬ್ಯಾಂಕಿನ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಆರ್‌.ಜಿ. ಕಾಮತ್‌ ಅವರು ಬಸವನಗುಡಿಯ ಶಾಖೆಯಲ್ಲೂ ಹಾಗೂ ಬ್ಯಾಂಕಿನ ಕಾರ್ಯ ನಿರ್ವಾಹಕ ನಿರ್ದೇಶಕ ಆರ್‌.ಪಿ. ಗುಪ್ತಾ ಅವರು ಎಂ.ಜಿ. ರಸ್ತೆಯಲ್ಲೂ ಎ.ಟಿ.ಎಂ. ಕೌಂಟರ್‌ಗಳನ್ನು ಉದ್ಘಾಟಿಸಿದರು.

ಪ್ರಸ್ತುತ ಕೆನರಾಬ್ಯಾಂಕ್‌, ಬೆಂಗಳೂರಿನಲ್ಲಿ 7 ಎ.ಟಿ.ಎಂ. ಕೌಂಟರ್‌ಗಳನ್ನು ಹೊಂದಿದ್ದು, ಅದಕ್ಕೆ ಈ ಎರಡು ಹೊಸ ಕೌಟಂರ್‌ಗಳ ಸೇರ್ಪಡೆಯಾಗಿದೆ. ಬ್ಯಾಂಕ್‌ ಈ ವರ್ಷದಲ್ಲೇ ಇನ್ನೂ 9 ಹೊಸ ಕೇಂದ್ರಗಳನ್ನು ತೆರೆಯುವ ಉದ್ದೇಶವನ್ನೂ ಹೊಂದಿದೆ.

ಬೆಂಗಳೂರಿನಲ್ಲಿರುವ 42 ಶಾಖೆಗಳೊಂದಿಗೆ ಈ ಸ್ವಯಂ ಚಾಲಿತ ಯಂತ್ರಗಳು ಸಂಪರ್ಕವನ್ನು ಹೊಂದಿರುತ್ತದೆ. ಇದು ಗ್ರಾಹಕರಿಗೆ ಉತ್ತಮ ಸೌಲಭ್ಯ ಒದಗಿಸುತ್ತದೆ ಎಂದು ಕೆನರಾ ಬ್ಯಾಂಕಿನ ಸಾರ್ವಜನಿಕ ಸಂಪರ್ಕ ಇಲಾಖೆ ಪ್ರಕಟಣೆ ತಿಳಿಸಿದೆ.