ಮಂತ್ರಾಲಯ : ಮಾ.2ರಂದು ಬೃಹತೀ ಸಹಸ್ರಯಾಗ ಸಮಾರೋಪ

ಮಂತ್ರಾಲಯ : ಮಂತ್ರಾಲಯದಲ್ಲಿ ನಡೆಯುತ್ತಿರುವ ಬೃಹತೀ ಸಹಸ್ರಯಾಗವು ರಾಘವೇಂದ್ರ ಸ್ವಾಮಿಗಳ ಪಟ್ಟಾಭಿಷೇಕ ದಿನವಾದ ಮಾರ್ಚ್‌ ಎರಡರಂದು ಪರಿಸಮಾಪ್ತಿಯಾಗಲಿದ್ದು , ಆ ಪ್ರಯು-ಕ್ತ ಭವ್ಯ ಸಮಾರಂಭವನ್ನು ಆಯೋಜಿಸಲಾಗಿದೆ.

ಮಾರ್ಚ್‌ ಒಂದು ಮತ್ತು ಎರಡರಂದು ಸಂಜೆ ಪ್ರವಚನ, ಭಜನೆ ಮತ್ತು ಉಪನ್ಯಾಸಗಳನ್ನು ಏರ್ಪಡಿಸಲಾಗಿದೆ. ಸಮಾರೋಪ ದಿನದಂದು ರಾಘವೇಂದ್ರ ಸ್ವಾಮೀಜಿಗಳ ಬಂಗಾರ ಪಾದುಕಾ ಪೂಜೆ, ಬಂಗಾರ ರಥದಲ್ಲಿ ರಾಯರನ್ನು ಕುಳ್ಳಿರಿಸಿ ಸುಶಮೀಂದ್ರ ತೀರ್ಥರ ನೇತೃತ್ವದಲ್ಲಿ ರಥೋತ್ಸವ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.

ರಾಘವೇಂದ್ರ ಸ್ವಾಮಿಗಳ ಜನ್ಮ ದಿನದಂದು ಆರಂಭವಾಗಿರುವ ಬೃಹತೀ ಸಹಸ್ರಯಾಗದಲ್ಲಿ ವಿಷ್ಣುವನ್ನು ಆರಾಧಿಸಲಾಗುತ್ತದೆ. ಗರುಡಾಕಾರದ ವೇದಿಕೆಯ ಮೇಲೆ ಪಂಚರೂಪದಲ್ಲಿರುವ ವಿಷ್ಣುವನ್ನು ಪೂಜಿಸಲಾಗುತ್ತದೆ. ಬೃಹತೀ ಛಂದಸ್ಸಿನಲ್ಲಿರುವ ಒಂದು ಸಹಸ್ರ ಮಂತ್ರಗಳನ್ನು ಸಸ್ವರವಾಗಿ ಹೇಳಿ ನಡೆಸುವ ಈ ಯಾಗ ಪುರಾಣಗಳಲ್ಲಿ ಪರಮ ಶ್ರೇಷ್ಠವೆನಿಸಿಕೊಂಡಿದೆ.

(ಇನ್ಫೋ ವಾರ್ತೆ)