ರಾಜ್‌ ಅಪಹರಣದ ‘ಮಾಸ್ಟರ್‌ ಮೈಂಡ್‌’ ಕೃಷ್ಣಮೂರ್ತಿ ಬಂಧನ

ಬೆಂಗಳೂರು : ಕನ್ನಡದ ವರನಟ ಡಾ. ರಾಜ್‌ಕುಮಾರ್‌ ಅಪಹರಣದ ಪ್ರಮುಖ ರೂವಾರಿ ತಮಿಳು ಉಗ್ರರ ನಾಯಕ ಮಾರನ್‌ಗೆ ಅಪಹರಣದ ರೂಪುರೇಷೆ ಹಾಕಿಕೊಟ್ಟ ವ್ಯಕ್ತಿ ಎಂದು ಶಂಕಿಸಲಾಗಿರುವ ಕೃಷ್ಣಮೂರ್ತಿ ಎಂಬುವವನನ್ನು ತಮಿಳುನಾಡು ಪೊಲೀಸರು ಬುಧವಾರ ಬಂಧಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ದಿನಕರ್‌ ಅಭಿಪ್ರಾಯ : ಎಸ್‌ಟಿಎಫ್‌ ಕಾರ್ಯಾಚರಣೆಗೆ ಹೆದರಿರುವ ವೀರಪ್ಪನ್‌ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಪರಾರಿಯಾಗುತ್ತಿದ್ದು, ಸತತ ಪ್ರಯತ್ನದಿಂದ ಮಾತ್ರ ವೀರಪ್ಪನ್‌ ಬಂಧನ ಸಾಧ್ಯ ಎಂದು ಬುಧವಾರ ನಿವೃತ್ತರಾದ ಪೊಲೀಸ್‌ ಮಹಾ ನಿರ್ದೇಶಕ ಸಿ. ದಿನಕರ್‌ ಅಭಿಪ್ರಾಯಪಟ್ಟಿದ್ದಾರೆ.

ವೀರಪ್ಪನ್‌ ತಂಡದ ಸಂಖ್ಯೆ 12ರಿಂದ ಕೇವಲ ಮೂರಕ್ಕೆ ಇಳಿದಿದೆ. ಇದು ಜಂಟಿ ಕಾರ್ಯಾಚರಣೆ ಪಡೆಯ ಶ್ರಮದಿಂದ ಸಾಧ್ಯವಾಗಿದೆ ಎಂದರು. ಕರ್ನಾಟಕ ಹಾಗೂ ತಮಿಳುನಾಡು ಕಾರ್ಯಪಡೆಗಳ ಸಿಬ್ಬಂದಿ ನಡುವೆ ಹೊಂದಾಣಿಕೆ ಇಲ್ಲ ಎಂಬ ವರದಿಗಳನ್ನು ಅವರು ತಳ್ಳಿಹಾಕಿದರು. ಕಾರ್ಯಾಚರಣೆ ಪಡೆಯಲ್ಲಿ ಭಿನ್ನಾಭಿಪ್ರಾಯ ಇದ್ದಿದ್ದಲ್ಲಿ ಮಾರನ್‌ ಸೇರಿದಂತೆ ಯಾರನ್ನೂ ಹಿಡಿಯಲು ಸಾಧ್ಯವಾಗುತ್ತಿರಲಿಲ್ಲ ಎಂದರು.