2 ಅಂಗಡಿಗಳಿಗೆ ಬೆಂಕಿ : ರಾಣಿ ಬೆನ್ನೂರಲ್ಲಿ ಕುದಿಮೌನ

ಹುಬ್ಬಳ್ಳಿ : ಭಾನುವಾರ ರಾತ್ರಿ ಕೆಲ ದುಷ್ಕರ್ಮಿಗಳು 2 ಅಂಗಡಿಗಳಿಗೆ ಬೆಂಕಿ ಇಟ್ಟ ಪರಿಣಾಮ ಹಾವೇರಿ ಜಿಲ್ಲೆಯ ರಾಣಿ ಬೆನ್ನೂರಲ್ಲಿ ಪ್ರಕ್ಷುಬ್ಧ ಪರಿಸ್ಥಿತಿ ನಿರ್ಮಾಣವಾಗಿದೆ.

ಸುಮಾರು 10 ದುಷ್ಕರ್ಮಿಗಳು ಅಂಗಡಿಗಳಿಗೆ ಬೆಂಕಿ ಇಟ್ಟಿದ್ದಾರೆ. ಬೆಂಕಿ ನಂದಿಸಲು ಅಗ್ನಿ ಶಾಮಕ ದಳದವರಿಗೆ ಒಂದು ತಾಸೂ ಸಾಕಾಗಲಿಲ್ಲ. ಮಾರುಕಟ್ಟೆಯಲ್ಲಿ ಜನ ಗುಂಪುಗಟ್ಟಿದರು. ವರ್ತಕರು ಘಟನೆಯನ್ನು ಪ್ರತಿಭಟಿಸಿ ಸೋಮವಾರ ಒಂದು ದಿನದ ಬಂದ್‌ ಆಚರಿಸುವುದಾಗಿ ಹೇಳಿದರು. ಆದರೆ ಸ್ಥಳೀಯ ದೇವಾಲಯದಲ್ಲಿ ಸೋಮವಾರ ಜಾತ್ರೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಬಂದ್‌ ನಡೆಸದಂತೆ ಅವರಿಗೆ ಮನವರಿಕೆ ಮಾಡಿಸುವಲ್ಲಿ ಪೊಲೀಸರು ಯಶಸ್ವಿಯಾದರು.

ಪ್ರಸ್ತುತ ಪರಿಸ್ಥಿತಿ ತಹಬಂದಿಗೆ ಬಂದಿದ್ದು , ರಾಣಿ ಬೆನ್ನೂರು ಶಾಂತವಾಗಿದೆ. ಪೊಲೀಸರು ಊರಿನ ತುಂಬಾ ಗಸ್ತು ಹೊಡೆಯುತ್ತಿದ್ದಾರೆ. ಘಟನೆ ಕುರಿತು ಬೆಂಗಳೂರಲ್ಲಿ ಮಾತನಾಡಿದ ಮುಖ್ಯಮಂತ್ರಿ ಕೃಷ್ಣ , ಈ ಘಟನೆಗೆ ರೆಕ್ಕೆಪುಕ್ಕ ಹರಡಿ ಹಿಂಸೆ ತಾಂಡವವಾಡದಂತೆ ಪೊಲೀಸರು ದುರ್ವತನೆಯನ್ನು ಸದ್ದಿಲ್ಲದೆ ಹತ್ತಿಕ್ಕಿದ್ದಾರೆ. ಹುಚ್ಚು ಜನರ ಇಂಥ ದುರ್ವರ್ತನೆಗಳನ್ನು ತಡೆಯಬೇಕಾದ್ದು ಅತ್ಯವಶ್ಯಕ ಎಂದಿದ್ದಾರೆ.

(ಯುಎನ್‌ಐ)