ನಗು ಎಂದಿದೆ ಮಂಜಿನ ಬಿಂದು

ಮದರಾಸಿನಲ್ಲಿ ಬೀಳೋ ಎರಡು ಹನಿ ಮಳೆಗೇ ಥರಗುಟ್ಟುವ ಬೆಂಗಳೂರಿನ ಜನ ಚಾದರಕ್ಕಂಟಿಕೊಳ್ಳುವಂತಿದ್ದ ಎರಡು ದಿನಗಳ ಪರಿಸ್ಥಿತಿ ಈಗ ಕೊಂಚ ತಿಳಿಯಾಗಿದೆ. ಬಯ್ಗಿನ ಹೊತ್ತಿಗೆ ದಿನಕರ ಮುಖ ತೋರಿದ್ದಾನೆ.

ಶ್ರೀಲಂಕಾದಿಂದ ತಮಿಳುನಾಡಿಗೆ ಬೀಸಿದ ಚಂಡ ಮಾರುತದ ಬಿಸಿ ಬೆಂಗಳೂರಿಗರಿಗೂ ತಟ್ಟಿತು. ಎಷ್ಟೋ ಜನರಲ್ಲಿ ಆಗಲೇ ‘ಸೊರ್ರ ಬುಸ್ಸ’ ಶುರುವಾಗಿತ್ತು. ಹೊಸ ವರ್ಷದ ಕಾರ್ಯಕ್ರಮಕ್ಕೂ ಈ ಮಂಕು ಕವಿದು ಬಿಟ್ಟಿತೆ ಅನ್ನುವ ಗುಸುಗುಸು ಪ್ರಾರಂಭವಾಗಿತ್ತು. ಅಲ್ಲಲ್ಲಿ ಮೈದಾನಗಳ ಮೇಲೆ ತಲೆ ಎತ್ತುವ ಹೊಸ ವರ್ಷದ ಕಾಕ್‌ಟೈಲ್‌ ಅಡ್ಡಾಗಳು ವಾಟರ್‌ ಪ್ರೂಫ್‌ ಶಾಮಿಯಾನಗಳಿಗಾಗಿ ತಡಕಾಟ ನಡೆಸಿದ್ದವು. ಇನ್ನು ಸಾಕೆನ್ನುವಂತೆ ಬೆಂಗಳೂರಲ್ಲಿ ಉದುರುತ್ತಿದ್ದ ಕಿರಿಕಿರಿ ಸೋನ್‌ ಪಪ್ಪಡಿ ಮಳೆ ಪೂರ್ತಿ ನಿಂತಿದ್ದು, ಜಡ್ಡುಗಟ್ಟಿದ್ದ ಜನರಲ್ಲಿ ಜೀವ ಸಂಚಾರವಾಗಿದೆ.

ರಾಜ್ಯದಲ್ಲಿ ಅತಿ 12.1 ಡಿಗ್ರಿಯಷ್ಟು ಅತಿ ಕನಿಷ್ಠ ಉಷ್ಣಾಂಶ ಶಿವಮೊಗ್ಗೆಯಲ್ಲಿ ದಾಖಲಾಗಿದೆ. ಉಳಿದಂತೆ ಯಥಾ ಒಣಹವೆ. ಇನ್ನು ಎರಡು ದಿನಗಳಲ್ಲಿ ಕನಿಷ್ಠ ಉಷ್ಣಾಂಶ ಕೊಂಚ ಏರುವ ಸಾಧ್ಯತೆಯಿದೆ ಎಂಬುದು ಹವಾಮಾನ ಇಲಾಖೆಯ ವರದಿ. ಬೆಂಗಳೂರಲ್ಲಿ ಚುಮುಚುಮು ಚಳಿಗೆ ಕಡಿವಾಣ ಹಾಕಲೋ ಎನ್ನುವಂತೆ ಕನಿಷ್ಠ ಉಷ್ಣತೆ 17 ಡಿಗ್ರಿಯಷ್ಟಿದೆ.

ಆಕಾಶಕ್ಕೆ ಹೊಸ ವರ್ಷದ ಶುಭಾಶಯ ಕೋರುತ್ತಿರುವ ಎಲೆಗಳ- ಹೂಗಳ ಮೇಲೆ ಕುಂತ ಮಂಜಿನ ಹನಿಗಳು ನಗು ಎನ್ನುತ್ತಿವೆ ; ವರ್ಷದಂಚಿನಲ್ಲಿ ನಿಂತಿರುವ ನಿಮಗೂ.