ಎನ್‌ಸಿಎ ಹುದ್ದೆಗೆ ಬ್ರಿಜೇಶ್‌ ಮೇಲೆ ಬೆರಣಿ ತಟ್ಟುತ್ತಿರುವ ಅನ್ಶುಮನ್‌

*ರಾಮರಾಜ್‌

ಬೆಂಗಳೂರು : ‘1999ರ ವಿಶ್ವ ಕಪ್‌ನಲ್ಲಿ ಬ್ರಿಜೇಶ್‌ ಪಟೇಲ್‌ ಅವರನ್ನು ಮ್ಯಾನೇಜರ್‌ ಮಾಡಿ ನಾನು ದೊಡ್ಡ ತಪ್ಪು ಮಾಡಿದೆ’ ಎಂದು ಭಾರತ ಕ್ರಿಕೆಟ್‌ ತಂಡದ ಮಾಜಿ ಕೋಚ್‌ ಅನ್ಶುಮನ್‌ ಗಾಯಕವಾಡ್‌ ಕೊಟ್ಟಿದ್ದಾರೆ ಎನ್ನಲಾದ ಹೇಳಿಕೆಗೆ, ಕರ್ನಾಟಕ ರಾಜ್ಯ ಕ್ರಿಕೆಟ್‌ ಒಕ್ಕೂಟ (ಕೆಎಸ್‌ಸಿಎ)ದ ಕಾರ್ಯದರ್ಶಿ ಬ್ರಿಜೇಶ್‌ ಪಟೇಲ್‌ ಕೆಂಡಾಮಂಡಲರಾಗಿದ್ದಾರೆ.

ಈ ಬಗೆಗೆ ಇಂಡಿಯಾ ಇನ್ಫೋ ಜತೆ ಅವರು ಅನೌಪಚಾರಿಕ ಹರಟೆಯಲ್ಲಿ ಆಡಿದ ಕೆಲ ಮಾತುಗಳು ಇಲ್ಲಿವೆ....

ನನ್ನನ್ನು ಮ್ಯಾನೇಜರ್‌ ಮಾಡಲು ಆತ ಯಾರು? ಆ ಕೆಲಸ ಮಾಡೋದು ಮಂಡಲಿ. ನಾನು ಯಾರದ್ದೋ ಕೆಲಸದಲ್ಲಿ ಮೂಗು ತೂರಿಸಿದವನಲ್ಲ. ಬೇಕಾದರೆ ಹುಡುಗರನ್ನೇ ಕೇಳಿ ? ನಾನಲ್ಲಿ ಕೆಲಸ ಮಾಡಿದ್ದರಿಂದಲೇ ಆತನ ಯೋಗ್ಯತೆ ಏನು ಅನ್ನೋದನ್ನ ಮಂಡಲಿಗೆ ನನ್ನ ವರದಿಯಲ್ಲಿ ತಿಳಿಸಲು ಸಾಧ್ಯವಾಯಿತು.

ಕಳೆದ 3 ವರ್ಷಗಳಲ್ಲಿ ಆತ ಕಿಸಿದಿರುವುದೇನು? ಬೌಲರ್‌ಗಳಾಗಲೀ, ಬ್ಯಾಟ್ಸ್‌ಮನ್‌ಗಳಾಗಲಿ ಆತನಿಂದ ಎಳ್ಳಷ್ಟೇನಾದರೂ ಕಲಿತಿದ್ದಾರಾ? 50 ಇತರೆ ರನ್‌ ಕೊಟ್ಟು, ರನ್‌ ಬೆನ್ನಟ್ಟುವಾಗ 3 ಓವರ್‌ ಕಳಕೊಂಡರೆ ಅದಕ್ಕೆ ನಾನು ಹೊಣೆಯೇ? ಹುಡುಗರನ್ನು ಸೇರಿಸಿ ಒಂದು ಚರ್ಚೆ ಮಾಡುತ್ತಿರಲಿಲ್ಲ. ತೆಂಡೂಲ್ಕರ್‌, ಮೊಂಗಿಯಾ ಮತ್ತೆ ದ್ರಾವಿಡ್‌ ಜೊತೆ ಆತ ಮರಾಠಿನಲ್ಲೇ ಮಾತಾಡುತ್ತಿದ್ದರು. ಆದರೆ ನಾನು ಕರ್ನಾಟಕದ ಹುಡುಗರ ಜೊತೆ ಕನ್ನಡದಲ್ಲಿ ಮಾತಾಡಿದರೆ ಆತನಿಗೆ ಕಿರಿಕಿರಿ! ಗಾಯಕವಾಡ್‌ ಹಾಗೂ ರವೀಂದ್ರ ಚಡ್ಡ. ಈ ಇಬ್ಬರೂ ಕ್ರಿಕೆಟ್‌ ದಿಗ್ಗಜಗಳು ! ಇಬ್ಬರ ಯೋಗ್ಯತೆ ಏನು ಅಂತ ಮಂಡಲಿಗೆ ನನ್ನ ವರದಿಯಲ್ಲಿ ಒಂದಿಂಚೂ ಬಿಡದೆ ತಿಳಿಸಿದ್ದೇನೆ.

ಎನ್‌ಸಿಎ ನಿರ್ದೇಶಕ ಸ್ಥಾನಕ್ಕೆ ಗಾಯಕವಾಡ್‌ ತಿಪ್ಪರಲಾಗ ?

ಗಾಯಕವಾಡ್‌, ಬ್ರಿಜೇಶ್‌ ವರನ್ನು ದೂರಲು ನಿಖರವಾದ ಕಾರಣ ಏನು ಅಂತ ಇನ್ನೂ ಗೊತ್ತಾಗಿಲ್ಲ. ಮಾಜಿ ಟೆಸ್ಟ್‌ ಆಟಗಾರ ಹನುಮಂತ ಸಿಂಗ್‌ ಬಿಟ್ಟು ಕೊಟ್ಟಿರುವ ನ್ಯಾಷನಲ್‌ ಕ್ರಿಕೆಟ್‌ ಅಕಾಡೆಮಿ (ಎನ್‌ಸಿಎ) ನಿರ್ದೇಶಕ ಜಾಗೆ ಈಗ ತೆರವಾಗಿದ್ದು, ಗಾಯಕವಾಡ್‌ ಕಣ್ಣು ಅದರ ಮೇಲಿದೆ ಎಂಬುದು ಕ್ರಿಕೆಟ್‌ ವಲಯದಲ್ಲಿ ಕೇಳಿ ಬರುತ್ತಿರುವ ಮಾತು.

ಕಳೆದ ಮೇ. 1 ರಂದು ಬೆಂಗಳೂರಿನಲ್ಲಿ ಉದ್ಘಾಟನೆಗೊಂಡಿದ್ದ ಎನ್‌ಸಿಎಯನ್ನು ಇಲ್ಲಿಂದ ಎತ್ತಂಗಡಿ ಮಾಡಬೇಕೆಂದು ಬಿಸಿಸಿಐ ಹೇಳಿತ್ತು. ನಮ್ಮ ಸರ್ಕಾರ ಹಾಗೂ ಮುಖ್ಯಮಂತ್ರಿಗಳ ಬಿಗಿ ಪಟ್ಟಿನಿಂದ ಅದು ಬಹುತೇಕ ಬೆಂಗಳೂರಲ್ಲೇ ಉಳಿಯೋದು ಖಚಿತವಾಗಿದೆ.

ಬಿಸಿಸಿಐನ ಮಾಜಿ ಅಧ್ಯಕ್ಷ ರಾಜ್‌ ಸಿಂಗ್‌ ಡುಂಗಾರ್‌ಪುರ್‌ ನೇತೃತ್ವದ ಎನ್‌ಸಿಎ ಸಮಿತಿಯ ಸದಸ್ಯರೂ ಆಗಿರುವ ಬ್ರಿಜೇಶ್‌ ಪಟೇಲ್‌, ಅದರ ನಿರ್ದೇಶಕ ಸೀಟು ಹತ್ತುವ ಸಾಧ್ಯತೆಗಳಿವೆ. ಅದೇ ಸ್ಥಾನದ ಮೇಲೆ ಕಣ್ಣಿಟ್ಟಿರುವ ಗಾಯಕವಾಡ್‌, ಈ ಕಾರಣಕ್ಕೇ ಬ್ರಿಜೇಶ್‌ ಮೇಲೆ ಬೆರಣಿ ತಟ್ಟೋ ಯತ್ನ ಮಾಡುತ್ತಿದ್ದಾರೆ ಅನ್ನುವ ಮಾತುಗಳೂ ಕೇಳಿ ಬರುತ್ತಿವೆ.