ಮಾರುತಿ ಉದ್ಯೋಗ್‌ ಖಾಸಗೀಕರಣದ ಲಾಭ ಅಮೆರಿಕಾ ಸಂಸ್ಥೆಗೆ!

ನ್ಯೂಯಾರ್ಕ್‌ : ಭಾರತದ ಜನಪ್ರಿಯ ಹಾಗೂ ಹಿರಿಯ ಕಾರು ಉತ್ಪಾದಿಸುವ ಸಂಸ್ಥೆ ಮಾರುತಿ ಉದ್ಯೋಗ್‌ ನಿಯಮಿತದ ಉದ್ದೇಶಿತ ಖಾಸಗೀಕರಣದಿಂದ ಅಮೆರಿಕದ ಜನರಲ್‌ ಮೋಟರ್ಸ್‌ ಕಾರ್ಪೊರೇಷನ್‌ಗೆ ಹೆಚ್ಚು ಲಾಭವಾಗಲಿದೆ ಎಂದು ಅಮೆರಿಕದ ವಾಣಿಜ್ಯ ಪತ್ರಿಕೆಯಾಂದು ವರದಿ ಮಾಡಿದೆ.

ಅಮೆರಿಕದ ಜನರಲ್‌ ಮೋಟರ್ಸ್‌ ಕಾರ್ಪೊರೇಷನ್‌ ಏಷ್ಯಾ ಖಂಡದಲ್ಲಿ ತನ್ನ ವಾಣಿಜ್ಯವಹಿವಾಟನ್ನು ವಿಸ್ತರಿಸಲು ತುದಿಗಾಲಿನಲ್ಲಿ ನಿಂತಿದ್ದು, ಮಾರುತಿ ಉದ್ಯೋಗ್‌ನ ಉದ್ದೇಶಿತ ಖಾಸಗೀಕರಣದ ಲಾಭ ಈ ಸಂಸ್ಥೆಗೆ ದೊರಕಲಿದೆ ಎಂದು ಪತ್ರಿಕೆ ಹೇಳಿದೆ.

ಮಾರುತಿ ಉದ್ಯೋಗ್‌ ಸಂಸ್ಥೆಯಲ್ಲಿ ಭಾರದ ಸರಕಾರ ಹಾಗೂ ಜಪಾನ್‌ ಸುಝುಕಿ ಮೋಟರ್‌ ನಿಗಮದ ಸಮಪಾಲಿದೆ. ಎರಡೂ ಶೇ. 50ರ ಪಾಲುದಾರಿಕೆ ಹೊಂದಿವೆ. ಆದರೆ, ಜನರಲ್‌ ಮೋಟಾರ್ಸ್‌ ಕಾರ್ಪೊರೇಷನ್‌ ಸುಝುಕಿ ಮೋಟರ್ಸ್‌ನಲ್ಲಿ ಶೇ. 20ರಷ್ಟು ಪಾಲುದಾರಿಕೆ ಪಡೆದಿದೆ. ಈಗ ಭಾರತ ಸರಕಾರ ಮಾರುತಿ ಉದ್ಯೋಗ್‌ನ ಷೇರು ಮಾರಾಟ ಮಾಡಿದರೆ, ಜನರಲ್‌ ಮೋಟಾರ್ಸ್‌ ಸಂಸ್ಥೆಯ ಮೇಲೆ ಹಿಡಿತ ಸಾಧಿಸುತ್ತದೆ ಎಂದೂ ವರದಿ ಹೇಳಿದೆ.

ಇದಕ್ಕೆ ಮತ್ತೂ ಒಂದು ಕಾರಣ ಇದೆ. 50ರಷ್ಟು ಪಾಲುದಾರಿಕೆ ಹೊಂದಿರುವ ಸುಝುಕಿ ಮೋಟರ್ಸ್‌ ಭಾರತ ಸರಕಾರ ಮಾರಲಿಚ್ಛಿಸಿರುವ ಷೇರುಗಳನ್ನು ಕೊಳ್ಳಲು ತಾನು ಇಚ್ಛಿಸುವುದಿಲ್ಲ ಎಂದು ಈಗಾಗಲೇ ಸ್ಪಷ್ಟಪಡಿಸಿದೆ ಎಂಬ ಸುಳಿವೂ ದೊರೆತಿದೆ. ಮಿಗಿಲಾಗಿ ದೇವೂ, ಫೋರ್ಡ್‌ಗಳ ಭರಾಟೆಯಲ್ಲಿ 15-20 ವರ್ಷಗಳಷ್ಟು ಹಳೆಯದಾದ ಮಾರುತಿ ಕಾರು ಮಾದರಿಗಳು ಮಾರುಕಟ್ಟೆಯಲ್ಲಿ ತಮ್ಮ ಹಿಂದಿನ ಆಕರ್ಷಣೆ ಹಾಗೂ ಬೆಲೆ ಕಳೆದುಕೊಳ್ಳುತ್ತಿವೆ.