ಡಿ. 29ಕ್ಕೆ ಹೊಸ ಮಾಧ್ಯಮ ತರಬೇತಿ ಸಂಸ್ಥೆ ಉದ್ಘಾಟನೆ

ಬೆಂಗಳೂರು : ಪತ್ರಿಕೋದ್ಯಮ ಕಲೆಯನ್ನು ವಿಶೇಷ ಆಸ್ಥೆಯಿಂದ ಕಲಿಸುವ ಉದ್ದಿಶ್ಯ ಹೊಂದಿರುವ 'ಇಂಡಿಯನ್‌ ಇನ್ಸ್‌ಟಿಟ್ಯೂಟ್‌ ಆಫ್‌ ಜರ್ನಲಿಸಂ ಅಂಡ್‌ ನ್ಯೂ ಮೀಡಿಯಾ"ವನ್ನು ನಗರದ ಹೊರವಲದಲ್ಲಿರುವ ಕುಂಬಳಗೋಡಿನಲ್ಲಿ ಕೇಂದ್ರ ಕಾನೂನು ಸಚಿವ ಅರುಣ್‌ ಜೈಟ್ಲಿ ಡಿಸೆಂಬರ್‌ 29 ರಂದು ಉದ್ಘಾಟಿಸಲಿದ್ದಾರೆ.

ಭಾರತದಲ್ಲೇ ಇಂಥ ಸಂಸ್ಥೆ ತಲೆ ಎತ್ತುತ್ತಿರುವುದು ಇದೇ ಮೊದಲು. ಕೊಲಂಬಿಯಾ ಪತ್ರಿಕೋದ್ಯಮ ಪದವಿ ವಿದ್ಯಾಲಯದ ಪ್ರತಿಬಿಂಬ ಭಾರತೀಯ ಮೂಲದ ಈ ಸಂಸ್ಥೆ. ಇಲ್ಲಿ 2 ಸೆಮಿಸ್ಟರ್‌ಗಳ ಡಿಪ್ಲೊಮ ಪದವಿ ಬೋಧಿಸಲಾಗುತ್ತದೆ. ಇನ್ನು 2 ವರ್ಷಗಳಲ್ಲಿ ದೂರದರ್ಶನ ಮತ್ತು ರೇಡಿಯೋ ಜರ್ನಲಿಸಂ ಕೋರ್ಸ್‌ಗಳನ್ನೂ ಪ್ರಾರಂಭಿಸುವ ಉದ್ದೇಶ ಹೊಂದಿರುವ ಈ ಸಂಸ್ಥೆ ಯನ್ನು ಆದಿಚುಂಚನಗಿರಿ ಸಂಸ್ಥಾನ ಹಾಗೂ ಜಾರ್ಜ್‌ ಪ್ರತಿಷ್ಠಾನ ಜಂಟಿಯಾಗಿ ಸ್ಥಾಪಿಸಿವೆ.

ಜಾರ್ಜ್‌ ಪ್ರತಿಷ್ಠಾನದ ವ್ಯವಸ್ಥಾಪಕ ಸಂಸ್ಥಾಪಕ ಅಬ್ರಹಾಂ ಹಾಗೂ ಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿ ಮಾಧ್ಯಮಗಳಿಗೆ ಮಂಗಳವಾರ ಈ ವಿಷಯ ತಿಳಿಸಿದರು. ಮೊದಲ ವರ್ಷ 40 ವಿದ್ಯಾರ್ಥಿಗಳನ್ನು ಆರಿಸಿ, ಮುದ್ರಣ ಹಾಗೂ ವೆಬ್‌ ಪತ್ರಿಕೋದ್ಯಮದ ಶಿಕ್ಷಣ ಬೋಧಿಸಲಾಗುವುದು. ಪ್ರಾಯೋಗಿಕ ಕಲಿಕೆಗೆ ಇಲ್ಲಿ ಒತ್ತು. ಸಾಧ್ಯವಾದಲ್ಲಿ ವಿದ್ಯಾರ್ಥಿಗಳನ್ನು ಇಂಟರ್ನ್‌ಷಿಪ್‌ಗೆ ಅಮೆರಿಕೆಗೆ ಕಳುಹಿಸಿಕೊಡಲಾಗುವುದು ಎಂದು ಹೇಳಿದರು.

ಇಲ್ಲಿ ಶುಲ್ಕ ಭಾರಿ ಎನಿಸಬಹುದು. ಆದರೆ ವಾಸ್ತವವಾಗಿ ಅಭ್ಯಾಸ ಮಾಡುವವರಿಂದ ನಮಗೆ ಖರ್ಚಿನ ಅರ್ಧದಷ್ಟು ಹಣ ಮಾತ್ರ ಸಂದಾಯವಾಗುತ್ತದೆ. ಒಟ್ಟು ಶುಲ್ಕ 1.2 ಲಕ್ಷ ರುಪಾಯಿ. ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಮಂಡಲಿಯ ಮಾನ್ಯತೆ ಪಡೆಯಲೂ ಸಂಸ್ಥೆ ಪ್ರಯತ್ನಿಸುತ್ತಿದೆ ಎಂದು ಜಾರ್ಜ್‌ ತಿಳಿಸಿದರು.

ಕೇಂದ್ರ ಪ್ರವಾಸ ಖಾತೆ ಸಚಿವ ಅನಂತ ಕುಮಾರ್‌ ಹಾಗೂ ಮುಖ.್ಯಮಂತ್ರಿ ಎಸ್‌.ಎಂ.ಕೃಷ್ಣ ಉದ್ಘಾಟನಾ ಸಮಾರಂಭದ ಮುಖ್ಯ ಅತಿಥಿಗಳು. ನ್ಯೂಯಾರ್ಕ್‌ ಟೈಮ್ಸ್‌ ಪತ್ರಿಕೆಯ ಇಂಗ್ಲೆಂಡ್‌ ಶಾಖೆಯ ಮುಖ್ಯಸ್ಥ ಬಾರ್ಬರ ಕ್ರಾಸೆಟ್‌ ಪ್ರಾಸ್ತಾವಿಕ ಭಾಷಣ ಮಾಡಲಿದ್ದಾರೆ.

English summary

Indias first of its kind of journalism training institute at bangalore