ಗುಲ್ಬರ್ಗಾವನ್ನು ಹಿಮ್ಮೆಟ್ಟಿಸಿದ ಶಿವಮೊಗ್ಗ

ಬೆಂಗಳೂರು : ರಾಜ್ಯದ ಅತಿ ಕನಿಷ್ಠ ಉಷ್ಣಾಂಶದ ದಾಖಲೆಯನ್ನು ಗುಲ್ಬರ್ಗಾದಿಂದ ಶಿವಮೊಗ್ಗ ಕಸಿದುಕೊಂಡಿದೆ. 7, 8, 9 ಡಿಗ್ರಿ ತಾಪಮಾನದಿಂದ ದಾಖಲೆ ಮೆರೆದಿದ್ದ ಗುಲ್ಬರ್ಗಾದಲ್ಲಿ ಇಂದು ಬಿಸಿಲು ಮೂಡಿದೆ. ಆದರೆ, ಶಿವಮೊಗ್ಗದಲ್ಲಿ ತಾಪಮಾನದಲ್ಲಿ ಕುಸಿತ ಕಂಡು ಬಂತು. ಅಲ್ಲಿ 12.1 ಡಿಗ್ರಿ ಕನಿಷ್ಠ ಉಷ್ಣಾಂಶ ದಾಖಲಾಗಿದೆ.

ಉಳಿದಂತೆ ರಾಜ್ಯದಲ್ಲಿ ಒಣಹವೆ ಮುಂದುವರಿದಿದೆ. ಒಣ ಹವೆಯ ಜತೆ ಜತೆಗೆ ಚಳಿಯ ಪ್ರಭಾವವೂ ಹೆಚ್ಚಾಗೇ ಕಂಡುಬಂದಿದೆ. ಕಳೆದ 24 ಗಂಟೆಗಳ ಅವಧಿಯಲ್ಲಿ ರಾಜ್ಯದ ಬಹುತೇಕ ಕಡೆಗಳಲ್ಲಿ ಕನಿಷ್ಠ ತಾಪಮಾನದಲ್ಲಿ ಏರಿಕೆ ಆಗಿದೆ.

ದಕ್ಷಿಣ ಒಳನಾಡಿನ ಒಂದೆರಡುಕಡೆ ತಾಪಮಾನದಲ್ಲಿ ಬದಲಾವಣೆ ಉಂಟಾಗಿದೆ. ಒಟ್ಟಾರೆ ರಾಜ್ಯದ ಹವಾಮಾನದಲ್ಲಿ ಹೆಚ್ಚಿನ ಬದಲಾವಣೆಗಳೇನೂ ಕಂಡುಬಂದಿಲ್ಲ. ಮುನ್ಸೂಚನೆಯ ರೀತ್ಯ ರಾಜ್ಯದಲ್ಲಿ ಮತ್ತೆ ಒಣಹವೆ ಮುಂದುವರಿಯಲಿದೆ. ಸ್ಥಳೀಯ ಹವಾಮಾನ ಮುನ್ಸೂಚನೆಯಂತೆ ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಮುಖ್ಯವಾಗಿ ನಿರ್ಮಲ ಆಕಾಶ ಇದ್ದು, ಕನಿಷ್ಠ ತಾಪಮಾನ 13 ಡಿಗ್ರಿ ಸೆಲ್ಸಿಯಸ್‌ ಆಜುಬಾಜಿನಲ್ಲಿ ವಿಹರಿಸಲಿದೆ.