ಶಿವಮೊಗ್ಗ : ರಸ್ತೆತಡೆ, ಮೆಕ್ಕೆಜೋಳ ಭಸ್ಮ

ಶಿವಮೊಗ್ಗ : ನಾಡಿನಾದ್ಯಂತ ಮುಂದುವರೆದ ರೈತರ ವ್ಯಥೆ- ಕಥೆಯ ಇನ್ನೊಂದು ಉದಾಹರಣೆ.....

ನಗರದಲ್ಲಿ ರೈತರ ಮೆಕ್ಕೆಜೋಳ ಖರೀದಿಸಲು ಭಾರತ ಆಹಾರ ನಿಗಮ ಖರೀದಿ ಕೇಂದ್ರ ತೆರೆದಿದೆ. ಆದರೆ ಕಳೆದ ಆರೇಳು ದಿನಗಳಿಂದ ಖರೀದಿ ಸ್ಥಗಿತಗೊಂಡಿದೆ. ಕೊಂಡುಕೊಂಡ ಮೆಕ್ಕೆಜೋಳ ದಾಸ್ತಾನಿಗೆ ಗೋದಾಮಿನ ಕೊರತೆಯೇ ಇದಕ್ಕೆ ಕಾರಣ. ಖರೀದಿ ಸ್ಥಗಿತವನ್ನು ವಿರೋಧಿಸಿ ಜಿಲ್ಲಾ ಬಿ.ಜೆ.ಪಿ. ಅಧ್ಯಕ್ಷ ಆಯನೂರು ಮಂಜುನಾಥ್‌ ನೇತೃತ್ವದಲ್ಲಿ ಮಂಗಳವಾರ ಮಧ್ಯಾಹ್ನ ರೈತರು ಸುಮಾರು 3 ಗಂಟೆ ಕಾಲ ಶಿವಮೊಗ್ಗ- ಸಾಗರ ರಸ್ತೆ ತಡೆ ನಡೆಸಿದರು. ಜೋಳ ಸುಟ್ಟು ಸ್ಥಳೀಯ ಅಧಿಕಾರಿಗಳ ಗಮನ ಸೆಳೆದರು.

ಜಿಲ್ಲಾಧಿಕಾರಿ ಪಿ.ಗಣೇಶನ್‌, ತಹಸೀಲ್ದಾರ್‌ ಗಣಪತಿ ಭಟ್‌ ಹಾಗೂ ಜಿಲ್ಲಾ ಅಪರ ಪೊಲೀಸ್‌ ಮುಖ್ಯಾಧಿಕಾರಿ ಈಶ್ವರಚಂದ್ರ ವಿದ್ಯಾಸಾಗರ್‌ ಪ್ರತಿಭಟನೆ ನಡೆಸಿದ ರೈತರೊಂದಿಗೆ ಮಾತುಕತೆ ನಡೆಸಿದರು. ಇನ್ನೊಂದು ವಾರದೊಳಗೆ ಅಬ್ಬಲಗೆರೆಯ ತಂಬಾಕು ಮಾರಾಟ ಕೇಂದ್ರದಲ್ಲಿ ಮೆಕ್ಕೆಜೋಳ ದಾಸ್ತಾನಿಗೆ ಅವಕಾಶ ಮಾಡಿಕೊಡುವ ಭರವಸೆ ಕೊಟ್ಟರು. ರೈತರ ಒಂದು ಕಾಳು ಜೋಳವನ್ನೂ ಬಿಡದಂತೆ ಎಲ್ಲವನ್ನೂ ಖರೀದಿಸಿಯೇ ತೀರುತ್ತೇವೆ ಎಂದು ಮಾತುಕೊಟ್ಟರು.

ಬಾಲಂಗೋಚಿ : ಸಂಕ್ರಾಂತಿ ಹತ್ತಿರಾಗುತ್ತಿದೆ. ಇನ್ನಷ್ಟು ಬೆಳೆಗಳ ರಾಶಿ ಮಾರುಕಟ್ಟೆಗೆ ಬರುತ್ತಿದೆ.ಯುದ್ಧಕಾಲೇ ಶಸ್ತ್ರಾಭ್ಯಾಸ ಕೂಡದೆಂಬುದನ್ನು ಸರ್ಕಾರ ಮನಗಾಣಲಿ.

(ಇನ್ಫೋ ವಾರ್ತೆ)