ಮ್ಯಾಚ್‌ಫಿಕ್ಸಿಂಗ್‌ : ಸದ್ಯದಲ್ಲೇ ಭಾರತಕ್ಕೆ ಐಸಿಸಿ ತನಿಖಾ ಅಧಿಕಾರಿ

ಲಂಡನ್‌ : ಅಜರ್‌ ಹಾಗೂ ಅಜಯ್‌ ಶರ್ಮಗೆ ಆಜೀವ ನಿಷೇಧ ಹೇರಿದ ಬಿಸಿಸಿಐ ನಿರ್ಣಯದಿಂದ ಅಂತರರಾಷ್ಟ್ರೀಯ ಕ್ರಿಕೆಟ್‌ ಮಂಡಲಿ ಎಚ್ಚರಗೊಂಡಿದೆ.

ಮಂಗಳವಾರ ಚೆನ್ನೈನಲ್ಲಿ ಬಿಸಿಸಿಐ ಸಭೆ ನಡೆಯುತ್ತಿದ್ದರೆ, ಇಲ್ಲಿ ಐಸಿಸಿಯ ಭ್ರಷ್ಟಾಚಾರ ತನಿಖಾ ಘಟಕದ ಮುಖ್ಯ ಅಧಿಕಾರಿ ಪಾಲ್‌ ಕಾಂಡೋನ್‌ ಹಾಗೂ ಆಸ್ಟ್ರೇಲಿಯಾ ಕ್ರಿಕೆಟ್‌ ಮಂಡಲಿಯ ವಿಶೇಷ ತನಿಖಾಧಿಕಾರಿ ಗ್ರೆಗ್‌ ಮೆಲಿಕ್‌ ಇನ್ನೊಂದು ಚರ್ಚೆ ನಡೆಸಿದ್ದಾರೆ. ಬಿಸಿಸಿಐ ನಿರ್ಣಯ ಹೊರ ಹೊಮ್ಮುತ್ತಿದ್ದಂತೆ ಇವರು ಭಾರತಕ್ಕೆ ಹೊರಡುವ ನಿರ್ಧಾರ ಕೈಗೊಂಡಿದ್ದಾರೆ.

ಮ್ಯಾಚ್‌ಫಿಕ್ಸಿಂಗ್‌ ಸಂಬಂಧಿಸಿದಂತೆ ಸಿಬಿಐ ವರದಿಯನ್ನು ಪರಿಶೀಲಿಸಿ, ದೆಹಲಿ ಪೊಲೀಸರು ಮತ್ತು ಬಿಸಿಸಿಐ ಅಧಿಕಾರಿಗಳ ಜೊತೆ ಕಾಂಡೋನ್‌ ಮತ್ತು ಮೆಲಿಕ್‌ ಚರ್ಚಿಸಲಿದ್ದಾರೆ.

ಭಾರತದಲ್ಲಿ ಮ್ಯಾಚ್‌ಫಿಕ್ಸಿಂಗ್‌ ತನಿಖೆ ನಡೆಸಿದ ಸಿಬಿಐ ತನ್ನ ವರದಿಯಲ್ಲಿ ಒಂಬತ್ತು ವಿದೇಶೀ ಕ್ರಿಕೆಟಿಗರನ್ನು ಹೆಸರಿಸಿದೆ. ಅದರ ಬಗೆಗೆ ಪೂರ್ಣ ಮಾಹಿತಿ ಕಲೆಹಾಕಿಕೊಂಡು ಬಂದು ನಮ್ಮ ತನಿಖೆಯನ್ನು ಚುರುಕಾಗಿಸಲು ಸಾಧ್ಯವಾಗುತ್ತದೆ. ಈ ಕಾರಣದಿಂದ ನಾವು ಭಾರತಕ್ಕೆ ಹೊರಡುವ ನಿರ್ಧಾರ ಕೈಗೊಂಡೆವು ಎಂದು ಕಾಂಡೋನ್‌ ತಿಳಿಸಿದರು. ಕಾಂಡೋನ್‌ ಮತ್ತು ಮೆಲಿಕ್‌ ಭಾರತಕ್ಕೆ ಎಂದು ಹೊರಡುತ್ತಾರೆ ಎಂಬುದು ಇನ್ನೂ ನಿರ್ಧಾರವಾಗಿಲ್ಲ.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಆಟದ ಅಂಗಳ