ಬೆಂಗಳೂರೊಂದು ಮೃತ್ಯು ಕೂಪ

ಬೆಂಗಳೂರು : ಕರ್ನಾಟಕದ ರಾಜಧಾನಿ ಬೆಂಗಳೂರಲ್ಲಿ ವಾಹನಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಅಂತೆಯೇ ಅಪಘಾತಗಳ ಸಂಖ್ಯೆ ಕೂಡ. ಬೆಂಗಳೂರಿನಲ್ಲಿ ನಿತ್ಯವೂ ಹತ್ತಾರು - ನೂರರು ದೊಡ್ಡ ಹಾಗೂ ಸಣ್ಣಪುಟ್ಟ ಅಪಘಾತಗಳು ಸಂಭವಿಸುತ್ತಲೇ ಇರುತ್ತವೆ.

ಆದರೆ, ಈ ಅಪಘಾತಗಳಲ್ಲಿ ಗಾಯಗೊಂಡವರೆಷ್ಟು, ಸಾವನ್ನಪ್ಪಿದವರೆಷ್ಟು ಎಂದು ನಿಮಗೆ ಗೊತ್ತೆ? ಪ್ರತಿವರ್ಷವೂ ಬೆಂಗಳೂರಿನಲ್ಲಿ ಸಂಭವಿಸುವ ಅಪಘಾತಗಳಲ್ಲಿ ಸುಮಾರು 700 ಮಂದಿ ಸಾವನ್ನಪ್ಪುತ್ತಾರೆ. ಕನಿಷ್ಠ ಏಳು ಸಾವಿರ ಮಂದಿ ಗಾಯಗೊಳ್ಳುತ್ತಾರೆ. ಕಳೆದ ಒಂದು ವಾರದಲ್ಲಿ ಸಂಭವಿಸಿದ ರಸ್ತೆ ಅಪಘಾತಗಳಲ್ಲಿ 24 ಜನರು ಸತ್ತಿದ್ದಾರೆ. 110 ಜನರು ಗಾಯಗೊಂಡಿದ್ದಾರೆ.

ಈ ವಿಷಯವನ್ನು ನಗರ ಸಂಚಾರಿ ವಿಭಾಗದ ಜಂಟಿ ಪೊಲೀಸ್‌ ಆಯುಕ್ತ ಅಜಯ್‌ ಕುಮಾರ್‌ ಸಿಂಗ್‌ ತಿಳಿಸಿದ್ದಾರೆ. ಯಶವಂತಪುರದಲ್ಲಿ ಬೆಂಗಳೂರು ಉತ್ತರ ವಲಯ ಸಂಚಾರ ಉಪ ವಿಭಾಗದ ಪೊಲೀಸರು ಆಯೋಜಿಸಿದ್ದ ರಸ್ತೆ ಸುರಕ್ಷತಾ ಜಾಗೃತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡುತ್ತಿದ್ದ ಅವರು, ಏಳರಿಂದ 15 ವರ್ಷ ವಯಸ್ಸಿನ ಮಕ್ಕಳೇ ಹೆಚ್ಚಿನ ಸಂಖ್ಯೆಯಲ್ಲಿ ಮರಣಹೊಂದುತ್ತಿದ್ದಾರೆ ಎಂಬ ಅಂಕಿ ಅಂಶವನ್ನೂ ನೀಡಿದರು.

22.52 ಲಕ್ಷ ರು. ದಂಡ : ಈ ಮಧ್ಯೆ ನಗರ ಸಂಚಾರಿ ಪೊಲೀಸರು ನವೆಂಬರ್‌ 26ರಿಂದ ಡಿಸೆಂಬರ್‌ 2ರವರೆಗಿನ ಒಂದು ವಾರದ ಅವಧಿಯಲ್ಲಿ ಮೋಟಾರು ವಾಹನ ಕಾಯಿದೆ ಹಾಗೂ ಪೊಲೀಸ್‌ ಕಾಯಿದೆ ಉಲ್ಲಂಘಿಸಿದ 18,230 ಪ್ರಕರಣಗಳಲ್ಲಿ ಒಟ್ಟು 22.52 ಲಕ್ಷ ರುಪಾಯಿ ದಂಡ ವಸೂಲಿ ಮಾಡಿದ್ದಾರೆ.

ವಾಹನ ನಿಲುಗಡೆ ಇಲ್ಲದ ಸ್ಥಳಗಳಲ್ಲಿ ವಾಹನ ನಿಲ್ಲಿಸಿ, ಸಂಚಾರಕ್ಕೆ ಅಡಚಣೆ ಉಂಟುಮಾಡಿದ 2.947 ವಾಹನಗಳನ್ನು ಹಿಡಿದು, ಚಾಲಕರಿಂದ 3.31 ಲಕ್ಷ ರುಪಾಯಿ ದಂಡ ವಸೂಲು ಮಾಡಲಾಗಿದೆ. ದ್ವಿಚಕ್ರ ವಾಹನ ಚಾಲಕರ ವಿರುದ್ಧ 7,974 ಕೇಸು ದಾಖಲಿಸಿಕೊಳ್ಳಲಾಗಿದೆ.