ಮೌಲ್ಯಯುತ ವ್ಯವಸ್ಥೆಗೆ ಸಾಹಿತ್ಯ, ಸಂಗೀತ, ಕಲೆ ಸಹಕಾರಿ: ಶರ್ಮಾ

ಬೆಂಗಳೂರು : 75 ವರ್ಷ ತುಂಬಿದ ಕನ್ನಡದ ಸಾಹಿತಿ ಡಾ. ಬಿ.ಸಿ. ರಾಮಚಂದ್ರಶರ್ಮ ಅವರಿಗೆ ಅಭಿನಂದನೆ ಹಾಗೂ ಪ್ರತಿಷ್ಠಿತ ಗೊರುರು ಪ್ರತಿಷ್ಠಾನದ ಕೈಲಾಸಂ ಪ್ರಶಸ್ತಿ ಪ್ರದಾನ ಸಮಾರಂಭ ಭಾನುವಾರ ನಗರದ ಮಿಥಿಕ್‌ ಸೊಸೈಟಿಯಲ್ಲಿ ಜರುಗಿತು.

ನೇತ್ರತಜ್ಞ ಡಾ. ಎಂ.ಸಿ. ಮೋದಿ ಅವರು, ಶರ್ಮರಿಗೆ ಕೈಲಾಸಂ ಪ್ರಶಸ್ತಿ ಪ್ರದಾನ ಮಾಡಿದರು. ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಡಾ. ರಾಮಚಂದ್ರ ಶರ್ಮರು ಮೌಲ್ಯಯುತವಾಗಿ ವ್ಯವಸ್ಥೆಗೆ ಸಾಹಿತ್ಯ, ಸಂಗೀತ, ಕಲೆ ಸಹಕಾರಿಯಾಗಿದೆ ಎಂದರು. ಸಮೂಹದ ನಂಬಿಕೆ ಹಾಗೂ ವ್ಯಕ್ತಿಯ ನಂಬಿಕೆ ಭಿನ್ನವಾದರೆ ಸಮಾಜದ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾಗುತ್ತದೆ ಎಂದೂ ಅಭಿಪ್ರಾಯಪಟ್ಟರು. ಸ್ವಂತಿಕೆಯನ್ನು ಕಾಪಾಡಿಕೊಳ್ಳುವಂತೆ ಯುವಕರಿಗೆ ಕರೆಯಿತ್ತರು.

ಅಭಿನಂದನಾ ಭಾಷಣ ಮಾಡಿದ ಪ್ರೊ. ಎಲ್‌.ಎಸ್‌. ಶೇಷಗಿರಿರಾವ್‌ ಅವರು, ಶರ್ಮರ ಮನಸ್ಸಿನಲ್ಲಿ ಗೊಂದಲವಿಲ್ಲ. ಅವರಲ್ಲಿ ಸ್ಪಷ್ಟ ನಿಲುವಿದೆ. ಶರ್ಮರು ಯಾವುದೇ ವಿಷಯದ ಜತೆ ಸುಲಭವಾಗಿ ರಾಜಿ ಮಾಡಿಕೊಳ್ಳುವವರಲ್ಲ ಎಂದರು.

ಇದೇ ಸಂದರ್ಭದಲ್ಲಿ ಕವಯತ್ರಿ ವಿ. ರಾಣಿ ಗೋವಿಂದರಾಜು ಅವರಿಗೆ ಗೊರುರು ಪ್ರತಿಷ್ಠಾನದ ವತಿಯಿಂದ ಶಾಲು ಹೊದಿಸಿ, ನೆನಪಿನ ಕಾಣಿಕೆಯಿತ್ತು ರಾಜ್ಯೋತ್ಸವ ಪುರಸ್ಕಾರವನ್ನೂ ನೀಡಲಾಯಿತು. ಸಮಾರಂಭದಲ್ಲಿ ನಿವೃತ್ತ ನ್ಯಾಯಾಧೀಶರಾದ ನಿಟ್ಟೂರು ಶ್ರೀನಿವಾಸರಾವ್‌, ಪದ್ಮಾ ರಾಮಚಂದ್ರ ಶರ್ಮ ಮೊದಲಾದವರು ಪಾಲ್ಗೊಂಡಿದ್ದರು.

ಮುಖಪುಟ / ಇವತ್ತು... ಈ ಹೊತ್ತು...