ಡಿಸೆಂಬರ್‌ 5ರಿಂದ ಅಂಚೆ ಇಲಾಖೆ ನೌಕರರ ಅನಿರ್ದಿಷ್ಟ ಮುಷ್ಕರ

ಬೆಂಗಳೂರು : ಬೇಡಿಕೆಗಳ ಈಡೇರಿಕೆ ಸಲುವಾಗಿ ಮುಷ್ಕರ ಹೂಡುವ ಸರದಿ ಈಗ ಅಂಚೆ ಇಲಾಖೆ ನೌಕರರದು. ಡಿಸೆಂಬರ್‌ ಐದರಿಂದ ಅಂಚೆ ಇಲಾಖೆ ನೌಕರರು ತಮ್ಮ ಬೇಡಿಕೆಗಳ ಈಡೇರಿಕೆಗಾಗಿ ಅನಿರ್ದಿಷ್ಟಾವಧಿ ಮುಷ್ಕರ ನಡೆಸುವ ತೀರ್ಮಾನ ಕೈಗೊಂಡಿದ್ದಾರೆ.

ಅಂಚೆ ಇಲಾಖೆ ನೌಕರರು ತಮ್ಮ ಬೇಡಿಕೆಗಳನ್ನು ಈಡೇರಿಸುವಂತೆ ನೀಡಿದ್ದ ಗಡುವು ಆಗಸ್ಟ್‌ 31ಕ್ಕೇ ಕೊನೆಗೊಂಡಿದೆ. ಈ ಸಂಬಂಧ ನೌಕರರ ಸಂಘಗಳ ಜಂಟಿ ಮಂಡಳಿ ಕೇಂದ್ರ ಸಂಪರ್ಕ ಖಾತೆ ಸಚಿವ ರಾಂ ವಿಲಾಸ್‌ ಪಾಸ್ವಾನ್‌ ಅವರಿಗೆ ಮನವಿ ಮಾಡಿದ್ದರೂ ಯಾವುದೇ ಪ್ರಯೋಜನ ಆಗಿಲ್ಲ. ಸಚಿವರು ತಮ್ಮ ಬೇಡಿಕೆಗಳಿಗೆ ಸಂಬಂಧಿಸಿದಂತೆ ಸಕಾರಾತ್ಮಕವಾಗಿ ಸ್ಪಂದಿಸಿಲ್ಲ ಎಂಬುದು ಮಂಡಳಿಯ ಆರೋಪ.

ತಾವು ಆರು ತಿಂಗಳುಗಳ ಕಾಲ ತಾಳ್ಮೆಯಿಂದ ಕಾದೆವು. ಆದರೆ, ತಮ್ಮ ತಾಳ್ಮೆಯನ್ನೇ ಸರಕಾರ ದುರುಪಯೋಗ ಪಡಿಸಿಕೊಂಡಿದೆ ಎಂದು ಹೇಳಿರುವ ಮಂಡಳಿ ಡಿ.5ರಿಂದ ಅನಿರ್ದಿಷ್ಟ ಕಾಲದ ಮುಷ್ಕರ ನಡೆಸಲು ಸಜ್ಜಾಗಿದೆ. ಈ ವಿಷಯವನ್ನು ಜಂಟಿ ಮಂಡಳಿಯ ರಾಜ್ಯ ಘಟಕದ ಅಧ್ಯಕ್ಷ ಪಿ. ವಿಲ್ಸನ್‌ ಮತ್ತು ಸಂಚಾಲಕ ಆರ್‌.ಜಿ. ಸವಣೂರ ಅವರು ಪತ್ರಿಕಾ ಹೇಳಿಕೆಯಲ್ಲಿ ಪ್ರಕಟಿಸಿದ್ದಾರೆ.