ಪ್ರಮಾಣವಚನ ಸ್ವೀಕರಿಸದೆ ಅಮೆರಿಕ ಪೌರತ್ವ ಪಡೆದ ವಿಜಯ ರಾಜನ್‌

ಲಾಸ್‌ ಏಂಜಲೀಸ್‌ : ಅಮೆರಿಕ ಇತಿಹಾಸದಲ್ಲಿ ಮೊಟ್ಟ ಮೊದಲ ಬಾರಿಗೆ ಪ್ರಮಾಣ ವಚನ ಸ್ವೀಕರಿಸದೆ ಅಮೆರಿಕಪೌರತ್ವ ಗಳಿಸಿದ ಗೌರವ,ಭಾರತೀಯ ಮೂಲದ 25 ರ ಹರಯದ ವಿಜಯ ರಾಜನ್‌ ಅವರಿಗೆ ಸಂದಿದೆ.

ನರ ಮಂಡಲ ಹಾಗೂ ಸ್ನಾಯುಗಳ ಸಮಸ್ಯೆ ಎದುರಿಸುತ್ತಿರುವ ವಿಜಯ ರಾಜನ್‌ ಅವರಿಗೆ ಮಾತನಾಡಲೂ ಬರುವುದಿಲ್ಲ . ಆದ್ದರಿಂದ ಪ್ರಮಾಣ ವಚನ ಸ್ವೀಕರಿಸುವ ವಿಧಿಯಿಂದ ಅವರಿಗೆ ವಿನಾಯಿತಿ ನೀಡಲಾಗಿದೆ. ಆದರೆ, ಪೌರತ್ವ ದಕ್ಕುವ ಹಿನ್ನೆಲೆಯಲ್ಲಿ ವಿಜಯ್‌ ಅವರ ತಂದೆ ಸುಂದರರಾಜನ್‌ ಬಹಳ ದೊಡ್ಡ ಕಾನೂನು ಸಮರವನ್ನೇ ನಡೆಸಿದ್ದರು.

ಸುಂದರರಾಜನ್‌ ಅವರ ಕಾನೂನು ಹೋರಾಟದ ಫಲವಾಗಿ ಅಮೆರಿಕ ಆಡಳಿತ, ಹೊಸ ಕಾನೂನಿನ ಪ್ರಕಾರ ವಿಜಯ್‌ಗೆ ಪೌರತ್ವ ನೀಡುವ ಕಾನೂನಿಗೆ ಕಳೆದ ತಿಂಗಳು ಅಧ್ಯಕ್ಷ ಕ್ಲಿಂಟನ್‌ ಅವರು ಸಹಿ ಹಾಕಿದ್ದರು. ಅಮೆರಿಕದಲ್ಲಿ ನೆಲೆಸಿರುವ ಅನಿವಾಸಿಗಳಲ್ಲಿ ಸಾವಿರಾರು ಅಂಗವಿಕಲರಿದ್ದು, ವಿಜಯ್‌ ಪ್ರಕರಣದಿಂದ ಅವರು ಅಮೆರಿಕ ಪೌರತ್ವ ಪಡೆಯುವ ಆಶಾಭಾವನೆ ಹೊಂದಿದ್ದಾರೆ.

(ಇನ್ಫೋ ವಾರ್ತೆ)