ಬೆಂಗಳೂರಲ್ಲಿ ಮಂಜಿನ ಹನಿಯಂತೆ ಬಿತ್ತು ಮಳೆ

ಬೆಂಗಳೂರು : ಇಳೆಗೆ ತಂಪೆರೆವ ಮಳೆರಾಯನ ಕಾಯಕ ರಾಜ್ಯದ ಕೆಲವೆಡೆ ಮತ್ತೆ ಮುಂದುವರಿದಿದೆ. ಬೆಂಗಳೂರಿನ ಕೆಲವು ಬಡಾವಣೆಗಳಲ್ಲಂತೂ ಬುಧವಾರ ಬಿಟ್ಟು ಬಿಟ್ಟು ಹಗುರ ಮಳೆ ಸುರಿಯಿತು. ಒಂದೆರಡು ಕಡೆ ಜೋರು ಮಳೆಯೇ ಸುರಿದು ಐದೇ ನಿಮಿಷಯದಲ್ಲಿ ತಣ್ಣಗಾಯಿತು.

ಮೊದಲೇ ಕಾದಿದ್ದ ಟಾರು ರಸ್ತೆಗಳು ಕ್ಷಣದಲ್ಲಿ ನೀರು ಹೀರಿಕೊಂಡ ಕಾರಣ ಮಳೆ ಬಿದ್ದ ಸುಳಿವೂ ಸಿಗದಾಗಿತ್ತು. ಆದರೆ, ಆಗಸದಲ್ಲಿ ಸಂಜೆ ಸುಂದರ ಕಾಮನಬಿಲ್ಲು ಮೂಡಿತ್ತು. ಗುರುವಾರ ಬೆಳಗ್ಗಿನಿಂದಲೂ ಬೆಂಗಳೂರಿನಲ್ಲಿ ಮೋಡ ಕವಿದಿದೆ. ಮಂಜಿನ ಹನಿ ಬಿದ್ದಂತೆ ನಾಲ್ಕಾರು ಹನಿಯ ಸಿಂಚನವಾಗಿದೆ. ಆದರೆ, ಯಳಂದೂರು, ಮುಳಬಾಗಲು, ಕೆ.ಜಿ.ಎಫ್‌ಗಳಲ್ಲಿ ತಲಾ 1 ಸೆಂಟಿ ಮೀಟರ್‌ ಮಳೆಯಾಗಿದೆ.

ಉಳಿದಂತೆ ದಕ್ಷಿಣ ಒಳನಾಡಿನ ಕೆಲವೆಡೆ ಚದುರಿದಂತೆ ಮಳೆಯಾಗಿದೆ. ಕರಾವಳಿ ಹಾಗೂ ಉತ್ತರ ಒಳನಾಡಿನಲ್ಲಿ ಒಣಹವೆ ಮುಂದುವರಿದಿದೆ. ಉತ್ತರ ಒಳನಾಡಿನ ಕೆಲವು ಕಡೆ ಕನಿಷ್ಠ ತಾಪಮಾನದಲ್ಲಿ ಏರಿಕೆಯೂ ಕಂಡು ಬಂದಿದೆ. ರಾಜ್ಯದ ಕಡಿಮೆ ತಾಪಮಾನ ಶಿವಮೊಗ್ಗದಲ್ಲಿ 16.1 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿದೆ.

ಮುನ್ಸೂಚನೆಯ ರೀತ್ಯ ಮುಂದಿನ 48 ಗಂಟೆಗಳ ಅವಧಿಯಲ್ಲಿ ದಕ್ಷಿಣ ಒಳನಾಡಿನ ಕೆಲವೆಡೆ ಮಳೆ ಅಥವಾ ಗುಡುಗಿನಿಂದ ಕೂಡಿದ ತುಂತುರು ಮಳೆ ಬೀಳುವ ಸಂಭವ ಇದೆ. ಉಳಿದಂತೆ ಒಣಹವೆ. ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಸಾಮಾನ್ಯವಾಗಿ ಮೋಡ ಮುಸುಕಿದ ವಾತಾವರಣ ಇದ್ದು, ಒಂದೆರಡು ಬಾರಿ ಹಗುರವಾಗಿ ಮಳೆ ನಿರೀಕ್ಷಿತ. ಕನಿಷ್ಠ ತಾಪಮಾನ 20 ಡಿಗ್ರಿ ಸೆಲ್ಸಿಯಸ್‌ ತಲುಪುತ್ತದೆ ಎನ್ನುತ್ತದೆ ಹವಾಮಾನ ವೀಕ್ಷಣಾಲಯ.