ಡಾ. ರಾಜ್‌ಕುಮಾರ್‌ ಬಿಡುಗಡೆ ಮಾಡಿಸಿದ್ದು ನಾನಲ್ಲ : ಡಾ. ಭಾನು

ಬೆಂಗಳೂರು : ರಾಜ್‌ರನ್ನು ಬಿಡುಗಡೆ ಮಾಡಿಸಿದ ಕೀರ್ತಿ ಯಾರಿಗೆ ? ಇದು ಈಗ ಬಗೆಹರಿಯದ ಪ್ರಶ್ನೆಯಾಗಿದೆ. ತಮ್ಮನ್ನು ಬಿಡುಗಡೆ ಮಾಡಿಸಿದ್ದು ಡಾಕ್ಟ್ರಮ್ಮ ಭಾನುಮತಿ ಎಂದು ರಾಜ್‌ಕುಮಾರ್‌ ಅವರೇ ಸ್ವತಃ ವಿಧಾನಸೌಧದ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ 24 ಗಂಟೆಗಳೊಳಗೆ ಚೆನ್ನೈನಲ್ಲಿ ನೆಡುಮಾರನ್‌ ವ್ಯತಿರಿಕ್ತ ಹೇಳಿಕೆ ನೀಡಿದ್ದಾರೆ.

ವೈದ್ಯೆ ಭಾನು ಅವರ ಸಲಹೆಯಂತೆ ತಾವು ಅನಾರೋಗ್ಯದ ನಾಟಕ ಆಡಿದ್ದರಿಂದಲೇ ತಮ್ಮ ಬಿಡುಗಡೆ ಆಯಿತು ಎಂಬ ಹೇಳಿಕೆಯನ್ನು ರಾಜ್‌ ಅಲ್ಲಗಳೆದಿದ್ದಾರೆ ಎಂದು ನೆಡುಮಾರನ್‌ ತಿಳಿಸಿದ್ದಾರೆ. ಈ ಸಂಬಂಧದ ರಾಜ್‌ಕುಮಾರ್‌ ಹೇಳಿಕೆಯನ್ನು ಪಳ ನೆಡುಮಾರನ್‌ ಚೆನ್ನೈನಲ್ಲಿ ಮಾಧ್ಯಮ ಪ್ರತಿನಿಧಿಗಳಿಗೆ ನೀಡಿದ್ದಾರೆ. ರಾಜ್‌ರನ್ನು ಬಿಡುಗಡೆ ಮಾಡಿಸಿದ್ದು, ತಾವೇ ಎಂದು ಹೇಳಿಕೊಂಡಿರುವ ನೆಡುಮಾರನ್‌ ಅದಕ್ಕಾಗಿ ತಾವು ವೀರಪ್ಪನ್‌ಗೆ ನೀಡಿರುವ ವಾಗ್ದಾನಗಳ ಬಗ್ಗೆ ಕೂಡ ವಿವರಿಸಿದ್ದಾರೆ.

ಡಾ. ಭಾನು ಸ್ಪಷ್ಟನೆ : ರಾಜ್‌ಕುಮಾರ್‌ ಬಿಡುಗಡೆಗೆ ತಾವೇ ಮುಖ್ಯಕಾರಣ ಎಂದು ಮಾಧ್ಯಮಗಳಲ್ಲಿ ಬಂದಿರುವ ವರದಿಗಳ ಬಗ್ಗೆ ಡಾ. ಭಾನು ಸ್ಪಷ್ಟೀಕರಣ ನೀಡಿದ್ದಾರೆ. ರಾಜ್‌ಕುಮಾರ್‌ ಅವರ ಆರೋಗ್ಯ ತಪಾಸಣೆಗಾಗಿ ಮಾತ್ರವೇ ವೈದ್ಯಯಾದ ನಾನು ಕಾಡಿಗೆ ಹೋಗಿದ್ದೆ. ಇದಕ್ಕಿಂತ ಹೆಚ್ಚಿನ ಪಾತ್ರವನ್ನೇನೂ ನಾನು ವಹಿಸಿಲ್ಲ ಎಂದು ಅವರು ಹೇಳಿದ್ದಾರೆ.

ಸಂಧಾನಕಾರರು ವೀರಪ್ಪನ್‌ ಜತೆ ಮಾತುಕತೆ ನಡೆಸುತ್ತಿದ್ದಾಗ, ನಾನು ರಾಜ್‌ ಅವರ ಆರೋಗ್ಯ ತಪಾಸಣೆ ಮಾಡಿ ಶುಶ್ರೂಷೆ ಮಾಡುತ್ತಿದ್ದೆ. ಈ ಸಂದರ್ಭದಲ್ಲಿ ತಾವು ಯಾವುದೇ ಸೂಚನೆ ನೀಡಿಲ್ಲ ಎಂದು ಅವರು ಪತ್ರಿಕಾ ಹೇಳಿಕೆಯಲ್ಲಿ ಸ್ಪಷ್ಟೀಕರಣ ನೀಡಿದ್ದಾರೆ.

ವಾರ್ತಾ ಸಂಚಯ
ಮುಖಪುಟ / ರಾಜ್‌ ಬಿಡುಗಡೆ