ಬಿಡುವು ಮುಗಿಸಿ ಬಂದ ಮಳೆರಾಯ

ಬೆಂಗಳೂರು: ರಾಜ್ಯದ ಅಂಗಳದಿಂದ ಓಟಕಿತ್ತಿದ್ದ ಮಳೆರಾಯ ಒಳನಾಡಿನಲ್ಲಿ ಸದ್ದಿಲ್ಲದೆ ಅಡಗಿದ್ದಾನೆ. ವರುಣನಿದ್ದ ಮೇಲೆ ಮಳೆ ಇಲ್ಲದಿದ್ದೀತೆ. ಬೆಳಗಾವಿಯಲ್ಲಿ 4 ಸೆಂಟಿ ಮೀಟರ್‌, ಬೆಳಗಾವಿ ವಿಮಾನ ನಿಲ್ದಾಣ ಮತ್ತು ಕಳಸದಲ್ಲಿ ತಲಾ 1 ಸೆಂಟಿ ಮೀಟರ್‌ ಮಳೆ ಆಗಿದೆ.

ಉಳಿದಂತೆ ಒಣಹವೆಯದೇ ಕಾರುಭಾರು. ಬೆಂಗಳೂರಿನಲ್ಲಿ ಮೋಡದ ಮರೆಯಿಂದ ಸೂರ್ಯ ಆಗಾಗ್ಗೆ ಇಣುಕುತ್ತಿದ್ದಾನೆ. ಹಿತವಾದ ಬಿಸಿಲು ಸ್ನಾನ ಮಾಡಿಸುತ್ತಿದ್ದಾನೆ. ಬೀಚ್‌ಗಿಂತ ಬೆಂಗಳೂರೇ ಚೆಂದ ಎನ್ನುವ ಭಾವನೆ ಮೂಡಿಸಿದ್ದಾನೆ. ಕೆಲವೆಡೆ ಚುಮುಚುಮು ಬಿಸಿಲು ಬಂದು ಒಳನಾಡಿನ ಕೆಲವು ಭಾಗಗಳ ಕನಿಷ್ಠ ಉಷ್ಣಾಂಶ ಕೊಂಚ ಏರಿದೆ.

ಕರಾವಳಿಯಲ್ಲಿ ಸಂಪೂರ್ಣ ಒಣಹವೆ ಇತ್ತೆಂದೇ ಹೇಳಬಹುದು. ಉಳಿದಂತೆ ರಾಜ್ಯದ ಹವಾಮಾನದಲ್ಲಿ ಹೆಚ್ಚಿನ ಬದಲಾವಣೆಗಳೇನೂ ಕಂಡು ಬಂದಿಲ್ಲ. ಬೆಳಗಾವಿ ವಿಮಾನ ನಿಲ್ದಾಣದಲ್ಲಿ 18.3 ಡಿಗ್ರಿ ಸೆಲ್ಸಿಯಸ್‌ ಕನಿಷ್ಠ ಉಷ್ಣಾಂಶ ದಾ-ಖ-ಲಾಗಿದೆ. ಮುನ್ಸೂಚನೆಯಂತೆ ರಾಜ್ಯಾದ್ಯಂತ ಒಣಹವೆ ಮುಂದುವರಿಯಲಿದೆ. ಸ್ಥಳೀಯ ಹವಾಮಾನ ಮುನ್ಸೂಚನೆಯಂತೆ ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶದಲ್ಲಿ ಮುಖ್ಯವಾಗಿ ಮೋಡ ಕವಿದ ವಾತಾವರಣ ಇದ್ದು, ಕನಿಷ್ಠ ಉಷ್ಣಾಂಶ 18 ಡಿಗ್ರಿ ಸೆಲ್ಸಿಯಸ್‌ ಇರುವ ಸಾಧ್ಯತೆ ಇದೆ ಎನ್ನುತ್ತದೆ ಹವಾಮಾನ ಇಲಾಖೆ.