ಪೂರ್ಣ ಸ್ಥಗಿತಗೊಂಡ ಇನ್ಸಾಟ್‌-2ಬಿ ಇನ್ನು ಪ್ರಯೋಗಗಳಿಗಷ್ಟೆ ಸೀಮಿತ

ಬೆಂಗಳೂರು : ಭಾರತದ ಬಹು ಉಪಯೋಗಿ ಉಪಗ್ರಹ ಇನ್ಸಾಟ್‌- 2ಬಿಯ ಕಾರ್ಯ ಸಂಪೂರ್ಣ ಸ್ಥಗಿತಗೊಂಡಿದ್ದು, ಅದನ್ನು ವಿವಿಧ ಪ್ರಯೋಗಗಳಿಗೆ ಬಳಸುವುದಾಗಿ ಇಸ್ರೋ ತಿಳಿಸಿದೆ.

ಕಳೆದ ಶುಕ್ರವಾರ ಭೂ ನಿಯಂತ್ರಣಕ್ಕೆ ಸಿಕ್ಕದ ಉಪಗ್ರಹವನ್ನು ವಿಜ್ಞಾನಿಗಳು ಶತಾಯ ಗತಾಯ ಯತ್ನಿಸಿ ಮತ್ತೆ ಶನಿವಾರ ನಿಯಂತ್ರಣಕ್ಕೆ ತಂದಿದ್ದರು. ಭಾನುವಾರ ಮತ್ತೆ ನಿಯಂತ್ರಣಕ್ಕೆ ಸಿಗದ ಉಪಗ್ರಹದ ಕಾರ್ಯ ಸೋಮವಾರ ಸಂಪೂರ್ಣ ಸ್ಥಗಿತಗೊಂಡಿದೆ.

ಜುಲೈ, 1993ರಲ್ಲಿ ಉಡಾಯಿಸಲಾದ 7 ವರ್ಷ ಆಯುಷ್ಯದ ಈ ಉಪಗ್ರಹದ ಕಾರ್ಯಾವಧಿ ಕಳೆದ ಜುಲೈಗೇ ಅಂತ್ಯಗೊಂಡಿತ್ತು. ಆದಾಗ್ಯೂ ಮುಂದುವರೆದ ಅದರ ಸೇವೆ ಶುಕ್ರವಾರ ಕೈಕೊಟ್ಟಿತು. ಪದೇ ಪದೇ ಭೂ ನಿಯಂತ್ರಣಕ್ಕೆ ಸಿಗದ ಈ ಉಪಗ್ರಹದ ಮೂಲಕ ವಿಎಸ್‌ಎಟಿ, ದೂರಸಂಪರ್ಕ ಇಲಾಖೆ ಮತ್ತು ದೂರದರ್ಶನ ಪ್ರಸಾರಕ್ಕೆ ಒದಗಿಸುತ್ತಿದ್ದ ಸೇವೆಗಳನ್ನು ಇಸ್ರೋ ಹಿಂತೆಗೆದುಕೊಂಡಿದೆ.

ಇನ್ಸಾಟ್‌- 2ಇ ಹಾಗೂ ಇನ್ಸಾಟ್‌- 3ಬಿ ಸೇರಿದಂತೆ ಉಳಿದ ಉಪಗ್ರಹಗಳಿಗೆ ಇನ್ಸಾಟ್‌- 2ಬಿ ಕಾರ್ಯಗಳನ್ನು ವರ್ಗಾಯಿಸಲಾಗಿದೆ. 4 ಉಪಗ್ರಹಗಳ ನೆರವಿನಿಂದ ಒಟ್ಟು 90 ಟ್ರಾನ್ಸ್‌ಪಾಂಡರ್‌ಗಳ ಸೇವೆ ಒದಗಿಸುತ್ತಿರುವ ಇಸ್ರೋ ಸಂಸ್ಥೆ ಇನ್ನೂ 10 ಟ್ರಾನ್ಸ್‌ಪಾಂಡರ್‌ಗಳನ್ನು ಥೈಕಾಂನಿಂದ ಗುತ್ತಿಗೆ ಪಡೆದಿದೆ. ಮುಂದಿನ ವರ್ಷ ಇನ್ಸಾಟ್‌- 3ಸಿಯನ್ನು ಸಂಸ್ಥೆ ಉಡಾಯಿಸಲಿದ್ದು, ಇನ್ನೂ 33 ಟ್ರಾನ್ಸ್‌ಪಾಂಡರ್‌ಗಳ ಸೇವೆ ನೀಡಲಿದೆ.

(ಯುಎನ್‌ಐ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...