ಟಿ.ವಿ ಮಕ್ಕಳ ಮೇಲೆ ದುಷ್ಪರಿಣಾಮ ಬೀರುತ್ತದೆಯೇ?

ಲಂಡನ್‌ : ಮನೇಲಿ ಮಕ್ಳು ಟಿ.ವಿ ನೋಡ್ತಾ ಇದ್ರೆ. ನಾವೆಲ್ಲಾ ಬೈದೇ ಬೈತೀವಿ. ಓದೋದು ಬಿಟ್ಟು ಸದಾ ಟಿವಿ ನೋಡ್ತಾನೆ ಅಂತ ಕೆಲವೊಮ್ಮೆ ಹೊಡೆಯೋದು ಉಂಟು. ಟಿ.ವಿ ನೋಡುವುದರಿಂದ ಮಕ್ಕಳ ನಡೆವಳಿಕೆ ಹದಗೆಡುತ್ತದೆ ಎನ್ನುವುದು ಸಾರ್ವತ್ರಿಕ ಅಭಿಪ್ರಾಯ. ಆದರೆ, ಈ ಅಭಿಪ್ರಾಯ ಸುಳ್ಳು ಎಂದು ಈಗ ಸಾಬೀತಾಗಿದೆ.

ಇಲ್ಲಿನ ಡೈಲಿ ಎಕ್ಸ್‌ಪ್ರೆಸ್‌ನಲ್ಲಿ ಬಂದಿರುವ ವರದಿ ಟಿ.ವಿ. ನೋಡುವುದರಿಂದ ಮಕ್ಕಳ ನಡೆವಳಿಕೆ ಹಾಳಾಗುವುದಿಲ್ಲ ಎಂದು ಹೇಳಿದೆ. ಬ್ರಿಟಿಷ್‌ನ ಮಕ್ಕಳ ಮನಃಶಾಸ್ತ್ರಜ್ಞರೊಬ್ಬರು ಎಂಟು ವರ್ಷಗಳ ಕಾಲ ನಡೆಸಿದ ಅಧ್ಯಯನವನ್ನು ಉದ್ದರಿಸಿರುವ ವರದಿ ಈ ನಂಬಿಕೆ ಸುಳ್ಳು ಎಂದು ಹೇಳಿದೆ.

ಪ್ರೊ. ಟೋನಿ ಕಾರ್ಲ್‌ಟನ್‌ ಅವರ ಹೆಸರನ್ನು ಉಲ್ಲೇಖಿಸಿರುವ ಈ ವರದಿ ಕಿರುಪರದೆಯ ಮೇಲೆ ಮೂಡುವ ಹಿಂಸಾತ್ಮಕ ನಡೆವಳಿಕೆ ಪಾಲಕರ ಮಾರ್ಗದರ್ಶನ ಹಾಗೂ ಉತ್ತಮ ಸಮುದಾಯದಲ್ಲಿರುವ ಮಕ್ಕಳ ಮೇಲೆ ಹಾಗೂ ಯುವಕರ ಮೇಲೆ ಪರಿಣಾಮ ಬೀರದು ಎಂದೂ ಹೇಳಿದೆ.

ನಮಗಿದು ಅನ್ವಯಿಸೀತೆ ? : ಮನಃಶಾಸ್ತ್ರಜ್ಞರ ಅಧ್ಯಯನ ಮಕ್ಕಳ ಮೇಲೆ ಟಿ.ವಿ.ಯಲ್ಲಿ ಬರುವ ಕಾರ್ಯಕ್ರಮಗಳು ಪ್ರಭಾವ ಬೀರದು ಎಂದು ಹೇಳಿದ್ದಾರೆ. ಆದರೆ, ಸಾಂಪ್ರದಾಯಿಕ ಪರಂಪರೆಯ ಭಾರತಕ್ಕೂ ಅದು ಅನ್ವಯಿಸೀತೆ ಎಂಬುದು ಈಗಿನ ಪ್ರಶ್ನೆ. ನಾವು ದೂರದರ್ಶನದಲ್ಲಿ ಹಾಗೂ ವಿವಿಧ ಕನ್ನಡ ಟಿ.ವಿ. ಚಾನೆಲ್‌ಗಳಲ್ಲಿ ಬರುವ ಕನ್ನಡ ಕಾರ್ಯಕ್ರಮಗಳನ್ನೇ ಉದಾಹರಣೆಗೆ ತೆಗೆದುಕೊಂಡರೆ, ಮಕ್ಕಳ ನಡವಳಿಕೆ ಬದಲಾಗುವುದಿಲ್ಲ ಎಂದು ಖಡಾಖಂಡಿತವಾಗಿ ಹೇಳಲು ಬರುವುದಿಲ್ಲ.

ಕನ್ನಡ ಚಲನಚಿತ್ರಗಳಲ್ಲಿ ಬರುವ ದ್ವಂದ್ವಾರ್ಥ ಸಂಭಾಷಣೆ, ಕನ್ನಡದ ಕೆಲವು ಹಾಸ್ಯ ಕಾರ್ಯಕ್ರಮಗಳಲ್ಲಿ ಬಳಸುವ ಬೈಗುಳಗಳು ಹಾಗೂ ಅಸಹ್ಯ ಅಭಿನಯವನ್ನು ಮಕ್ಕಳು ಪುನಾರಾವರ್ತಿಸುವುದನ್ನು ನಾವು ಕಾಣುತ್ತೇವೆ. ಶಕ್ತಿಮಾನ್‌ ಕಾರ್ಯಕ್ರಮ ನೋಡಿ ಪ್ರಚೋದನೆಗೆ ಒಳಗಾಗಿ ಮಕ್ಕಳು ಮಾಡಿಕೊಂಡ ಅನಾಹುತ ನಮ್ಮ ಮುಂದೆ ಜ್ವಲಂತವಾಗಿದೆ. ಬೈಗುಳವೇ ಹಾಸ್ಯ ಎಂದು ತಿಳಿದಿರುವ ನಮ್ಮ ಕಾರ್ಯಕ್ರಮ ತಯಾರಕರು, ತಿಳಿಹಾಸ್ಯವನ್ನೇ ಮರೆತು ಬಿಟ್ಟಿದ್ದಾರೆ. ಹಾಸ್ಯ ರತ್ನ ನರಸಿಂಹರಾಜು ಅವರ ಕಾಲದಲ್ಲಿದ್ದ ಅಭಿನಯ ಹಾಸ್ಯ ಇಂದು ಮೂಲೆ ಗುಂಪಾಗಿದೆ. ಇಂದಿನ ಮಕ್ಕಳು ಕೆಟ್ಟ ಮಾತುಗಳನ್ನು ಟಿ.ವಿ. ನೋಡಿಯೇ ಕಲಿತ ಉದಾಹರಣೆ ಸಾವಿರಾರು. ಸದ್ಯಕ್ಕಿದು ಮತ್ತೊಂದು ಅಧ್ಯಯನಕ್ಕೆ ಸೂಕ್ತ ವಿಷಯ. (ಎಎಫ್‌ಪಿ, ಇಂಡಿಯಾ ಇನ್‌ಫೋ ವರದಿ)