ಮಂಗಳೂರಿನಲ್ಲಿ ರಾಜ್ಯ ಮಟ್ಟದ ಕಲೋತ್ಸವ-2000

ಮಂಗಳೂರು: 12 ದಿನಗಳ ಕಾಲ ನಡೆಯಲಿರುವ ರಾಜ್ಯ ಮಟ್ಟದ ಆರನೇ‘ಕಲೋತ್ಸವ-2000’ ನವೆಂಬರ್‌ 3ರಂದು ಮಂಗಳೂರಿನ ಸಂದೇಶ ಕಲಾ ಪ್ರತಿಷ್ಠಾನದಲ್ಲಿ ಆರಂಭವಾಗಲಿದೆ.

ಕುಲಶೇಖರ ಲಯನ್ಸ್‌ ಕ್ಲಬ್‌ನ ಸಹಯೋಗದಲ್ಲಿ ಆಯೋಜಿಸಲಾಗಿರುವ ಕಲೋತ್ಸವವನ್ನು ಮಂಗಳೂರಿನ ಮೇಯರ್‌ ಸುಂದರಿ ಉದ್ಘಾಟಿಸಲಿದ್ದಾರೆ ಎಂದು ಪ್ರತಿಷ್ಠಾನದ ನಿರ್ದೇಶಕ ಫಾ.ಡೆನಿಸ್‌ ಡೇಸ ಹೇಳಿದ್ದಾರೆ. ರಾಜ್ಯದ ವಿವಿಧ ಭಾಗಗಳಿಂದ ಸುಮಾರು ಮೂರು ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಈ ಉತ್ಸವದಲ್ಲಿ ಭಾಗವಹಿಸಲಿದ್ದಾರೆ. ವಿದ್ಯಾರ್ಥಿಗಳಲ್ಲಿ ಅಡಗಿರುವ ಪ್ರತಿಭೆಗೆ ಬೆಳಕು ನೀಡುವ ದೃಷ್ಠಿಯಿಂದ ಆಯೋಜಿಸಿರುವ ಈ ಉತ್ಸವದಲ್ಲಿ ಭರತ ನಾಟ್ಯ, ಪ್ರಬಂಧ, ಭಾಷಣ, ಜಾನಪದ ನೃತ್ಯ, ಚಿತ್ರಕಲೆ, ಸಂಗೀತ, ರಸಪ್ರಶ್ನೆ, ಛದ್ಮ ವೇಷ ಮತ್ತಿತರ ಸ್ಪರ್ಧೆಗಳನ್ನು ಹಮ್ಮಿಕೊಳ್ಳಲಾಗಿದೆ. ಪ್ರತಿವರ್ಷವೂ ಸುಮಾರು ಒಂದು ಲಕ್ಷ ರೂಪಾಯಿ ವೆಚ್ಚದಲ್ಲಿ ನಡೆಯುವ ಈ ಕಾರ್ಯಕ್ರಮದಲ್ಲಿ ಸ್ಪರ್ಧೆಗಳನ್ನು ನರ್ಸರಿ, ಪ್ರಾಥಮಿಕ, ಪ್ರೌಢಶಾಲಾ ಮತ್ತು ಪಿಯುಸಿ ವಿದ್ಯಾರ್ಥಿಗಳಿಗೆ ಕನ್ನಡ ಮತ್ತು ಇಂಗ್ಲಿಷ್‌ ಮಾಧ್ಯಮಗಳಲ್ಲಿ ನಡೆಸಲಾಗುವುದು.

(ಇನ್ಫೋ ವಾರ್ತೆ)