ನೀವೀಗ ವೀಸಾಕ್ಕಾಗಿ ಚೆನ್ನೈಗೆ ಅಲೆಯಬೇಕಾದ್ದಿಲ್ಲ
ಬೆಂಗಳೂರು : ಅಕ್ಟೋಬರ್ 29ರ ಭಾನುವಾರ ಬೆಂಗಳೂರಿನ ವಿಮಾನ ನಿಲ್ದಾಣಕ್ಕೆ ಮೊಟ್ಟಮೊದಲ ಅಂತಾರಾಷ್ಟ್ರೀಯ ವಿಮಾನ ಬಂದಿಳಿದ ಐತಿಹಾಸಿಕ ದಿನ. ಈ ಸುದ್ದಿಯ ಬೆನ್ನ ಹಿಂದೆಯೇ ಅಮೆರಿಕಕ್ಕೆ ಹಾರಲಿರುವವರಿಗೆ ವೀಸಾ ನೀಡಲು ನಡೆಯುವ ಕೆಲವು ಪೂರ್ವಭಾವಿ ಸಿದ್ಧತೆಗಳ (ಡ್ರಾಪ್ ಬಾಕ್ಸ್) ಕೇಂದ್ರ ಬೆಂಗಳೂರಿನಲ್ಲಿ ಮಂಗಳವಾರ ಆರಂಭಗೊಂಡಿದೆ.
ಈ ಸಂಬಂಧ ಟಿಟಿ ಸರ್ವೀಸ್ ಕೇಂದ್ರದ ಕಛೇರಿಯನ್ನು, ಚೆನ್ನೈನಲ್ಲಿ ಅಮೆರಿಕದ ಸಲಹೆಗಾರರಾಗಿರುವ ಕ್ಲೈಡ್ ಜೋನ್ಸ್ ಉದ್ಘಾಟಿಸಿದ್ದಾರೆ. ಇಂಥ ಕಛೇರಿ ಚೆನ್ನೈನಲ್ಲಿ ಈಗಾಗಲೇ ಕಳೆದ ಫೆಬ್ರವರಿಯಿಂದ ಕೆಲಸ ನಿರ್ವಹಿಸುತ್ತಿದೆ. ಈ ಕೇಂದ್ರದ ವತಿಯಿಂದ ಅಮೆರಿಕಾಕ್ಕೆ ಹೋಗಲಿರುವವರಿಗೆ ವೀಸಾ ನೀಡಲು ಕೇವಲ 48ಗಂಟೆಯಿಂದ 72 ಗಂಟೆಗಳೊಳಗೆ ಪೂರ್ವಭಾವಿ ಕೆಲಸಗಳನ್ನು ಮುಗಿಸಿಕೊಡಲಾಗುವುದು.
ರಾಜ್ಯದ ಅರ್ಜಿದಾರರು ಈ ಕೇಂದ್ರದ ಮೂಲಕ ತಮ್ಮ ವೀಸಾ ಪಡೆಯಬಹುದು. 30 ಸಾವಿರ ಎಚ್1 ಬಿ ವಿಸಾ ಸೇರಿದಂತೆ ಒಂದು ಲಕ್ಷ 60 ಸಾವಿರ ಅರ್ಜಿಗಳನ್ನು ಚೆನ್ನೈನ ಕಛೇರಿ ಪರಿಶೀಲಿಸಿ ದಾಖಲೆ ಮಾಡಿದೆ. ಈ ಕೇಂದ್ರದ ಮೂಲಕ ಅರ್ಜಿ ಸಲ್ಲಿಸುವವರು ಸಂದರ್ಶನಕ್ಕೆ ಖುದ್ದಾಗಿ ಹಾಜರಾಗಬೇಕಾದ್ದಿಲ್ಲ. ಇಂಥದೇ ಇನ್ನೊಂದು ಕೇಂದ್ರ ಹೈದರಾಬಾದಿನಲ್ಲಿ ನವೆಂಬರ್ 15ರಿಂದ ಕಾರ್ಯಾರಂಭ ಮಾಡಲಿದೆ ಎಂದು ಎಂದು ಜೋನ್ಸ್ ತಿಳಿಸಿದ್ದಾರೆ.