ಮತ್ತೆ ಚುರುಕುಗೊಂಡ ಮುಂಗಾರು ಮಳೆ

ಬೆಂಗಳೂರು : ಬೆಂಗಳೂರಿನಲ್ಲಿ ಜಿಟಿ ಜಿಟಿ ಮಳೆ ಮುಂದುವರಿದಿರುವಂತೆಯೇ ದಕ್ಷಿಣ ಒಳನಾಡಿನಲ್ಲಿ ಮುಂಗಾರು ಚುರುಕುಗೊಂಡಿದೆ. ತೀರಪ್ರದೇಶ ಮತ್ತು ಉತ್ತರ ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಮಳೆಯಾಗಿದೆ.

ಮುನಿರಾಬಾದ್‌, ಚನ್ನಪಟ್ಟಣ, ಬಂಗಾರಪೇಟೆಗಳಲ್ಲಿ ತಲಾ 4 ಸಂಟಿಮೀಟರ್‌, ಯಲ್ಬುರ್ಗಾ, ಕೆ.ಜಿ.ಎಫ್‌ ಮತ್ತು ಬೆಂಗಳೂರುಗಳಲ್ಲಿ ತಲಾ ಮೂರು ಸೆಂಟಿಮೀಟರ್‌, ಮೂಡುಬಿದರೆ, ಬೆಳ್ತಂಗಡಿ, ಹಾವೇರಿ, ಮೈಸೂರು ಮತ್ತು ಸಿ. ಆರ್‌. ನಗರಗಳಲ್ಲಿ ತಲಾ ಒಂದು ಸೆಂಟಿಮೀಟರ್‌ ಮಳೆ ಬಿದ್ದಿದೆ.

ಗುಲ್ಬರ್ಗಾದಲ್ಲಿ ಗರಿಷ್ಠ 33.4 ಡಿಗ್ರಿ ಸೆಲಿಷಿಯಸ್‌ ಮತ್ತು ಬೆಳಗಾವಿಯಲ್ಲಿ ಕನಿಷ್ಠ 18. 3 4 ಡಿಗ್ರಿ ಸೆಲಿಷಿಯಸ್‌ ಉಷ್ಣಾಂಶ ದಾಖಲಾಗಿದೆ. ಮಂಗಳವಾರದ ಬೆಳಗಿನವರೆಗಿನ ಹವಾ ಮನ್ಸೂಚನೆಯಂತೆ ದಕ್ಷಿಣ ಒಳನಾಡಿನ ಜಿಲ್ಲೆಗಳ ಅನೇಕ ಪ್ರದೇಶಗಳಲ್ಲಿ ಹಗುರ ಇಲ್ಲವೆ ಸಾಧಾರಣ ಮಳೆಯಾಗಲಿದೆ. ತೀರಪ್ರದೇಶ ಮತ್ತು ಉತ್ತರ ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಮಳೆ ಬೀಳುವ ಸಂಭವವಿದೆ. ಬೆಂಗಳೂರಿನ ಸುತ್ತಮುತ್ತಾ ಮೋಡ ಮುಸುಕಿದ ವಾತಾವರಣವಿರಲಿದ್ದು, ಸಂಜೆ ಅಥವಾ ರಾತ್ರಿ ಒಂದೆರಡು ಬಾರಿ ಗುಡುಗಿನಿಂದ ಕೂಡಿದ ಮಳೆಯಾಗಬಹುದು .