ಆಂಧ್ರದಿಂದ ಸಿಹಿಸುದ್ದಿ, ಬೆಂಗಳೂರಿನಲ್ಲಿ ಚುಮುಚುಮು ಮಳೆ

ಬೆಂಗಳೂರು : ನೆರೆಯ ಆಂಧ್ರದಿಂದ ಇದ್ದುದರಲ್ಲಿ ಸಂತಸಪಡುವ ಸುದ್ದಿ ಬಂದಿದೆ. ಅದು ರಾಜ್ಯದ ತೀರಪ್ರದೇಶಗಳನ್ನು ಅಪ್ಪಳಿಸಲಿದ್ದ ಚಂಡಮಾರುತ ದುರ್ಬಲಗೊಂಡಿದೆ ಎಂಬ ಸಮಾಚಾರವನ್ನು ಹೊತ್ತು ತಂದಿದೆ. ಗಂಟೆಗೆ 100 ಕಿಲೋಮೀಟರ್‌ ವೇಗದಲ್ಲಿ ಬೀಸಲಿದೆ ಎಂದು ಹೇಳಲಾಗಿದ್ದ ಚಂಡಮಾರುತದ ವೇಗ 40 ಕಿಲೋಮೀಟರ್‌ಗಿಳಿದಿದೆ.

ಇತ್ತ ರಾಜ್ಯಾದ್ಯಂತ ಮುಂಗಾರು ದುರ್ಬಲಗೊಂಡಿದೆ. ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಮಳೆಯಾಗಿದೆ. ಸಿರಗುಪ್ಪದಲ್ಲಿ 2 ಸೆಂಟಿಮೀಟರ್‌, ಸುಬ್ರಹ್ಮಣ್ಯ, ಆಲಮಟ್ಟಿಗಳಲ್ಲಿ ತಲಾ 1 ಸೆಂಟಿಮೀಟರ್‌ ಮಳೆಯಾಗಿದೆ. ಕೆಲ ಜಿಲ್ಲೆಗಳಲ್ಲಿ ಉಶ್ಣಾಂಶದಲ್ಲಿ ಬದಲಾವಣೆ ಕಂಡುಬಂದಿದೆ. ಉಳಿದಂತೆ ತೀರಪ್ರದೇಶದ ಜಿಲ್ಲೆಗಳು ಮತ್ತು ಒಳನಾಡಿನ ಪ್ರದೇಶಗಳಲ್ಲಿ ಉಷ್ಣಾಂಶ ಗಮನಾರ್ಹ ಪ್ರಮಾಣದಲ್ಲಿ ಬದಲಾಗಿಲ್ಲ.

ಗುಲ್ಬರ್ಗಾದಲ್ಲಿ ಗರಿಷ್ಠ 31. 5 ಡಿಗ್ರಿ ಸೆಲಿಸಿಯಸ್‌ ಮೈಸೂರಿನಲ್ಲಿ ಕನಿಷ್ಠ 21 ಡಿಗ್ರಿ ಸೆಲಿಸಿಯಸ್‌ ಉಷ್ಣಾಂಶ ದಾಖಲಾಗಿದೆ. ಶನಿವಾರ ಬೆಳಗಿವವರೆಗಿನ ಹವಾ ಮನ್ಸೂಚನೆಯಂತೆ ಒಳನಾಡು ಮತ್ತು ತೀರಪ್ರದೇಶದ ಕೆಲವು ಕಡೆ ಮಳೆಯಾಗಲಿದೆ. ಉತ್ತರ ಒಳನಾಡಿನ ಕೆಲವು ಮತ್ತು ದಕ್ಷಿಣ ಒಳನಾಡು ಹಾಗೂ ತೀರಪ್ರದೇಶದ ಕೆಲವು ಸ್ಥಳಗಳಲ್ಲಿ ಹಗುರ ಇಲ್ಲವೇ ಸಾಧಾರಣ ಮಳೆಯಾಗಲಿದೆ.

ಬೆಂಗಳೂರಿನ ಸುತ್ತಮುತ್ತ ಮೊಡ ಮುಸುಕಿದ ವಾತಾವರಣವಿರಲಿದ್ದು ಸಂಜೆ ವೇಳೆ ಮಳೆ ಬರುವ ನಿರೀಕ್ಷೆ ಇದೆ. ಗುರುವಾರ ಸಂಜೆ ಚುಮುಚುಮು ಮಳೆ ಬಂದಿದೆ.