‘ಭಾರತ - ಪಾಕ್‌ ನಡುವಿನ ಅಣ್ವಸ್ತ್ರ ಪೈಪೋಟಿ ತಡೆವುದು ನನ್ನ ಗುರಿ’ಸಂದರ್ಶನವೊಂದರಲ್ಲಿ ಬಿಲ್‌ ಕ್ಲಿಂಟನ್‌ ವ್ಯಕ್ತಪಡಿಸಿರುವ ಅಭಿಪ್ರಾಯ

ವಾಷಿಂಗ್ಟನ್‌ : ಭಾರತ ಮತ್ತು ಪಾಕಿಸ್ತಾನದ ನಡುವೆ ಬುಗಿಲೇಳುತ್ತಿರುವ ಅಣ್ವಸ್ತ್ರ ಪೈಪೋಟಿಯನ್ನು ತಡೆಯುವುದು ತಮ್ಮ ಅಧ್ಯಕ್ಷೀಯ ಪದವಿಯ ಅವಧಿಯ ಗುರಿಗಳಲ್ಲೊಂದು ಎಂದು ಅಮೆರಿಕದ ಅಧ್ಯಕ್ಷ ಬಿಲ್‌ ಕ್ಲಿಂಟನ್‌ ಹೇಳಿದ್ದಾರೆ.

ಎರಡೂ ದೇಶಗಳ ನಡುವೆ ಇರುವ ಉದ್ವಿಘ್ನ ಪರಿಸ್ಥಿತಿಯನ್ನು ನಿವಾರಿಸಿ ಸಂಭವನೀಯ ಸಮರ ಹಾಗೂ ಅಣ್ವಸ್ತ್ರ ಸಮರವನ್ನು ತಡೆಯಲು ತಾವು ಪ್ರಯತ್ನಿಸುವುದಾಗಿ ಹೇಳಿರುವ ಅವರು, ತಮ್ಮ ಅಧ್ಯಕ್ಷೀಯ ಅವಧಿ ಮುಗಿಯುತ್ತಾ ಬಂದಿದ್ದು, ತಾವು ಈ ವಿಷಯದಲ್ಲಿ ಬಹಳ ತಡ ಮಾಡಿದೆನೇನೋ ಎಂದು ಅನ್ನಿಸುತ್ತದೆ ಎಂದಿದ್ದಾರೆ. ನ್ಯೂಯಾರ್ಕ್‌ನಲ್ಲಿ ಲೇಖಕ ಜೋ ಕ್ಲೀನ್‌ ಅವರಿಗೆ ನೀಡಿರುವ ಸಂದರ್ಶನದಲ್ಲಿ ಈ ಅಂಶಗಳನ್ನು ಕ್ಲಿಂಟನ್‌ ಪ್ರಕಟಿಸಿದ್ದಾರೆ. ಸಂದರ್ಶನದ ಪ್ರತಿಯನ್ನು ಶ್ವೇತಭವನ ಬಿಡುಗಡೆ ಮಾಡಿದೆ.

ಭಾರತಕ್ಕೆ ಹಾಗೂ ಪಾಕಿಸ್ತಾನಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಅಥವಾ ಭಾರತದ ಪ್ರಧಾನಿ ವಾಜಪೇಯಿ ಅವರು ಇತ್ತೀಚೆಗೆ ಅಮೆರಿಕಾ ಪ್ರವಾಸ ಕೈಗೊಂಡ ಸಂದರ್ಭದಲ್ಲಿಯಾಗಲೀ ಕ್ಲಿಂಟನ್‌ ಅವರು ಎರಡೂ ದೇಶಗಳ ನಾಯಕರಿಗೆ ಅಣ್ವಸ್ತ್ರ ಪೈಪೋಟಿ ನಿಲ್ಲಿಸುವಂತೆ ಬಿರುನುಡಿಗಳಲ್ಲಿ ತಿಳಿಸಿರಲಿಲ್ಲ.