ಮಳೆ : ತುಮಕೂರು ಜಿಲ್ಲೆಯಲ್ಲಿ 6 ಸಾವು

ತುಮಕೂರು :ಮೇ, ಜೂನ್‌ ತಿಂಗಳಿನಲ್ಲಿ ರಾಜ್ಯಾದ್ಯಂತ ಮಳೆಯಾಗುತ್ತಿದ್ದಾಗ, ಮಳೆಯಿಲ್ಲ ಎಂದು ಪರಿತಪಿಸುತ್ತಿದ್ದ ತುಮಕೂರು ಜಿಲ್ಲೆಯಾದ್ಯಂತ ಕಳೆದ 10 ದಿನಗಳಿಂದ ಸುರಿದ ಧಾರಾಕಾರ ಮಳೆ 6 ಜೀವಗಳನ್ನು ಬಲಿ ತೆಗೆದುಕೊಂಡಿದೆ. 1215ಕ್ಕೂ ಹೆಚ್ಚು ಮನೆಗಳು ಹಾನಿಗೊಳಗಾಗಿವೆ.

ಆಗಸ್ಟ್‌ ತಿಂಗಳಿನಲ್ಲಿ ಜಿಲ್ಲೆಯಲ್ಲಿ ಬಿದ್ದ ಭಾರಿ ಮಳೆ ಐವರನ್ನು ಬಲಿ ತೆಗೆದುಕೊಂಡು, ಕೋಟ್ಯಂತರ ರುಪಾಯಿ ನಷ್ಟ ಉಂಟು ಮಾಡಿತ್ತು. ಕಳೆದ ವಾರ ಸುರಿದ ಮಳೆ ಶಿರಾ ತಾಲೂಕಿನ ಬುಕ್ಕಾ ಪಟ್ಟಣ ಹೋಬಳಿಯ ಬಾಳಾಪುರ ಗ್ರಾಮದಲ್ಲಿ ಮೂವರು ಮಕ್ಕಳನ್ನು ಬಲಿ ತೆಗೆದುಕೊಂಡಿದೆ. ಎಮ್ಮೆ ಕಾಯಲು ಹೋಗಿದ್ದ ಮೂವರು ಮಕ್ಕಳು ತುಂಬಿ ಹರಿಯುತ್ತಿದ್ದ ಕೆರೆಯಲ್ಲಿ ಮುಳುಗಿ ಮೃತಪಟ್ಟರೆ, ತುಮಕೂರು ನಗರದ ಗೂಡ್ಸ್‌ಶೆಡ್‌ ಕಾಲನಿಯ ನಿವಾಸಿ ಸನಾವುಲ್ಲಾ ಮನೆಕುಸಿತದಿಂದ ಮೃತಪಟ್ಟಿದ್ದಾರೆ.

ತಿಪ್ಪಯ್ಯ ಎಂಬಾತ ಗುಬ್ಬಿಯ ಅಮಾನಿಕೆರೆ ಕೋಡಿಯಲ್ಲಿ ಈಜಲು ಹೋಗಿ ಸಾವನ್ನಪ್ಪಿದ್ದಾರೆ. ಇದೇ ತಾಲೂಕಿನ ಕಡಬಾ ಕೆರೆಯಲ್ಲಿ ಶಿವರಾಮಯ್ಯ ಎನ್ನುವವರ ಶವವೂ ಪತ್ತೆಯಾಗಿದೆ. ಜಿಲ್ಲೆಯಾದ್ಯಂತ ಸುರಿದ ಮಳೆಯಿಂದ ಹಲವಾರು ಮನೆಗಳು ನೆಲಕಚ್ಚಿವೆ.

ತುಮಕೂರು ತಾಲೂಕಿನಲ್ಲೇ 481, ಗುಬ್ಬಿ ತಾಲೂಕಿನಲ್ಲಿ 542, ಚಿಕ್ಕನಾಯಕನಹಳ್ಳಿಯಲ್ಲಿ 192 ಮನೆಗಳು ಭಾಗಶಃ ಕುಸಿದಿವೆ ಎಂದು ತಿಳಿದುಬಂದಿದೆ.