ಮಳೆಯ ನಡುವೆಯೂ ಬೆಂಗಳೂರಲ್ಲಿ ವೈಭವದ ದಸರಾ ಮೆರವಣಿಗೆ

ಬೆಂಗಳೂರು :ರಾಜ್ಯದ ಸಾಂಸ್ಕೃತಿಕ ರಾಜಧಾನಿ ಮೈಸೂರಿನಲ್ಲಿ ನಡೆಯುವ ದಸರಾ ಮಹೋತ್ಸವ ಮಾದರಿಯಲ್ಲೇ ರಾಜ್ಯದ ರಾಜಧಾನಿ ಬೆಂಗಳೂರಿನಲ್ಲೂ ಪ್ರತಿವರ್ಷ ದಸರೆ ನಡೆಯುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಭಾರಿ ಪ್ರಸಿದ್ಧಿ ಪಡೆಯುತ್ತಿರುವ ಜಯಚಾಮರಾಜೇಂದ್ರ ನಗರದ ದಸರಾ ಭಾನುವಾರ ಸಂಜೆ ವಿಜೃಂಭಣೆಯಿಂದ ಜರುಗಿತು.

ಬೆಂಗಳೂರಿನಲ್ಲಿ ಭಾನುವಾರ ಮಧ್ಯಾಹ್ನದಿಂದಲೇ ಭಾರಿ ಮಳೆ ಸುರಿಯಿತು. ಸಂಜೆಯ ವೇಳೆಗೆ ನಿಂತಿತಾದರೂ, ಸಣ್ಣಗೆ ಹನಿಯುತ್ತಲೇ ಇತ್ತು. ಈ ತುಂತುರ ಸಿಂಚನದ ನಡುವೆಯೂ ಬೆಂಗಳೂರು ದಸರಾ ಮೆರವಣಿಗೆ ವೀಕ್ಷಿಸಲು ಸಾವಿರಾರು ಸಂಖ್ಯೆಯಲ್ಲಿ ಜನ ಸೇರಿದ್ದರು.

ಮುನಿರೆಡ್ಡಿ ಪಾಳ್ಯ ಎಂದೇ ಪರಿಚಿತವಾಗಿರುವ ಜೆ.ಸಿ. ನಗರದ ಸುತ್ತ ಮುತ್ತ ಇರುವ ಗಂಗಾನಗರ, ಮೋತಿ ನಗರ, ಸುಲ್ತಾನಪಾಳ್ಯ, ಬೈರಸಂದ್ರವೇ ಮೊದಲಾದ ಬಡಾವಣೆಗಳಲ್ಲಿರುವ ದೇವಾಲಯಗಳ 60ಕ್ಕೂ ಹೆಚ್ಚು ಉತ್ಸವ ಮೂರ್ತಿಗಳ ಪಲ್ಲಕ್ಕಿ ಉತ್ಸವವೂ ಈ ಸಂದರ್ಭದಲ್ಲಿ ನಡೆಯಿತು.

ಆಶ್ವಯುಜ ಪಾಡ್ಯದ ದಿನದಿಂದಲೇ ವಿದ್ಯುಕ್ತವಾಗಿ ಇಲ್ಲಿ ಆರಂಭಗೊಂಡ ದಸರಾ ಉತ್ಸವ ದಶಮಿಯ ಮೆರವಣಿಗೆಯಾಂದಿಗೆ ಸಂಪೂರ್ಣವಾಯಿತು. ಸ್ಥಳೀಯ ಮುಖಂಡರೂ, ಸಚಿವರೂ ಆದ ರೋಷನ್‌ ಬೇಗ್‌, ಮಾಜಿ ಸಚಿವ ಆರ್‌. ಕೃಷ್ಣಪ್ಪ, ನಗರ ಪೊಲೀಸ್‌ ಆಯುಕ್ತ ಮಡಿಯಾಳ್‌ ಮುಂತಾದವರು ಈ ದಸರಾ ಮಹೋತ್ಸವದಲ್ಲಿ ಭಾಗವಹಿಸಿದ್ದರು.