ವೀರಪ್ಪನ್‌ ಅಣ್ಣನ ಮಗನನ್ನು ಸಂಧಾನಕ್ಕೆ ಕಳುಹಿಸಲು ಸಲಹೆ

ಚೆನ್ನೈ : ತಮ್ಮ ಬಳಿ ವಕೀಲಿ ಅಭ್ಯಾಸ ಮಾಡುತ್ತಿರುವ ವೀರಪ್ಪನ್‌ ಅಣ್ಣ ಮಡಯಾನ್‌ ಪುತ್ರ ಎಂ.ಮಣಿ ಎಂಬುವರನ್ನು ಉಭ-ಯ ಸರ್ಕಾರಗಳ ಸಂಧಾನಕಾರನಾಗಿ ಕಳುಹಿಸಿಕೊಡುವಂತೆ ಚೆನ್ನೈನ ವಕೀಲರೊಬ್ಬರು ಸೋಮವಾರ ಸಲಹೆ ಕೊಟ್ಟಿದ್ದಾರೆ.

ಎರಡು ವರ್ಷಗಳ ಹಿಂದೆ ವೀರಪ್ಪನ್‌ ಅಪಹರಣಕ್ಕೆ ಈಡಾಗಿದ್ದ ವಕೀಲ ಎಸ್‌.ಕೃಷ್ಣಸ್ವಾಮಿ, ಕರ್ನಾಟಕದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರಿಗೆ ಪತ್ರವೊಂದನ್ನು ಕಳುಹಿಸಿದ್ದು, ಮಣಿ ಮತ್ತಿತರರನ್ನು ಸಂಧಾನಕ್ಕೆ ಕಳುಹಿಸಿಕೊಡುವಂತೆ ಸಲಹೆ ಸೂಚಿಸಿದ್ದಾರೆ. ವೀರಪ್ಪನ್‌ ಜೊತೆ ಸಂಧಾನ ನಡೆಸಲು ಮಣಿ ಸಿದ್ಧವಿರುವುದಾಗಿಯೂ ಅವರು ಹೇಳಿದ್ದಾರೆ.

ಕೃಷ್ಣ ಅವರಿಗೆ ಕಳುಹಿಸಿಕೊಟ್ಟಿರುವ ಪತ್ರದ ಪ್ರತಿಯಾಂದನ್ನು ಮಾಧ್ಯಮಗಳಿಗೆ ಕೃಷ್ಣಸ್ವಾಮಿ ಸೋಮವಾರ ಬಿಡುಗಡೆ ಮಾಡಿದರು. 1998 ಮೇ 24ರಂದು ವೀರಪ್ಪನ್‌ ತಮ್ಮನ್ನು ಅಪಹರಿಸಿದ್ದ. 12 ದಿನಗಳ ಬಳಿಕ ವಿಶೇಷ ಕಾರ್ಯಪಡೆ ಬಿಡಿಸಿತು ಎಂದು ಕೃಷ್ಣಸ್ವಾಮಿ ಪತ್ರದಲ್ಲಿ ತಿಳಿಸಿದ್ದಾರೆ.

ಕ್ಯಾರೆಟ್‌ ಅಂಡ್‌ ಸ್ಟಿಕ್‌ ಪಾಲಿಸಿ : ರಾಜ್‌ ಅಪಹರಣ ಪ್ರಕರಣದಲ್ಲಿ ಸರ್ಕಾರದ ಕಾರ್ಯತಂತ್ರವನ್ನು ಮಾಜಿ ಮುಖ್ಯಮಂತ್ರಿ ಎಸ್‌.ಬಂಗಾರಪ್ಪ ಮತ್ತು ಮಾಜಿ ರೈಲ್ವೆ ಸಚಿವ ಜಾಫರ್‌ ಷರೀಫ್‌ ಟೀಕಿಸಿರುವ ಹಿನ್ನೆಲೆಯಲ್ಲಿ , ಮುಖ್ಯಮಂತ್ರಿ ಕೃಷ್ಣ ತಮ್ಮ ಸರ್ಕಾ-ರ-ದ ನೀತಿ ಸರಿಯಿದೆ ಎಂದು ಮಗದೊಮ್ಮೆ ಸಮರ್ಥಿಸಿಕೊಂಡಿದ್ದಾರೆ.

ನಾವು ಅಪಹರಣಕಾರನ ಜೊತೆ ಸೌಮ್ಯವಾಗಿ ಮಾತನಾಡುತ್ತಿದ್ದರೂ ಬಗಲಲ್ಲಿ ಕೋಲನ್ನು ಇಟ್ಟುಕೊಂಡಿದ್ದೇವೆ. ಸಂಧಾನದ ಎಲ್ಲಾ ಯತ್ನಗಳೂ ವಿಫಲವಾದಲ್ಲಿ ಮಾತ್ರ ಕೋಲನ್ನು ಉಪಯೋಗಿಸುತ್ತೇವೆ. ಇಂತಹ ಸೂಕ್ಷ್ಮ ವಿಷಯಗಳಲ್ಲಿ ಆತುರದ ನಿರ್ಧಾರ ಒಳಿತಲ್ಲ ಎಂಬುದನ್ನು ಎಲ್ಲರೂ ಗಮನದಲ್ಲಿಟ್ಟುಕೊಂಡು ಮಾತನಾಡಬೇಕು ಎಂದು ಹೇಳಿದ್ದಾರೆ.

(ಇನ್ಫೋ ವಾರ್ತೆ)