ಹುಬ್ಬಳ್ಳಿ ಸಮೀಪ ನಾದಿನಿ ಕಡೆಯವರಿಂದ ಕೊಲೆ ಯತ್ನ

ಹು ಬ್ಬಳ್ಳಿ : ವರದಕ್ಷಿಣೆ ಆರೋಪವನ್ನು ತನ್ನ ಮೇಲೆ ಹೊರಿಸಿದ್ದರ ವಿರುದ್ಧ ಪೋಲಿಸರಿಗೆ ದೂರು ಕೊಡಲು ಹೋಗುತ್ತಿದ್ದ ವ್ಯಕ್ತಿ ಯನ್ನು ಆತನ ಹತ್ತಿರದ ಸಂಬಂಧಿಕರೇ ಇರಿದು ಗಾಯಗೊಳಿಸಿದ್ದಾರೆ. ಪೂನಾ-ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿಯ ತಿಮ್ಮಾಪುರ ಸಮೀಪ ಈ ಘಟನೆ ಬುಧವಾರ ರಾತ್ರಿ ನಡೆದಿದೆ. ಇರಿತಕ್ಕೊಳಗಾಗಿ ತೀವ್ರವಾಗಿ ಗಾಯಗೊಂಡಿರುವ ರಾಜೇಶ್‌ ಎಂಬ ಈ ಹರಿಜನ ಯುವಕನನ್ನು ಕರ್ನಾಟಕ ಮೆಡಿಕಲ್‌ ಕಾಲೇಜ್‌ ಆಸ್ಪತ್ರೆಗೆ ಸೇರಿಸಲಾಗಿದೆ. ಆತನ ಪರಿಸ್ಥಿತಿ ಗಂಭೀರವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಹಲ್ಲೆಗೊಳಗಾದ ವ್ಯಕ್ತಿಯ ನಾದಿನಿ ಕಡೆಯವರು ಈ ದುಷ್ಕೃತ್ಯ ನಡೆಸಿದ್ದಾರೆಂದು ಆರೋಪ.

ಸುಮ್ಮಸುಮ್ಮನೆ ಆರೋಪ, ಕಾಂಗ್ರೆಸ್‌ ಸದಸ್ಯ ಅಮಾನತು : ಹುಬ್ಬಳ್ಳಿ- ಧಾರವಾಡ ಮಹಾನಗರ ಪಾಲಿಕೆಯ ಈ ಮಾಸಿಕ ಸಭೆಯಲ್ಲಿ ಬರೀ ಆರೋಪ ಪ್ರತ್ಯಾರೋಪಗಳದ್ದೇ ಪಾರುಪತ್ಯ. ಆಳುವ ಪಕ್ಷ ಹಾಗೂ ವಿರೋಧ ಪಕ್ಷಗಳ ನಡುವೆ ಮಾತುಗಳ ಸಮರವೇ ನಡೆಯಿತು. ಈ ಘಟನೆ ಅಂತಿಮವಾಗಿ ಆಳುವ ಪಕ್ಷದ ಸದಸ್ಯರೊಬ್ಬರನ್ನು ಒಂದು ದಿನದ ಮಟ್ಟಿಗೆ ಅಮಾನತು ಮಾಡುವಲ್ಲಿ ಪರ್ಯವಸಾನವಾಯಿತು.

ಸಾಕ್ಷಿ ಪುರಾವೆ ಯಾವುದೂ ಇಲ್ಲದೆ ಕಮಿಷನರ್‌ ಮೇಲೆ ಆರೋಪಗಳನ್ನು ಹೊರಿಸುತ್ತಿದ್ದ ಕಾಂಗ್ರೆಸ್‌ ಪಕ್ಷದ ನಡಾಫ್‌ ಅವರನ್ನು ಮೇಯರ್‌ ಸರಳಾ ಭಡ್ಗೆ ಅಮಾನತುಗೊಳಿಸಿದರು. ಭಾರತೀಯ ಜನತಾಪಕ್ಷದ ಸದಸ್ಯರು ಮೇಯರ್‌ ಅವರ ತೀರ್ಪಿಗೆ ಬೆಂಬಲ ವ್ಯಕ್ತಪಡಿಸಿದರು. ಸಪ್ತಾಪುರ ಬಡಾವಣೆಯಲ್ಲಿ ನಿವೇಶನಗಳಿಗೆ ಗುರುತುಹಾಕುವಾಗ ಕಮಿಷನರ್‌ ಸಾಹೇಬರು ಬ್ರಷ್ಟಾಚಾರ ಮಾಡುತ್ತಿದ್ದಾರೆ ಎಂದು ನಡಾಫ್‌ ಆರೋಪ ಮಾಡಿದ್ದರು.