ಸೆ. 5ರಿಂದ ರೈತರ ಮನೆ ಬಾಗಿಲಿಗೆ ಕೃಷಿ ಮಾಹಿತಿ ಹೊತ್ತ ವ್ಯಾನ್‌

ಬೆಂಗಳೂರು :ರೈತರಿಗೆ ಕೃಷಿ ಬಗೆಗೆ ಸಮಗ್ರ ಮಾಹಿತಿ ನೀಡುವ ದೃಷ್ಠಿಯಿಂದ ಸಂಚಾರಿ ಕೃಷಿ ಕ್ಲಿನಿಕ್‌ ಘಟಕ ಸೆಪ್ಟಂ-ಬ-ರ್‌ 5 ರಿಂದ ರಾಜ್ಯದಲ್ಲಿ ಪ್ರಥಮ ಬಾರಿಗೆ ಆರಂಭವಾಗಲಿದೆ.

ಮೊದಲು ಬೆಂಗಳೂರು, ಕೋಲಾರ ಮತ್ತು ತುಮಕೂರುಗಳಲ್ಲಿ ಈ ಘಟಕ ಆರಂಭವಾಗಲಿದ್ದು, ನಂತರ ರಾಜ್ಯದ ಇತರ ಜಿಲ್ಲೆಗಳಲ್ಲಿಯೂ ಸಂಚಾರಿ ಕೇಂದ್ರಗಳನ್ನು ತೆರೆಯಲಾಗುವುದು. ರೈತರು ಬೆಳೆಯುವ ಬೆಳೆಗೆ ಗೊಬ್ಬರ ಒದಗಿಸುವ ನಿಟ್ಟಿನಲ್ಲಿ ಪೂರಕವಾದ ಮಣ್ಣು ಪರೀಕ್ಷೆ, ಒದಗಿಸಬೇಕಾದ ಗೊಬ್ಬರ, ಹವಾಮಾನ ವೈಪರೀತ್ಯ ಮತ್ತು ರೋಗಬಾಧೆಯ ಸಂದರ್ಭದಲ್ಲಿ ಬೆಳೆಯನ್ನು ರಕ್ಷಿಸಿಕೊಳ್ಳಲು ರೈತರು ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆ ಕ್ರಮಗಳ ಬಗ್ಗೆ ಸಂಚಾರಿ ಕೃಷಿ ಕ್ಲಿನಿಕ್‌ ಮಾಹಿತಿ ನೀಡಲಿದೆ.

ಜಿಲ್ಲೆಯಲ್ಲಿ ಬೆಳೆಯಬಹುದಾದ ಕೃಷಿ ಉತ್ಪನ್ನಗಳು, ಮತ್ತು ಉನ್ನತ ತಂತ್ರಜ್ಞಾನ ಉಪಯೋಗಿಸಿಕೊಂಡು ಅವುಗಳನ್ನು ಬೆಳೆಯುವ ವಿಧಾನಗಳ ಬಗ್ಗೆ ಈ ಕ್ಲಿನಿಕ್‌ನಲ್ಲಿ ವೀಡಿಯೋ ಚಿತ್ರ ಪ್ರದರ್ಶನ ಸಹಿತ ವಿವರವಾದ ಮಾಹಿತಿಯನ್ನು ರೈತರಿಗೆ ವಿವರಿಸುವ ವ್ಯವಸ್ಥೆ ಇದೆ. ಕೃಷಿ ಮಾಹಿತಿ ತಜ್ಞರು ಈ ಕ್ಲಿನಿಕ್‌ನಲ್ಲಿಯೇ ಇರುತ್ತಾರೆ.

ಸಧ್ಯದಲ್ಲಿಯೇ ಪ್ರತ್ಯೇಕ ಮಣ್ಣು ಪರೀಕ್ಷಾ ಸಂಚಾರಿ ಘಟಕವೂ ಆರಂಭವಾಗಲಿದೆ. ಸಂಚಾರಿ ಕೃಷಿ ಕ್ಲಿನಿಕ್‌ನ್ನು ಬೆಂಗಳೂರಿನ ಐ ಇ ಡಿ ಪ್ಯಾರಿ (ಇಂಡಿಯಾ)ಲಿಮಿಟೆಡ್‌ ಸಂಸ್ಥೆ ಮತ್ತು ಸರಕಾರ ಜಂಟಿ ಸಹಯೋಗದೊಂದಿಗೆ ತುಮಕೂರಿನ ಶಿರಾದಲ್ಲಿ ಉದ್ಘಾಟಿಸಲಿದ್ದಾರೆ.

(ಇನ್ಫೋ ವಾರ್ತೆ)